އީރާން އަށް ހަމަލާ ދިނީ އަމިއްލަ އެދުމެއް އޮވެގެނެއް ނޫން، މުޅި ދުނިޔޭގެ ޙައްގުގައި: ޓްރަމްޕް

އެމެރިކާ އިން އިޒްރޭލްއާ އެކުވެގެން އީރާން އަށް ހަމަލާ ދިނީ އަމިއްލަ އެދުމެއް އޮވެގެން ނޫން ކަމަށާއި، އެއީ މުޅި ދުނިޔޭގެ ހައްގުގައި ދިން ހަމަލާއެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު ވައިޓް ހައުސްގައި ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ ނިއުކްލިއާ ޕްރޮގްރާމް ނައްތާލައި، ތިން ވަނަ ބޮޑު ހަނގުރާާމަ އަކުން ދުނިޔެ ސަލާމަތް ކޮށްދީފައިވާ ކަމަށެވެ. 

އެގޮތުން ޓްރަމްޕް ވިދާޅުވީ އީރާންގެ ނިއުކްލިއާ ޕްރޮގްރާމް ނައްތައި ނުލައިފި ނަމަ، އީރާން އިން އެއް މަސް ދުވަހުގެ ތެރޭގައި ނިއުކްލިއާ ހަތިޔާރު އުފައްދާނެ ކަމަށެވެ. އަދި އެ ހަތިޔާރު އެންމެ ފުރަތަމަ ބޭނުން ކުރާނީ އިޒްރޭލްއާ ދެކޮޅަށް ކަމަށާއި، އެއަށް ފަހު މެދު އިރުމަތީގެ ސަރަހައްދުގައި ވެސް ބޭނުން ކުރާނެ ކަމަށް ޓްރަމްޕް ވިދާޅުވި އެވެ. 

އެކަމަށް އިޝާރާތް ކުރައްވަމުން ޓްރަމްޕް ވިދާޅުވީ، އެއީ ދުނިޔެ ތިން ވަނަ ބޮޑު ހަނގުރާމަ އަށް ވެއްޓޭނެ ނިއުކްލިއާ ހަނގުރާމައެއް ކަމަށެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އެއްވެސް އެއްޗެއް ނުހުންނަ މިންވަރަށް އެ ހަނގުރާމައިގެ ސަބަބުން ދުނިޔެ ހަލާކު ވެދާނެ ކަމަށެވެ. އެހެންކަމުން އީރާން އަށް ހަަމަލާ ދިނުމަކީ ވަރަށް ރަނގަޅަށް ކުރެވުނު ކަމެއް ކަމަށް ވެސް ޓްރަމްޕް ވިދާޅުވި އެވެ. 

އީރާާން އަށް އެއްވެސް ނިއުކްލިއާ ހަތިޔާރެއް ލިބިގެން ނުވާނެ ކަަމަށާއި، އެ ޤައުމަށް އެފަދަ ހަތިޔާރެއް ލިބިގެން ވެސް ނުވާނެ ކަމަށް ޓްރަމްޕް ވަނީ ވިދާޅުވެފައިވެ އެވެ. އީރާންގައި ނޭވީ ނެތް ކަމަށާއި، އެއާ ފޯސް ނެތް ކަމަށާއި، އެންޓި އެއާކްރާފްޓް ހަތިޔާރު ނެތް ކަމަށާއި، އަދި ލީޑާޝިޕެއް ވެސް ނެތް ކަމަށް ޓްރަމްޕް ވަނީ ވިދާޅުވެފަ އެވެ. 

އެއާ އެކު ޓްރަމްޕް ވިދާޅުވެފައި ވަނީ، އީރާން އަށް ހަމަލާ ދިނުމަކީ އަމިއްލަ އެދުމުގައި، ނުވަތަ އެމެރިކާގެ ބޭނުމުގައި ކުރި ކަމެއް ނޫން ކަަމަށެވެ. އެއީ މުޅި ދުނިޔެ އަށްޓަކައި، ދުނިޔޭގެ ހައްގުގައި ކުރެއްވި ކަމެއް ކަމަށް ވެސް ޓްރަމްޕް ވިދާޅުވެފައިވެ އެވެ. ހަމަ އެއާ އެކު ޓްރަމްޕް ވިދާޅުވީ، އީރާން އިން ވާހަކަ ދައްކަން ޖެހޭނީ ކާކާ ކަމެއް ނޭނގޭ ކަމަށާއި، އީރާންގެ އިސްވެރިންނަކީ ކޮބައި ކަމެއް ވެސް ނޭނގޭ ކަމަށެވެ. 

ޓްރަމްޕް މިހެން ވިދާޅުވެފައިވާއިރު، އެމެރިކާ އާއި އިޒްރޭލް އިން އީރާން އަށް ހަމަލާ ދީފައި ވަނީ، އީރާން އިން އެމެރިކާ އާއެކު ނިއުކްލިއާ މަޝްވަރާތައް ކުރިއަށް ގެންދަނިކޮންނެވެ. އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި، އީރާން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ.