އީރާން އިން ސައުދީ އަށް އަމާޒުކޮށް ދިން ހަމަލާތައް ހަރުކަށި އިބާރާތުން ކުށްވެރި ކުރާ ކަމަށް މިޞްރުގެ ރައީސް ވިދާޅުވެއްޖެ

ސައުދީ އަރަބިއްޔާ އަށް އަމާޒުކޮށް އީރާން އިން ދިން ހަމަލާތައް ހަރުކަށި އިބާރާތުން ކުށްވެރި ކުރައްވާ ކަމަށް، މިޞްރުގެ ރައީސް ޢަބްދުލް ފައްތާޙު އައްސީސީ ވިދާޅުވެއްޖެ އެވެ. 

އައް ސީސީ މިހެން ވިދާޅުވެފައި ވަނީ، ހޯމަ ދުވަހު ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އަށް ފޯނުން ގުޅުއްވައި ދެއްކެވި ވާހަކައިގަ އެވެ. 

އެ ފޯނު ކޯލާ ގުޅޭ ގޮތުން މިޞްރުގެ ރިޔާސީ އޮފީހުން ނެރުނު ބަޔާނެއްގައި ބުނެފައި ވަނީ، މެދު އިރުމަތީގައި ހިނގަމުންދާ ޙާލަތާ ގުޅިގެން ސައުދީ އަރަބިއްޔާ އާއެކު މިސްރުން ފުރިހަމަ އަށް އެއްބާރުލުން ދެމުންދާ ކަމަށް، އައް ސީސީ ވިދާޅުވެފައިވާ ކަމަށެވެ. އަދި އީރާން އިން ސައުދީގެ ސުލްޠާން އަށް ދިން ހަމަލާތައް މިޞްރުން ހަރުކަށި އިބާރާތުން ކުށްވެރި ކުރައްވާ ކަމަށާއި، އެއީ ބަަލައި ގަނެވޭނެ ކަމެއް ނޫން ކަމަށް ވެސް އައް ސީސީ ވަނީ ވިދާޅުވެފަ އެވެ.

މީގެ އިތުރުންެ ފޯނު ކޯލުގައި އައް ސީސީ ވަނީ އަރަބި ހުރިހާ ޤައުމުތަކެއްގެ ސިޔާދަތަށް އިޙުތިރާމް ކުރުމާއި، އެ ޤައުމު ތަކުގެ ރައްޔިތުންގެ ވަސީލަތްތަކަށް ހުރުމަތްތެރި ކޮށް ހިތުމުގެ މުހިންމުކަން ވެސް ފާހަގަ ކުރައްވައިފަ އެވެ. 

ރިޔާސީ އޮފީހުގެ ތަރުޖަމާނު މުޙައްމަދު އައް ޝަނާވީ ވިދާޅުވި ގޮތުގައި، ސަރަހައްދީ ހަމަ ނުޖެހުން ކުޑަ ކުރުމަށް، ސަރަހައްދީ އަދި ބައިނަލްއަޤުވާމީ ފަރާތްތަކާ އެކު މިޞްރުން ކުރަމުން އަންނަ މަސައްކަތް ތަކުގެ ތަފްސީލީ މަައުލޫމާތު ވެސް އައް ސީސީ ވަނީ، ސައުދީގެ ވަލީ އަހުދަށް ދެއްވައިފަ އެވެ. މިޞްރާއި ގަލްފުގެ ޤައުމު ތަކާ ދެމެދު އޮންނަ ބައިވެރިވުން އަދި ގުޅުން ފާހަގަ ކުރައްވައި، އެ ޤައުމު ތަކުގެ ސަލާމަތަކީ ވަކި ނުކުރެވޭނެ ކަމެއް ކަަމަށް ވެސް އައް ސީސީ ވިދާޅުވެފައިވެ އެވެ. 

ހަމަ އެހެންމެ ސަރަހައްދީ ސުލްޙަ ރައްކާތެރި ކުރުމަށާއި، މިހާރު ހިނގަމުން ދާ ހަމަ ނުޖެހުންތައް ކުޑަ ކުރުމަށް ސައުދީ އަރަބިއްޔާގެ ރަސްގެފާނު ސަލްމާން ބިން ޢަބްދުލް ޢަޒީޒް އާއި، ވަލީ އަހުދު މުޙައްމަދު ބިން ސަލްމާންގެ ބެއްލެވުމުގެ ދަށުން ސައުދީ އިން ކުރަމުން އަންނަ މަސައްކަތްތަަކަށް އައް ސީސީ ވަނީ ތައުރީފު ކުރައްވައިފަ އެވެ. 

މީގެ އިތުރުން އެ ފޯނު ކޯލުގައި ވަނީ ދެ  ޤައުމުގެ ދެ މެދުގައި އޮތް ގުޅުން އިތުރަށް ވަރުގަދަ ކުރުމާއި، ސަރަހައްދީ ޤައުމު ތަކާ ގުޅިގެން މަސައްކަތް ކުރާނެ ގޮތް ތަަކަށް ވެސް މަޝްވަރާ ކުރައްވައިފަ އެވެ.