ފަތުރުވެރިކަން ބޮޑު ތަނުން ދަށަށް ހިނގައްޖެ
މި އަހަރުގެ މާރޗް މަހުގެ ފުރަތަމަ ދެ ހަފުތާގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިދިޔަ އަހަރުގެ އެ މުއްދަތާ އަޅާބަލާއިރު 21.1 އިންސައްތަ ވަނީ ދަށްވެފައި. ފަތުރުވެރިކަމަށް މި އައި ކުއްލި މަޑުޖެހުމަކީ މެދުއިރުމަތީގެ ހަނގުރާމައާ ގުޅިގެން ދުނިޔޭގެ މަސްރަހަށް އައި ބަދަލުތަކާއި ވައިގެ ދަތުރުފަތުރަށް ކުރިމަތިވި ގޮންޖެހުންތަކުގެ ނަތީޖާއެއް ކަމަށް ބެލެވޭ. މި ބަދަލާއެކު، ރާއްޖޭގެ މާކެޓުގެ އެންމެ ކުރީގައި މިހާރު އޮތީ 15.8 އިންސައްތަ ހިއްސާކުރާ ޗައިނާ މާކެޓް.
އަރިއަތޮޅު ދެކުނުބުރީގައި އޮންނަ، އައުޓްރިގަރ މޯލްޑިވްސް މާފުށިވަރު ލަގްޒަރީ ރިސޯޓު މަތިން ފެންނަ މަންޒަރެއް. | ގެޓީ އިމޭޖަސް
މާރޗް މަހުގެ ފުރަތަމަ ދެ ހަފުތާގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަރަށް ބޮޑަށް ދަށަށް ގޮސްފިއެވެ.
މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުން އާންމުކޮށްފައިވާ ތަފާސްހިސާބުތަކަށް ބަލާއިރު، މި އަހަރުގެ މާރިޗު މަހުގެ 1 އިން 14 އަށް ރާއްޖެއަށް ޒިޔާރަތްކޮށްފައިވަނީ 69,648 ފަތުރުވެރިންނެވެ. މިއީ 2025 ވަނަ އަހަރުގެ އެ މުއްދަތުގައި ރާއްޖެއަށް ޒިޔާރަތްކުރި 88,274 ފަތުރުވެރިންނާ އަޅާބަލާއިރު 21.1 އިންސައްތައިގެ ދަށްވުމެކެވެ.
މިދިޔަ އަހަރާ އަޅާބަލާއިރު މިއަހަރުގެ ފުރަތަމަ ދެ މަހުވެސް ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެފައިވާއިރު، ހަމައެކަނި ފެބުރުއަރީ މަހުވެސް 254,000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. މާރޗް މަހުގެ މެދަކާ ހަމައަށް މިއަހަރު ޖުމްލަ 542,158 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ 2025 ވަނަ އަހަރުގެ އެ މުއްދަތާ އަޅާބަލާއިރު 5.8 އިންސައްތައިގެ އިތުރުވުމެކެވެ.
ދުވާލަކު ރާއްޖެއަށް ޒިޔާރަތްކުރާ ފަތުރުވެރިންގެ އަދަދުތަކަށް ބަލާއިރު އަހަރުގެ ކުރީކޮޅު ފަތުރުވެރިން އައި އަދަދުތައް މަތީގައި ހުރި ނަމަވެސް، މާރޗް މަހުގެ ފުރަތަމަ 15 ދުވަހުގެ ތެރޭގައި ބައެއް ދުވަސްދުވަހު ޒިޔާރަތްކުރި ފަތުރުވެރިންގެ އަދަދު ވަނީ 5,000 އަށްވުރެ ދަށަށް ގޮސްފައެވެ. މިހާރު ދުވާލަކު އެވްރެޖްކޮށް 7,427 ފަތުރުވެރިން ޒިޔާރަތްކުރި ނަމަވެސް، ދުވަހުން ދުވަހަށް އަންނަ ބަދަލުތަކަށް ބަލާއިރު މި މުއްދަތުގައި ފަތުރުވެރިކަމުގެ ޑިމާންޑް ދަށްވަމުންދާކަން ފާހަގަކުރެވެއެވެ.
ރާއްޖެއަށް ފަތުރުވެރިން އަންނަ ގައުމުތަކަށް ބަލާއިރު، މި އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ ޗައިނާއިންނެވެ. އެއީ 85,679 ފަތުރުވެރިން ނުވަތަ ޖުމްލަ ފަތުރުވެރިންގެ 15.8 އިންސައްތައެވެ. ޗައިނާގެ އިތުރުން ރަޝިޔާ، އިޓަލީ، އިނގިރޭސިވިލާތް އަދި ޖަރުމަނަކީ ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކެވެ.
މާރިޗު މަހުގެ މެދަކާ ހަމައަށް ރިސޯޓުތަކާއި، ގެސްޓްހައުސްތަކާއި، ހޮޓާތަކާއި ސަފާރީ އުޅަނދުތައް ހިމެނޭހެން 1,297 ފަތުރުވެރި ފެސިލިޓީއެއް ދަނީ ހިންގަމުންނެވެ. މިއާއެކު ފަތުރުވެރިންނަށް ޚިދުމަތް ދިނުމަށް 68,000 އަށްވުރެ ގިނަ އެނދު ވަނީ ރަޖިސްޓްރީކޮށްފައެވެ. މި ސިނާއަތުގައި އަދިވެސް އެންމެ ބޮޑު ހިއްސާއެއް އޮތީ ރިސޯޓުތަކުގައެވެ. އެއީ ގާތްގަނޑަކަށް 68 އިންސައްތައެވެ. އަދި ގެސްޓްހައުސްތަކުގެ ހިއްސާއަކީ 26 އިންސައްތައެވެ.
