ޓްރިޕްއެޑްވައިޒާގެ އެންމެ މަގުބޫލު ހަނީމޫން ލިސްޓުން އެއްވަނަ މަގާމު ރާއްޖެ އަކަށް ނުލިބުނު
ޓްރިޕްއެޑްވައިޒާގެ "ޓްރެވަލާސް ޗޮއިސް އެވޯޑްސް" އިން ހޮވި ދުނިޔޭގެ އެންމެ މަގުބޫލު ހަނީމޫން މަންޒިލްތަކުގެ ލިސްޓުގެ ތިންވަނަ ދިވެހިރާއްޖެއަށް ލިބިއްޖެ. ފާއިތުވި 12 މަސްދުވަހުގެ ރިވިއުތަކަށް ބިނާކޮށް އެކުލަވާލި މި ލިސްޓުގެ އެއްވަނަ އިންޑޮނޭޝިއާގެ ބާލީއަށް ލިބުނުއިރު، ދެވަނަ ހޯދާފައިވަނީ މޮރިޝަސް. މި ރޭންކިންގައި ހިމެނެނީ އެ ސައިޓުގައި ރަޖިސްޓްރީކޮށްފައިވާ 8 މިލިއަނަށްވުރެ ގިނަ ތަންތަނުގެ ތެރެއިން އެންމެ މަތީ ދަރަޖަ ލިބުނު އެއް އިންސައްތައަށްވުރެ ވެސް މަދު މަންޒިލް.
ބާލީ، އިންޑޮނޭޝިއާ. | ޝަޓާ ސްޓޮކް
ދުނިޔޭގެ އެންމެ މަގުބޫލު ހަނީމޫން މަންޒިލްތަކުގެ ލިސްޓް ޓްރިޕްއެޑްވައިޒާ އިން އާންމުކުރި އިރު އެއްވަނަ މަގާމު ރާއްޖެ އަކަށް ނުލިބުނެވެ.
ޓްރިޕްއެޑްވައިޒާގެ "ޓްރެވަލާސް ޗޮއިސް އެވޯޑްސް: ބެސްޓް އޮފް ދަ ބެސްޓް" ރޭންކިން އެކުލަވާލާފައިވަނީ ވޭތުވެދިޔަ 12 މަސްދުވަހުގެ ތެރޭގައި ޓްރިޕްއެޑްވައިޒާގެ ކޮމިއުނިޓީން ދީފައިވާ ގިނަ އަދަދެއްގެ މަތީ ފަންތީގެ ރިވިއުތަކަށް ބިނާކޮށެވެ. ޓްރިޕްއެޑްވައިޒާ އިން ބުނާ ގޮތުގައި އެ ސައިޓުގައި ހިމެނޭ ގާތްގަނޑަކަށް 8 މިލިއަން ތަންތަނުގެ ތެރެއިން މި ލިސްޓަށް ހޮވެނީ އެކެއް އިންސައްތައަށްވުރެ ވެސް މަދު ތަންތަނެވެ.
އެންމެ ފަހުން އާންމު ކުރި ލިސްޓުގައި އެއްވަނަ ލިބިފައިވަނީ އިންޑޮނީޝިއާ ގެ ބާލީ އަށެވެ. ރާއްޖެ އަށް ލިބިފައިވަނީ ލިސްޓުގެ ތިން ވަނަ އެވެ. ލިސްޓުން ދެވަނަ ހޯދާފައިވަނީ މޮރިޝަސް އެވެ.
ޓްރިޕްއެޑްވައިޒަރގެ ބެސްޓް ހަނީމޫން ޑެސްޓިނޭޝަންގެ ގަދަ ދިހަ އަކަށް ހޮވިފައިވާ މަންޒިލްތައް:
10. އެންޓީގާ
9. ވަޓާމޫ، ކެންޔާ
8. ޕޮސިޓާނޯ، އިޓަލީ
7. ނާޕާ، އެމެރިކާ
6. ހުއޭ، ވިއެޓްނާމް
5. ގޯލް، ސްރީލަންކާ
4. ސެއިންޓް ލޫޝިއާ
3. ދިވެހިރާއްޖެ
2. މޮރިޝަސް
1. ބާލީ، އިންޑޮނޭޝިއާ
