އީރާން ހަނގުރާމަ އާ ގުޅިގެން ރާއްޖެ އަށް ދަތުރުކުރާ ފަތުރުވެރިންނަށް އިނގިރޭސިވިލާތުން އިންޒާރު ނެރެފި

އިނގިރޭސިވިލާތުގެ ފޮރިން، ކޮމަންވެލްތު އެންޑް ޑިވެލޮޕްމަންޓް އޮފީސް (އެފް.ސީ.ޑީ.އޯ) އިން ރާއްޖެއަށް ދަތުރުކުރާ އިނގިރޭސި ފަތުރުވެރިންނަށް ދެމުންދާ ދަތުރުފަތުރުގެ އިރުޝާދުތަކަށް ބަދަލު ގެނެސް، އާ އިންޒާރެއް ނެރެފިއެވެ.

އިނގިރޭސި ސަރުކާރުން ރާއްޖެއަށް ޗުއްޓީ ހޭދަކުރަން އަންނަ ފަރާތްތަކަށް މި އިރުޝާދު ނެރެފައިވަނީ މެދުއިރުމަތީގައި އީރާނާ ދެކޮޅަށް އެމެރިކާ އާއި އިޒްރޭލުން ހިންގަމުންދާ ހަނގުރާމަ އާއި ނުތަނަވަސްކަން އިތުރުވަމުންދާ ދަނޑިވަޅެއްގައެވެ.

އެފް.ސީ.ޑީ.އޯ ގެ ވެބްސައިޓުގައި ރާއްޖެއަށް ޒިޔާރަތްކުރާ ފަތުރުވެރިންނަށް އަމާޒުކޮށް ނެރުނު އާ އިންޒާރުގައި ބުނެފައިވަނީ، މެދުއިރުމަތީގައި މިހާރު ހިނގަމުންދާ ކަންތައްތަކާ ގުޅިގެން ވައިގެ ސަރަހައްދުތައް ބަންދުކުރުމާއި، ބައިނަލްއަގުވާމީ ފްލައިޓްތަކުގެ ޝެޑިއުލްތަކަށް ބޮޑެތި ބަދަލުތަކެއް އައިސްފައިވާ ކަމަށެވެ. މީގެ ތެރޭގައި ފްލައިޓްތައް ލަސްވުމާއި، ކެންސަލްވުމުގެ އިތުރުން ދަތުރުކުރާ މަގުތައް ބަދަލުކުރުން ހިމެނޭ ކަމަށް އެ އިދާރާއިން ފާހަގަކޮށްފައިވެއެވެ.

މީގެ އިތުރުން، ދަތުރުކުރާ މަގުގައި މެދުއިރުމަތީގެ ގައުމެއްގައި މަޑުކުރަން ނުޖެހުނު ކަމުގައިވިޔަސް، މި ހަމަނުޖެހުންތަކުގެ ސަބަބުން ދަތުރުފަތުރުގެ ރޭވުންތަކަށް ބުރޫއަރާފާނެ ކަމަށް އެފް.ސީ.ޑީ.އޯ އިން ބުނެއެވެ. މީގެ ތެރޭގައި ރާއްޖެއަށް ކުރާ ދަތުރުތަކާއި ރާއްޖެއިން ފުރުމަށް ކުރާ ދަތުރުތައް ވެސް ހިމެނެއެވެ.

އެހެންކަމުން، އިނގިރޭސި ރައްޔިތުން ދަތުރު ފެށުމުގެ ކުރިން އެއާލައިންތަކުން ނުވަތަ ޓުއާ އޮޕަރޭޓަރުންގެ އަތުން އެންމެ ފަހުގެ މައުލޫމާތު ހޯދުމަށް އެފް.ސީ.ޑީ.އޯ އިން ވަނީ އިރުޝާދު ދީފައެވެ.

އެފް.ސީ.ޑީ.އޯ އިން އިތުރަށް ބުނެފައިވަނީ، އިނގިރޭސި ރައްޔިތުން އެމީހުންގެ ޓްރެވަލް އިންޝުއަރެންސް ޕޮލިސީތައް އަލުން ބަލައި، ކަވަރުކޮށްދޭ ކަންތައްތައް ކަށަވަރުކުރަން ޖެހޭ ކަމަށެވެ. އަދި ދުނިޔޭގެ އަދި ސަރަހައްދީ ޚަބަރުތައް ބަލަމުން ގެންދިއުމަށާއި، އެފް.ސީ.ޑީ.އޯ ގެ ދަތުރުފަތުރުގެ އިރުޝާދުތައް އީމެއިލް މެދުވެރިކޮށް ލިބޭނެ ގޮތް ހެދުމަށް ވެސް ވަނީ އެދިފައެވެ.

މެދުއިރުމަތީގެ ވައިގެ ސަރަހައްދު ހުރަސްކޮށް ދަތުރުކުރާ ގިނަ އަދަދެއްގެ ފްލައިޓްތައް މިހާރު ވަނީ ކެންސަލްކޮށް، މަގު ބަދަލުކޮށް ނުވަތަ ވަރަށް ބޮޑަށް ލަސްކޮށްފައެވެ. މީގެ ސަބަބުން ރާއްޖެއާ ގުޅޭ ފްލައިޓްތަކަށް ބޮޑެތި އަސަރުތަކެއް ކޮށްފާނެ ކަމަށް ރިޕޯޓްތައް ބުނެއެވެ.

މިވަގުތު ރާއްޖޭގައި ތިބި އިނގިރޭސި ރައްޔިތުން އެންމެ ފަހުގެ މައުލޫމާތު ހޯދުމަށް އެމީހަކު ދަތުރުކުރާ އެއާލައިނަކާ ސީދާ ގުޅުމަށް ވެސް ވަނީ އަންގާފައެވެ.

މި ބަދަލުތައް އައިސްފައި މިވަނީ، ގަލްފް ސަރަހައްދުގައި އުފެދިފައިވާ ކްރައިސިސް ނުވަތަ ކުއްލި ނުރައްކަލުގެ ހާލަތާ ގުޅިގެން، އިނގިރޭސިވިލާތުގެ ކުންފުންޏަކުން ކުއްޔަށްދޭ ޕްރައިވެޓް ޖެޓްތަކަށް އޮތް ޑިމާންޑް 300 އިންސައްތައަށް އުފުލިފައިވާ ދަނޑިވަޅެއްގައެވެ. މެދުއިރުމަތީގައި ތާށިވެފައި ތިބި އެތައް ހާސް ބަޔަކު އެ ސަރަހައްދުން ބޭރުވާނެ ގޮތެއް ހޯދުމަށް މަސައްކަތް ކުރަމުންދާއިރު، ލިބެން ހުރި ފްލައިޓްތަކަށްވުރެ އެދޭ މީހުންގެ އަދަދު ވަނީ އެތައް ގުނައަކަށް އިތުރުވެފައެވެ.

އިނގިރޭސިވިލާތުގެ ބައިނަލްއަގުވާމީ ކުންފުންޏެއް ކަމަށްވާ އެއާ ޗާޓާ ސާވިސްގެ ޑައިރެކްޓަރު އޮފް އޭވިއޭޝަން ސާވިސަސް، މެޓް ޕާޓަން ބުނި ގޮތުގައި، އަހަރުގެ މި ދުވަސްވަރާ އަޅާބަލާއިރު ޕްރައިވެޓް ޖެޓްތަކަށް އެދޭ މިންވަރު ވަނީ 200 އިންސައްތަ އާއި 300 އިންސައްތައާ ދެމެދުގެ މިންވަރަކަށް އިތުރުވެފައެވެ.

"އަހަރެމެންނަށް މިހާރު މިދަނީ ވަރަށް ބޮޑު ޑިމާންޑެއް ލިބެމުން،" އޭނާ ބުންޏެވެ. "ދުބާއީގައި ތާށިވެފައި ތިބި ހަނީމޫން ދަތުރުވެރިންނާއި، އެނބުރި ގައުމަށް ދިއުމަށްޓަކައި ގްރޫޕް ހަދައިގެން ބޯޓެއް ކުއްޔަށް ހިފަން ބޭނުންވާ ފަތުރުވެރިންގެ އިތުރުން، ބޮޑެތި ކުންފުނިތަކާއި މުއްސަނދިންގެ ފަރާތުން ވެސް ފޯނު ކޯލްތައް ލިބެމުންދޭ. ހަނގުރާމައެއް ފެށުމުން މިލިއަނަރުންނާއި ބިލިއަނަރުންގެ މެދުގައި އެއްވެސް ތަފާތެއް ނޯވޭ."