ރާއްޖޭގައި ތާށިވި ފަތުރުވެރިންނަށް ރަޖާ ދީފައި "މިއީ ކަލޭމެންނަށް ކޮށްދެވޭނެ ވަރޭ" ބުނުމަކީ ރާއްޖޭގެ މޫނުމަތީގައި ޖެހޭ ލައްގަނޑެއް: ފަލާހު

މެދުއިރުމަތީގައި ހިނގަމުންދާ ހަމަނުޖެހުމާއި ގުޅިގެން ރާއްޖެގައި ތާށިވި ފަތުރުވެރިންނަށް ރައީސް އުފެއްދެވި ކޮމިޓީގައި ހިމެނޭ މިނިސްޓަރަކު 2000 ރަޖާ ދީފައި "މިއީ ކަލޭމެންނަށް ކޮށްދެވޭނެ ވަރޭ" ބުނުމަކީ ރާއްޖޭގެ މޫނުމަތީގައި ޖެހޭ ލައްގަނޑެއް ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ފަލާހު ވިދާޅުވީ ރާއްޖޭގެ އިޤްތިޞާދު ބަރޯސާވެފައި އޮންނަނީ ޓުއަރިޒަމްގެ މައްޗަށް ކަމަށާއި ރާއްޖެއަށް ޔޫރަޕުން އަންނަ ގާތްގަނޑަކަށް 90 ޕަސެންޓް ގެސްޓުން ދަތުރުކުރާ ރޫޓަކީ މެދުއިރުމަތީގެ ޤަތަރާއި ބަހުރައިނާއި ޔޫއޭއީއާ ފަދަ ގައުމުތަކުގެ އެއަރޕޯޓް މެދުވެރިކޮށް ޓްރާންސިޓް ޕަސެންޖަރުންގެ ގޮތުގައި ކަމަށެވެ.

އަދި ހޮނިހިރު ދުވަހު ހަނގުރާމަ ފެށި ވަގުތާ ދިމާކޮށް އެމިރޭޓްސް، އަބޫދާބީ، ދުބާއީ ނޫނީ ގަތަރު މި ބޯޓުތަކުން، އަލުން އަނބުރާ ގައުމަށް ދާންވެގެން އައި އެތައް ބަޔަކު އެއަރޕޯޓްގައި ތާށިވެފައި އެބަ ތިބި ކަމަށާއި، ފެނުނީ ސަރުކާރުގެ އަޅާލުން ވަރަށް ކުޑަކަން ކަމަށް ފަލާހު ވިދާޅުވި އެވެ.

އަޅުގަނޑުމެންނަށް ފެނުނީ އަޅުގަނޑުމެންގެ ސަރުކާރުގެ އަޅާލުން ވަރަށް ކުޑަ ކަމަށް. އަޅުގަނޑަށް ފެނުނު ދެ ތިން ފޮޓޯއަކުން ފެނުނު، މިއަދުގެ ޓުއަރިޒަމް މިނިސްޓަރު ވަޑައިގެން އެ ބޭފުޅުންނާ ބަދަލުކޮށް ވާހަކަދައްކާ އެ ބޭފުޅުން ތިބޭނެ ތަނެއްގެ ގޮތުގައި ކުރީގައި ބޭނުންކުރި ޓާމިނަލް ދީފައި 2000 އެއްހާ ރަޖާ އެ ބޭފުޅުންނަށް ބަހާލިއޭ ބުނާ އަޑު އަޅުގަނޑު އެހިން. އަޅުގަނޑު ހިތަށްއަރަނީ އަޅުގަނޑުމެންގެ އެންމެ ވަރުގަދަ ޓުއަރިޒަމެއް މިގޮތަށް އޮތްއިރު އަޅުގަނޑުމެންގެ ސަރުކާރުން، ސަރުކާރަށް ޓުއަރިޒަމުން މިވާ ބޮޑު ފައިދާ އިންކަމް ޓެކްސުން ވަންނަމުން ދާއިރު ހާލަތެއް ދިމާވީމަ، މިކަހަލަ އެމެޖެންސީ ހާލަތެއް ދިމާވީމާ ޢަމަލުކުރަންޖެހޭ ގޮތަކީ މިއީ ބާއޭ. މިއަށްވުރެ ރަނގަޅުވާންޖެހޭނެ ކަމަށް އަޅުގަނޑު ގަބޫލުކުރަނީ. 

މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު

ފަލާހު ވިދާޅުވީ އެ މީހުންނަށް ރަނގަޅު ފެސިލިޓީ ފޯރުކޮށްދޭންޖެހޭނެ ކަމަށާއި ރަޖައެއް ދީފައި ބިންމަތީގައި އާދައިގެ ދުއިސައްތަ ރުފިޔާއަށް ދޭ ގޮދަޑިއެށް އަޅައިލާފައި މިތާ ނިދާށޭ ބުނީމާ ލަގްޒަރީ ޓޫރިޒަމަށް ވަރަށް ބޮޑެތި ހުތުރު ލިބިގެންދާނެ ކަމަށެވެ.

ރައީސުލްޖުމްހޫރިއްޔާ ވަރަށް އަވަސް ހާލަތެއްގައި މިނިސްޓަރުންގެ ތެރެއިން ކޮމިޓީއެއް އުފައްދަވައިފި. މިނިސްޓަރުންގެ ކެބިނެޓް މީޓީންގ ވެސް ހަމަ އެއީ ކޮމިޓީއެއް ނޫންތޯ. ކޮންމެހެންވެސް ކޮމިޓީއެއް ނަންގަވާ ރައީސުލްޖުމްހޫރިއްޔާ ހިމެނިވަޑައިނުގަންނަވާ ގޮތަށް ފޮރިން މިނިސްޓަރު އޭގެ ޗެއަރކުރައްވާ ގޮތަށް ލައްވާފަ ބޮޑު ކޮމިޓީއެއް އެކުލަވާލާފަ. ކޮމިޓީގައި ހިމެނިވަޑައިގަންނަވާ މިނިސްޓަރު ގޮސް ކުރެއްވި ކަމެއްގެ ވާހަކަ މި ދައްކަނީ، ދެހާހެއްހާ ރަޖާ ބަހާލާ ކަލޭމެން މިތާ ތިބޭށޭ. މިއީ އޭ ކަލޭމެންގެ ހާލަތަކީއޭ. މިއޭ ކަލޭމެންނަށް ދެވެން އޮތް އެހީއަކީއޭ. މިއަށްވުރެ ރަނގަޅުވާންޖެހޭ. އަޅުގަނޑުމެންނަށް ވަރަށް ލަދުވެތިކަމެއް. އެކަހަލަ ކަންކަން ރަނގަޅު ކުރެވެންޖެހޭނެ އަޅުގަނޑުމެންނަށް. އެއީ ދިވެހިރާއްޖޭގެ މޫނުމަތީގައި ޖެހޭވަރަށްވުރުގަދަ ލައްގަނޑެއް، ތަފާއްޔެއް އެއީ.

މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު

ފަލާހު ވިދާޅުވީ ބޮޑު ކޮމިޓީއެއް ހަދާފައި ރައީސުލްޖުމްހޫރިއްޔާ ދޫކޮށްލި އިރު ވެސް ސަތޭކަ ފަންސާހެއްހާ ތެޔޮޓޭންކަރު ކަނޑުއޮޅީގައި ތާށިވެގެން އުޅޭ އިރު އެއިން އެންމެ ބޮޑު އެއް އަސަރެއް ކުރާނެ ގައުމަކަށް ވާނެ ރާއްޖެ ކަމަށެވެ. ރާއްޖެއަކީ ދުނިޔޭގެ އެތަންމިތަނުން ހުރިހާ ބާވަތެއް އިމްޕޯޓުކޮށްގެން ދިރިއުޅޭ ބައެއް ކަމަށާއި ޓޫތުޕިކަކަށް ދާންދެން ވެސް އިމްޕޯޓުކޮށްގެން އުޅެންޖެހޭ ކަމަށެވެ.

އަދި ދެ ދުވަސް ވީއިރުގައި އެ ކޮމިޓީން ރާއްޖޭގެ ރައްޔިތުންނަކަށް އެއްވެސް ކަހަލަ ވާހަކައެއް ނުދައްކާ ތިމަންނާމެން ކަންކުރާނީ މިވެނި ގޮތަކަށޭ  ވިދާޅުވީމާ ތެދެއް ހެދިޔަސް އެއީ ރަނގަޅު ވާހަކައެއް ބާވައޭ ސުވާލު އުފެދޭނެ ކަމަށެވެ. އެއީ ވޭތުވެދިޔަ ދެ އަހަރެއްހާ ދުވަހު މިދިޔައީ ރާއްޖޭގެ ރައްޔިތުންނަށް ފެށުނީއްސުރެ ކެނޑިނޭޅި މުޠުލަގަށް ބޮޑެތި ދޮގުހަދަމުން މިއަދުގެ ސަރުކާރުން ބޭބޭފުޅުން ވަޑައިގަންނަވާތީ ކަމަށް ފަލާހު ވިދާޅުވި އެވެ.