ފެބްރުއަރީ ކުރީކޮޅު 125،202 ފަތުރުވެރިން ރާއްޖެއަށް ޒިޔާރަތްކޮށްފި
ޗައިނާގެ އާ އަހަރާއި ޔޫރަޕްގެ ފިނި މޫސުމުގެ ބަންދާ ދިމާކޮށް، ފެބްރުއަރީ މަހުގެ ކުރީކޮޅު ރާއްޖެއަށް އައި ފަތުރުވެރިންގެ އަދަދު ވަނީ ވަރަށް ބޮޑަށް އިތުރުވެފައި. މި މުއްދަތުގައި އެންމެ ގިނަ ފަތުރުވެރިން އައިސްފައިވަނީ ޗައިނާ، ރަޝިއާ، އިޓަލީ، އިނގިރޭސިވިލާތް އަދި ޖަރުމަނުވިލާތުން. ފަތުރުވެރިކަމުގެ މާކެޓުގެ ބޮޑުބައެއް ރިސޯޓުތަކުން ހިއްސާކުރި ނަމަވެސް، ގެސްޓްހައުސްތަކަށް އޮތް ޑިމާންޑް ވެސް ވަނީ މި ދުވަސްވަރު ވަރުގަދަވެފައި.
ހެލްސިއޯން މޯލްޑިވްސް ރިސޯޓު ތަރައްގީކޮށްފައި ވަނީ ގއ. މޭރަދޫގައި. | ޕޮސްޓާ މެގަޒިން
މި އަހަރުގެ ފެބްރުއަރީ މަހުގެ ފުރަތަމަ ދެ ހަފުތާގެ ތެރޭގައި ރާއްޖެއަށް 125,202 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ އެ މުއްދަތާ އަޅާބަލާއިރު 13.4 އިންސައްތައިގެ ކުރިއެރުމެއް ކަމަށް ތަފާސް ހިސާބުތަކުން ދައްކައިފި އެވެ.
ޖެނުއަރީ މަހުގެ ތަފާސްހިސާބުތަކާއެކު، 2026 ވަނަ އަހަރުގެ މިހާތަނަށް ރާއްޖެއަށް ޖުމްލަ 349,990 ފަތުރުވެރިން ޒިޔާރަތްކޮށްފައިވާ އިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 7.6 އިންސައްތައިގެ އިތުރުވުމެކެވެ.
ޗައިނާއަކީ މި އަހަރު ރާއްޖެއަށް އެންމެ ގިނައިން ފަތުރުވެރިން އަންނަ ގައުމަށް ވާއިރު، ފެބްރުއަރީ މަހުގެ މެދާ ހަމައަށް އެ ގައުމުން 49,704 ފަތުރުވެރިން ވަނީ ޒިޔާރަތްކޮށްފައެވެ. މިއީ ރާއްޖެއަށް އައި ޖުމްލަ ފަތުރުވެރިންގެ 14.2 އިންސައްތައެވެ. ޗައިނާގެ އިތުރުން މި މުއްދަތުގައި އެންމެ ގިނަ ފަތުރުވެރިން އައިސްފައިވަނީ، ރަޝިއާ، އިޓަލީ، އިނގިރޭސިވިލާތް އަދި ޖަރުމަނުވިލާތުންނެވެ.
މި މަހުގެ ފުރަތަމަ ދެ ހަފުތާގައި ދުވާލަކު ރާއްޖެއަށް އަންނަ ފަތުރުވެރިންގެ އަދަދު ހުރީ ގާތްގަނޑަކަށް އެއްވަރެއްގައި ހިފެހެއްޓިފައެވެ. އެގޮތުން ގިނަ ދުވަސްތަކުގައި 7,800 އާއި 10,000 އާ ދެމެދުގެ އަދަދަކަށް ފަތުރުވެރިން އައިސްފައިވާއިރު، އެންމެ ގިނައިން ފަތުރުވެރިން އައި ދުވަސްތަކުގައި އެ އަދަދު ވަނީ 11,000 އަށްވުރެ މައްޗަށް އަރާފައެވެ.
މި މުއްދަތުގައި ރާއްޖެއަށް އައި ފަތުރުވެރިންގެ 68.1 އިންސައްތަ ހިއްސާކުރަނީ ރިސޯޓުތަކުންނެވެ. އަދި ގެސްޓްހައުސްތަކުން 26.9 އިންސައްތަ ހިއްސާކުރެއެވެ.
