ސަރުކާރުން 10 ރިސޯޓު ހަދަން 1 ބިލިއަން ޑޮލަރު ބޭނުންވާނެ، ލޯނު ދައްކަން 100 މިލިއަން ޑޮލަރު ނުލިބުނު ބަޔަކަށް އެކަމެއް ނުވާނެ: ބޮންޑެ
ސަރުކާރުން 10 ރިސޯޓު ތަރައްގީކޮށް ރައްޔިތުންނަށް ހިއްސާ ދިނުމަށް ވެފައިވާ ވައުދަކީ އިންތިޚާބާ ދިމާކޮށް އޮޅުވާލުމަށް ދައްކާ ހަގީގަތެއް ނެތް ވާހަކަތަކެއް ކަމަށް ކުރީގެ މެންބަރު އިބްރާހީމް ރަޝީދު (ބޮންޑެ) ވިދާޅުވި. މި މަޝްރޫއަށް ޑޮލަރު ހޯދޭނެ ގޮތެއް ސާފުނުވާކަން ފާހަގަކުރައްވައި، މިއީ މީގެ ކުރިން ވެސް ކުރިއަށް ގެންދަން މަސައްކަތް ކޮށް، ފެއިލްވެފައިވާ މޮޑެލްއެއް ކަމަށް އޭނާ ސިފަކުރެއްވި.
ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެމްބަރު އިބުރާހިމް ރަޝީދު( ބޮންޑޭ) | ރާއްޖެއެމްވީ
ސަރުކާރުން 10 ރިސޯޓު ހަދަން 1 ބިލިއަން ޑޮލަރު ބޭނުންވާނެ ކަމަށާއި ލޯނު ދައްކަން 100 މިލިއަން ޑޮލަރު ނުލިބުނު ބަޔަކަށް އެކަން ނުވާނެ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާ ގެ ކުރީ ގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަަވަމުންނެވެ.
މި އަހަރުގެ ރިޔާސީ ބަޔާނުގައި ރައީސް ޑރ.މުހައްމަދު މުއިއްޒު ވަނީ ކުރިއަށް އޮތް ތިން އަހަރު ތެރޭ މަދުވެގެން 10 ރިސޯޓް ސަރުކާރުން ތަރައްގީ ކުރާނެ ކަމަށާއި ދިވެހި ކޮންމެ ރައްޔިތަކު ހިއްސާދާރަކަށް ހަދާނެ ކަމަށް ވިދާޅުވެފަ އެވެ. އަދި އެ ރިސޯޓުތައް ޤާއިމް ކުރުމަށް ފަހު ބޭރު ފައިސާ ރައްޔިތުންގެ އެކައުންޓަށް ޖަމާ ކުރަން ފައްޓަވާނެ ކަމަށް, ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.
އެކަމަށް އިޝާރާތް ކުރައްވާ ބޮންޑެ ވިދާޅުވީ އިންތިޚާބާއި ދިމާކޮށް ދޮގު ވިއްކުމަކީ ކުރެވިދާނެ ކަމެއް ކަމަށެވެ. މިއީ މީގެ ކުރިން ވެސް ވެރިކަން ކުރާ ޕީއެންސީ އިން ގެންގުޅެފައިވާ އުކުޅެއް ކަމަށް އޭނާ ވަނީ ވިދާޅުވެފަ އެވެ.
"އާދައިގެ މި ހަދާ ކޮންސްޓްރަކްޝަން ހަދައިފި ނަމަ ކޮންމެ ރަށަކަށް 100 މިލިއަން ޑޮލަރު ދާނެ. އޭގެ މާނަ އަކީ 1 ބިލިއަން ޑޮލަރު ބޭނުން ވާނެ. 1 ބިލިއަން ޑޮލަރު ކިހިނެތްތޯ ދައްކާނީ މި އުޅެނީ 100 މިލިއަން ޑޮލަރު ދަރަނި ދައްކަން ނުލިބިގެން." ބޮންޑެ ވިދާޅުވި އެވެ.
އެ ތަނުގައި އިންވެސްޓްކުރަނީ ކޮން ބައެއްތޯ ސަރުކާރުން ސާފުކޮށްދީފައި ނުވާތީ އެ މަސައްކަތް ސީރިއަސް ސިފައެއްގައި ކުރިއަށް ގޮސްދާނެ ކަމާއި މެދު ސުވާލު އުފެދޭ ކަމަށް އޭނާ ވިދާޅުވި އެވެ. މީގެ އިތުރުން، ބޮޑު ޚަރަދެއް ނުކޮށް ރަނގަޅު ފެންވަރުގެ ރިސޯޓްތަކެއް ނުހެދޭނެ ކަމަށާއި ސަރުކާރުން ދައްކާ ވާހަކަ އަކީ ހަމަޖެހޭ ވާހަކަ އެއް ނޫން ކަމަށް ބޮންޑެ ވިދާޅުވި އެވެ.
ރައީސް މުއިއްޒު ވިދާޅުވާ ފަދައިން ރިސޯޓް މަޝްރޫއުގެ ދަށުން ތަރައްގީ ކުރާ ރިސޯޓުތަކުން ލިބޭ ފައިސާ ދިވެހި އައިޑީ ކާޑު އޮތް ކޮންމެ ދިވެއްސަކަށް ލިބޭނެ ކަމަށް ސަރުކާރުން ބުނި ނަމަވެސް އެކަން ކުރެވޭނެ މަގެއް ސަރުކާރަށް ނުދެއްކޭ ކަމަށް ބޮންޑެ ވިދާޅުވި އެވެ. މި އިންވެސްޓްމެންޓުން ލިބޭ ފައިދާ 2030އިން ފެށިގެން ޖަމާ ކުރެވޭނެ ކަމަށް ބުނެފައިވެ އެވެ. އެހެން ނަމަވެސް ބޮންޑެ ވިދާޅުވީ އެފަދަ ކަމަކުން ކިރިޔާ ވެސް ފައިސާ އެއް ލިބޭ މިންވަރު ވާނީ 2050ގެ ނިޔަލަށް ކަމަށެވެ.
މީގެ ކުރިން ވެސް ސަރުކާރުތަކުން ފަތުރުވެރިކަމަށް ވަންނަން މަސައްކަތް ކުރި ކަމަށާއި އެކަމުގެ ނަތީޖާ ރަނގަޅު ނޫން ކަމަށް އޭނާ ވިދާޅުވި އެވެ. ބޮންޑެ ވަނީ ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި ޓޫރިޒަމްގެ ވިޔަފާރި ކުރުމަށް އުފެއްދެވި, މޯލްޑިވްސް ޓޫރިޒަމް ޑިވޮލޮޕްމަންޓް ކޯޕަރޭޝަން (އެމްޓީޑީސީ) މެދުވެރިކޮށް ފަތުރުވެރިކަމުގެ ދާއިރާ އަށް ސަރުކާރުން ވަންނަން މަސައްކަތް ކުރި ކަމަށް ފާހަގަކުރައްވާފަ އެވެ. އަދި އާއްމުންނަށް ހިއްސާ ވިއްކައިގެން ހިންގަން ފެއްޓެވި އެ ކުންފުނިން އާއްމުންނަށް ލިބުނު ފައިދާ އެއް ނެތް ކަމަށާއި، މިހާރު ރައީސް މުއިއްޒު އެ ފާހަގަކުރައްވާ މޮޑެލް އަކީ ވެސް އެފަދަ ފެއިލްވެފައިވާ މޮޑެލް އެއް ކަމަށް ބޮންޑެ ވިދާޅުވި އެވެ.
މިއީ ރައްޔިތުންނަށް އޮޅުވާލުން ކަމަށް ވެސް އޭނާ ވިދާޅުވި އެވެ. އެ ވާހަކަތަކަކީ ހުވަފެނެއް ކަހަލަ ކަމެއް ކަމަށް ވެސް ބޮންޑެ ވިދާޅުވި އެވެ.
