ފަހު ވަގުތު ޕެލަސް ބަލިކޮށް، ޔުނައިޓެޑު ތިން ވަނަ އަށް

އިނގިރޭސި ޕްރިމިއަރ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ލީގު ތާވަލްގެ ތިން ވަނަ މަގާމަށް ޖެހިލައިފި އެވެ. 

ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ޕެލަސް އިން ލަނޑު ޖަހައި ކުރި ހޯދާފައި ވަނިކޮށް، ޔުނައިޓެޑުން ވަނީ ފަަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ހަތަރު ވަނަ މިނެޓުގައި ޕެލަސް އިން ވަނީ ޔުނައިޓެޑް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ޕެލަސް އަށް ޖަހައިދިނީ މަކްސެން ލަކުއާ އެވެ. މެޗުގެ ފުރަތަމަ ހާާފުގައި ލަނޑު ޖަހައި ނަތީޖާ ހަމަހަމަ ކުރުމަށް ޔުނައިޓެޑުން މަސައްކަތް ކުރި ނަމަވެސް، އެކަން ކާމިޔާބެއް ނުވި އެވެ. 

މެޗުގެ ދެ ވަނަ ހާފުގެ 57 ވަނަ މިނެޓުގައި ޔުނައިޓެޑަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ ބްރޫނޯ ފެނާންޑޭސް އެވެ. އޭގެ ފަހުން މެޗުގެ 65 ވަނަ މިނެޓުގައި ބެންޖަމިން ސެސްކޯ ވަނީ ޔުނައިޓެޑުގެ ދެ ވަނަ ލަނޑު ޖަހައި، މެޗުން އެ ޓީމު މޮޅު ކޮށްދީފަ އެވެ. 

މޮޅާއެކު ޔުނައިޓެޑުން ވަނީ ލީގު ތާވަލްގެ ތިން ވަނަ މަގާމަށް ޖެހިލައިފަ އެވެ. އެގޮތުން މިހާތަނަށް ލީގުގައި ކުޅެފައިވާ 28 މެޗުން ޔުނައިޓެޑަށް ލިބެނީ 51 ޕޮއިންޓެވެ.