އިޒްރޭލްގެ ޖާސޫސީ އިދާރާގެ މައި މަރުކަޒަށް އީރާން އިން ޑްރޯން ހަމަލާ ތަކެއް ދީފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ އަށް ރައްދު ދިނުމުގެ ގޮތުން، އިޒްރޭލްގެ ޖާސޫސީ އިދާރާގެ މައި މަރުކަޒަށް ޑްރޯން ހަމަލާ ތަކެއް ދީފައިވާ ކަމަށް އީރާން އިން ބުނެފި އެވެ. 

އީރާންގެ އަސްކަރިއްޔާ އިން ބުނެފައ ވަނީ އިޒްރޭލްގެ ޖާސޫސީ އިދާރާ، ޝިން ބެޓްގެ މައި މަރުކަޒާއި، އެ ޤައުމުގެ ވައިގެ ސިފައިންގެ ދެ މަރުކަޒަކަށް އަމާޒުކޮށް ޑްރޯން ހަމަލާ ތަކެއް ދީފައިވާ ކަމަށެވެ. މި ހަމަލާތައް އީރާން އިން ދީފައި ވަނީ އިޒްރޭލްގެ ވެރި ރަށް ތެލް އަވީވްގައި ހުންނަ ޖާސޫސީ އިދާރާގެ މަރުކަޒު އަދި އެ ޤައުމުގެ ދެކުނާއި ހުޅަނގުގެ ސަރަހައްދު ތަކަށެވެ. 

އީރާންގެ ރަސްމީ ނޫސް އެޖެންސީ ކަމަށްވާ އިރްނާ އިން ރިޕޯޓު ކޮށްފައިވާ ގޮތުގައި، މި ހަމަލާ ތަކުގައި އަމާޒު ކޮށްފައި ވަނީ މެޑިޓެރޭނިއަން ކަނޑުގެ އައްސޭރިފަށުގައި އޮންނަ ޔަވްނޭ ސިޓީގެ ހުޅަނގުގައި ހުންނަ ޕްލްމާކިމް އެއަރބޭސް އަށެވެ. މީގެ އިތުރުން އިޒްރޭލްގެ ދެކުނުގައި އޮންނަ އޮވްދާ އެއަރބޭސް އަށް ވެސް އީރާން އިން ޑްރޯން ތަކުން ހަމަލާ ދީފައިވާ ކަމަށް އެ ޤައުމުގެ އަސްކަރިއްޔާ އިން ވަނީ ކަށަވަރު ކޮށްދީފަ އެވެ. 

އީރާން އިން ބުނެފައި ވަނީ އިޒްރޭލްގެ ވެރި ރަށް، ތެލް އަވީވްގައި ހުންނަ އެ ޤައުމުގެ ދާޚިލީ ސަލާމަތާ ބެހޭ ޖަސޫސީ އިދާރާ، ޝިން ބެޓްގެ މައި މަރުކަޒަށް ދިން ހަމަލާ އަކީ އީރާންގެ އަސްކަރީ ޤާބިލުކަން ދައްކާލުމުގެ ގޮތުން ދިން ވަރުގަދަ ހަމަލާއެއް ކަމަަށެވެ. މި ހަމަލާ ތަކުގައި އިޒްރޭލްގެ އަސްކަރީ މަރުކަޒު ތަކަށް ލިބުނު ގެއްލުން ތަކުގެ ތަފްސީލެއް މިހާތަނަށް އެ ޤައުމުން ހާމަ ކޮށްފައި ނުވެ އެވެ. 

މި ހަމަލަ ތަކަކީ ސަރަހައްދީ މަސްލަހަތު ގޯސްވެފައިވާ ދަނޑިވަޅެއްގައި އީރާން އިން ދިން ހަމަލާ ތަކެކެވެ. އީރާންގެ އަސްކަރިއްޔާ އިން ބުނާ ގޮތުގައި މި ހަމަލާ ތަކުގައި ބޭނުން ކޮށްފައި ވަނީ އަމިއްލަ އަށް ގޮވާ ގޮތަށް ފަރުމާ ކޮށްފައިވާ ޒަމާނީ ޑްރޯން ތަކެކެވެ. އިޒްރޭލްގެ ވައިގެ ދިފާއީ ނިޒާމު ތަކުން ބައެއް ޑްރޯންތައް ވައްޓާލާފައިވާ ކަމަށް ރިޕޯޓުތައް ބުނި ނަމަވެސް، އީރާން އިން ބުނަނީ ކަނޑައެޅިފައިވާ އަމާޒު ތަކަށް ހަމަލާ އަރާފައިވާ ކަމަށެވެ.