ހަނގުރާމަ ހުއްޓާލުމަށް އީރާންގެ ރައީސް ހުށަހެޅުއްވީ ތިން ޝަރުތެއް

އެމެރިކާ އާއި އިޒްރޭލް އިން އީރާން އަށް ހަމަލާ ދިނުމުގެ ސަބަބުން، މިހާރު ކުރިއަށް ދާ ހަނގުރާމަ ހުއްޓާލާނީ ތިން ޝަރުތެއް ފުރިހަމަ ވެގެން ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އީރާންގެ ރައީސް ޕެޒެޝްކިއާން މިކަން ހާމަ ކުރައްވާފައި ވަނީ އެމަނިކުފާނުގެ ސޯޝަލް މީޑިއާގައި ކުރެއްވި ޕޯސްޓެއްގަ އެވެ. އެގޮތުން އެންމެ ފުރަތަމަ ޝަރުތެއްގެ ގޮތުގައި އީރާންގެ ރައީސް ޕެޒެޝްކިއާން ވިދާޅުވެފައި ވަނީ، އީރާންގެ އުނި ނުކުރެވޭނެ ހައްގުތައް ބައިނަލްއަޤުވާމީ މުޖުތަމައުން ބަަލައި ގަަންނަން ޖެހޭނެ ކަމަށެވެ. 

ދެ ވަނަ ޝަރުތެއްގެ ގޮތުގައި ޕެޒެޝްކިއާން ފާހަގަ ކުރައްވާފައި ވަނީ، އީރާން އަށް ލިބިފައިވާ ގެއްލުން ތަކުގެ ބަދަލު ނުވަތަ، ރެޕަރޭޝަންސް ދޭން ޖެހޭނެ ކަމަށެވެ. އަދި ތިން ވަނަ ޝަރުތަކީ، އީރާންއާ ދެކޮޅަށް ކުރިއަށް ގެންދާ އުދުވާނީ އަމަލުތައް ތަކުރާރުވިޔަ ނުދިނުމަށްޓަކައި ބައިނަލްއަޤުވާމީ ފެންވަރުގައި ވަރުގަދަ ފިޔަވަޅު ތަކެއް، ނުވަތަ ވައުދު ތަކެއް ކަނޑައެޅުން ކަމަށް ޕެޒެޝްކިއާން ވަނީ ވިދާޅުވެފަ އެވެ. 

ހަނގުރާމަ ހުއްޓާލުމަށް އީރާން އިން ތިން ޝަރުތެއް ހުށަހަޅާފައިވާއިރު، މި ތިން ޝަރުތަކީ ވެސް ސަރަހައްދީ ހަމަޖެހުން ޤާއިމު ކުރުމަށް ބޭނުންތެރި ކަންތައްތަކެއް ކަމަށް އީރާންގެ ސަރުކާރުން ޤަބޫލު ކުރެ އެވެ. 

އީރާންގެ ރައީސް ޕެޒެޝްކިއާން މިހެން ވިދާޅުވެފައިވާއިރު، މި ވަގުތަކީ މި ހަނގުރާމައިގެ ސަބަބުން މެދު އިރުމަތީގެ އިތުރުން، މުޅި ދުނިޔެ އަށް ވެސް ނުތަނަވަސްކަން ކުރިމަތިވެފައިވާ ވަގުތެކެވެ. މީގެ އިތުރުން އީރާން އިން ބުނަމުން އަންނަނީ، އެ ޤައުމުގެ އިސްތިޤުލާލަށް އުނިކަން އަންނަ ފަދަ އަމަލު ތަކެއް ހިންގަމުން އަންނަ ކަމަށެވެ.