ތެލުގެ އަގު ނުހައްގުން އުފުލާ ކުންފުނިތަކާ ދެކޮޅަށް ފިޔަވަޅު އަޅާނަން: ބޮޑު ވަޒީރު ސްޓާމަރ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން ދުނިޔޭގެ ތެލުގެ ބާޒާރަށް ބޮޑު ދަތި ކަމެއް ކުރިމަތިވެފައިވާއިރު، ނުހައްގު ގޮތުގައި ތެލުގެ އަގު އުފުލާ ކުންފުނިތަކާ ދެކޮޅަށް ފިޔަވަޅު އަޅުއްވާނެ ކަމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ ވިދާޅުވެއްޖެ އެވެ. 

އުތުރު އަޔަލެންޑް އަށް ކުރެއްވި ދަތުރުފުޅުގައި ބޮޑު ވަޒީރު ސްޓާމަރ ވިދާޅުވީ، ކުންފުނި ތަކުން ކަސްޓަމަރުންނަށް ޚިޔާނާތްތެރިވެ، ނުހައްގު ގޮތުގައި ހީޓިން އޮއިލްގެ އަގު ބޮޑު ކުރާ ނަމަ، ސަރުކަރުން ފިޔަވަޅު އެޅުމަށް ފަސް ނުޖެހޭނެ ކަމަށެވެ.  އުތުރު އަޔަލެންޑުގެ ގިނަ ގެ ތަކެއްގައި ހީޓިން އޮއިލް ބޭނުން ކުރާކަން ފާހަގަ ކުރައްވައި ބޮޑު ވަޒީރު ވިދާޅުވީ، އިންސާފުވެރި ގޮތެއްގައި އަގުތައް ހުންނަން ޖެހޭނެ ކަމަށެވެ. އެއާ އެކު ބޮޑު ވަޒީރު ވިދާޅުވީ، ރައްޔިތުންގެ ދިރިއުޅުމުގެ ޚަރަދު ގަސްދުގައި ބޮޑުވާ ގޮތަށް ކަންކަން ކުުރުމަކީ ބަލައި ގަނެވޭނެ ކަމެއް ނޫން ކަމަށެވެ. 

އުތުރު އަޔަލެންޑުގެ ގެތަކުގެ ތެރެއިން ދެބައި ކުޅަ ތިން ބައި ވަރަކަށް ހިސާބަކަށް ހަމަވާ ފަސްދޮޅަށް އިންސައްތަ ގެތަކުގައި ހީޓިންގ އޮއިލް ބޭނުން ކުރަމުން އަންނައިރު، މިއީ އިނގިރޭސިވިލާތުގައި އެންމެ ބޮޑު އިންސައްތަ އެވެ. އިންޑަސްޓްރީގެ މައުލޫމާތުތައް ދައްކާ ގޮތުގުގައި އެމެރިކާ އިން އީރާން އަށް ދިން ހަމަލާ އަށް ފަހު، އަގުތައް ވަނީ ދެ ގުނަ މައްޗަށް އުފުލިފަ އެވެ. 

ބޮޑު ވަޒީރު ސްޓާމަރ ވިދާޅުވީ، ކުންފުނި ތަކުން އެއްވެސް ސަބަބެއް ނެތި އަގުތައް އުފުލައިފި ނަމަ ސަރުކާރުން އެކަމާ ދެކޮޅަށް ފިޔަވަޅު އަޅުއްވާނެ ކަމަށެވެ. އިތުރަށް ބޮޑު ވަޒީރު ވިދާޅުވީ ބައިނަލްއަޤުވާމީ ގޮތުން ދިމާވެފައިވާ ޙާލަތާ ކުރިމަތިލާން ސަރުކާރުން މަސައްކަތް ކުރާއިރު، ރައްޔިތުންގެ ދިރިއުޅުމަށް ހަގީގީ އަސަރު ކުރާ ކަންކަން ކޮށްގެން ނުވާނެ ކަމަށެވެ. ޚާއްސަކޮށް ހަނގުރާމައިގެ ސަބަބުން މާލީ ގޮތުންް ދަތި ތަކެއް ކުރިމަތި ވާނެ ކަން އެނގިވަަޑައިގަންނަވާ ކަމަށް ވެސް ބޮޑު ވަޒީރު ވަނީ ވިދާޅުވެފަ އެވެ.