ސްޕެއިން އިން އިޒްރޭލް އަށް ކަނޑައަޅާފައި ހުންނެވި ސަފީރު ވަކި ކޮށްފި

ސްޕެއިންގެ ސަރުކާރުން އިޒްރޭލް އަށް ކަނޑައަޅާފައި ހުރި ސަފީރު ވަކި ކޮށްފައިވާ ކަމަށް، ސްޕެއިން އިން ހާމަ ކޮށްފި އެވެ.

ބުދަ ދުވަހު ސްޕެއިން އިން މިކަން ހާމަ ކޮށްފައިވާއިރު، މިއީ ސްޕެއިން އާއި އިޒްރޭލްއާ ދެމެދު އޮތް ގުޅުން ހީނަރުވެފައިވާ ވަގުތެއްގައި ސްޕެއިން އިން ނިންމާފައިވާ ނިންމުމެކެވެ. ޚާއްސަކޮށް އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ކުރަމުން އަންނައިރު، ސްޕެއިން އިން ވަނީ ފާޅުގައި އެކަމާ ދެކޮޅަށް ވާހަކަ ދައްކައިފަ އެވެ. 

ސްޕެއިންގެ ފޮރިން މިނިސްޓްރީގެ މަސްދަރަކުން ހާމަ ކޮށްފައިވާ ގޮތުގައި، އިޒްރޭލްގައި ހުންނަ ސްޕެއިންގެ އެމްބަސީގެ މަސައްކަތް ކުރިއަށް ގެންދާނީ ޗާޖް ޑިއެފެއާޒެއްގެ ބެލުމުގެ ދަށުންނެވެ. އެއީ ސަފީރުގެ މަޤާމަށް ވުރެ ދަށު ދަރަޖައިގެ ސިޔާސީ މަޤާމެކެވެ. 

ސްްޕެއިން އިން މި ނިންމުން ނިންމާފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް އާއި ސްޕެއިންއާ ދެމެދު ވެސް އޮތީ ނުތަނަވަސްކަން އުފެދިފަ އެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ކުރާ ހަނގުރާމަ ސްޕެއިން އިން ކުށްވެރި ކޮށްފައިވާއިރު، އެމެރިކާގެ ރައީސް ޓްރަމްޕް ވަނީ ސްޕެއިން އަށް ވަރަށް ބޮޑަށް ފާޑު ވިދާޅުވެފަ އެވެ. 

ސްޕެއިންގެ ފޮރިން މިނިސްޓަރު ހޯސޭ މެނުއެލް އަލްބާރޭސް އަންގާރަ ދުވަހު ނޫސްވެރިންނާ މައުލޫމާތު ދެއްވަމުން ވިދާޅުވީ، އެމެރިކާގެ ރައީސް ޓްރަމްޕްގެ ބިރު ދެއްކުންތަކާ ނުލައި، ސްޕެއިން އާއި އެމެރިކާގެ ގުޅުން އާންމު ގޮތެއްގައި ކުރިއަށްދާ ކަމަށެވެ. އޭނާ ވިދާޅުވީ އެމެރިކާާގައި ހުންނަ ސްޕެއިންގެ އެމްބަސީ އާއި، ސްޕެއިންގައި ހުންނަ އެމެރިކާގެ އެމްބަސީގެ މަސައްކަތްތައް ވެސް ކުރިއަށް ގެންދާ ކަމަށެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރާ ހަނގުރާމައިގައި، ސްޕެއިންގައި ހުންނަ އެމެރިކާގެ ބޭސްތައް ބޭނުން ކުރުމުގެ ހުއްދަ ނުދެއްވާނެ ކަމަށް ސްޕެއިންގެ ބޮޑު ވަޒިރު ޕެޑްރޯ ސަންޗޭޒް ވަނީ ތަކުރާރުކޮށް ވިދާޅުވެފަ އެވެ. އަދި އެމެރިކާ އާއި އިޒްރޭލް އިން ކުރިއަށް ގެންދަނީ ބައިނަލްއަޤުވާމީ ޤާނޫނާ ޚިލާފު އަމަލު ތަކެއް ކަމަށް ވެސް އޭނަ ވިދާޅުވެފައިވެ އެވެ.