އީރާންގެ ވެރިންނާއި ތަންތަން ހިމެނޭހެން، 19 އޮފިޝަލަކާ ދެކޮޅަށް އީޔޫ އިން އައު ފިޔަވަޅު ތަކެއް އަޅައިފި
އީޔޫގެ ޤައުމު ތަކުން އެއްބަސްވި ފިޔަވަޅުތައް އިއުލާން ކުރަމުން ކަލާސް ވިދާޅުވީ، އީރާންގެ ހަނގުރާމަ ކުރިއަށްދާއިރު އީޔޫ އިން އެ ޤައުމުގެ މަސްލަހަތުތައް ރައްކާތެރި ކުރާނެ ކަމަށާއި، ޤައުމީ ފެންވަރުގައި އީރާންގައި ދަތި ކުރުންތައް ގެންގުޅޭ ފަރާތްތަކުގެ ފަހަތުން ވެސް ދާނެ ކަމަށް.
އީޔޫގެ ޚާރިޖީ ސިޔާސަތާ ބެހޭ އިސްވެރިޔާ ކާޖާ ކަލާސް | ގެޓީ އިމޭޖަސް
އީރާންގެ އިސް އޮފިޝަލުންނާއި، އެ ޤައުމުގެ ތަންތަން ހިމެނޭހެން 19 އޮފިޝަލަކާ ދެކޮޅަށް އައު ފިޔަވަޅު ތަކެއް އަޅާފައިވާ ކަމަށް ޔޫރަޕިއަން ޔޫނިއަން (އީޔޫ) އިން ހާމަ ކޮށްފި އެވެ.
މިކަން ހާމަ ކޮށްފައި ވަނީ އީޔޫގެ ޚާރިޖީ ސިޔާސަތާ ބެހޭ އިސްވެރިޔާ ކާޖާ ކަލާސް އެވެ. ކަލާސް ވިދާޅުވީ މި ފިޔަވަޅުތައް އަޅާފައި ވަނީ އީރާންގައި ކުރިއަށް ގެންދިޔަ މުޒާހަރާތަކާ ދެކޮޅަށް ހިންގި އަމަލު ތަކުގެ ސަބަބުންނެވެ.
ބައިނަލްއަޤުވާމީ މީޑިއާ ތަކާއި، ސިޔާސީ މަސްރަހުގެ މަސްދަރު ތަކުން ބުނެފައިވާ ގޮތުގައި، ފިޔަވަޅު އެޅި ފަރާތް ތަކުގެ ތެރޭގައި އީރާންގެ އައު ރޫހީ ލީޑަރު މުޖުތަބާ ޚާމަނާއީ ނުހިމެނެ އެވެ.
އީޔޫގެ ޤައުމު ތަކުން އެއްބަސްވި ފިޔަވަޅުތައް އިއުލާން ކުރަމުން ކަލާސް ވިދާޅުވީ، އީރާންގެ ހަނގުރާމަ ކުރިއަށްދާއިރު އީޔޫ އިން އެ ޤައުމުގެ މަސްލަހަތުތައް ރައްކާތެރި ކުރާނެ ކަމަށާއި، ޤައުމީ ފެންވަރުގައި އީރާންގައި ދަތި ކުރުންތައް ގެންގުޅޭ ފަރާތްތަކުގެ ފަހަތުން ވެސް ދާނެ ކަމަށެވެ.
އެކަން ފާހަގަ ކުރައްވައި ކަލާސް ވިދާޅުވީ، އީރާން އަށް މެސެޖެއް ދޭން ބޭނުންވާ ކަމަށެވެ. އެގޮތުން އީރާންގެ ކުރިއެރުން ބިނާ ކުރެވޭނީ ދަތި ކުރުން ތަކުގެ މައްޗަށް ނޫން ކަމަށް ފާހަގަ ކުރައްވައި އޭނާ ވިދާޅުވީ، އެ މެސެޖު ދޭން ބޭނުންވާ ކަމަށެވެ.
މިއަހަރުގެ ޖަނަވަރީ މަހުގެ ތެރޭގައި އީރާންގައި ވަނީ ބޮޑު މުޒާހަރާ ތަކެއް ކުރިއަށް ގެންގޮސްފަ އެވެ. އީރާންގެ ސަރުކާރުން ތުހުމަތު ކުރި ގޮތުގައި އެއީ އެމެރިކާ އާއި އިޒްރޭލް އަޑީގައި ތިބެގެން ކުރިއަށް ގެންދިޔަ މުޒާހަރާ ތަކެކެވެ. އީރާންގެ ސަރުކާރުން ވަނީ ޤައުމީ މަސްލަހަތު ހިމާޔަތް ކުރާނެ ކަމަށް ބުނެ، އެ މުޒާހަރާތައް މައިތިރި ކުރުމަށް ބާރުގެ ބޭނުން ކޮށްފަ އެވެ.
އޭރު އީރާންގެ ރޫހީ ލީޑަރަކަށް ހުންނެވީ އާޔަތުﷲ އަލީ ޚާމަނާއީ އެވެ. ނަމަވެސް، މިދިޔަ ފެބްރުވަރީ މަހުގެ ފަހު ދުވަހު އެމެރިކާ އާއި އިޒްރޭލް އިން އީރާންއާ ދެކޮޅަށް ދޭން ފެށި ހަމަލާ ތަކުގައި ޚާމަނާއީ ވަނީ އަވަހާރަވެފަ އެވެ. އޭގެ ފަހުން އީރާންގެ އައު ރޫހީ ލީޑަރަކަށް އައްޔަން ކުރައްވާފައި ވަނީ، ޚާމަނާއީގެ ދަރިކަލުން މުޖުތަބާ ޚާމަނާއީ އެވެ.
އީޔޫ އިން އީރާާންއާ ދެކޮޅަށް އަޅާފައިވަ ފިޔަވަޅު ތަކުގެ ތެރޭގައި ހިމެނެނީ، ފިޔަވަޅު އަޅާފައިވާ ފަރާތްތައް ދަތުރު ކުރުން މަނާ ކުރުމުގެ އިތުރުން، އެ ފަރާތް ތަކުގެ މުދާ ފްރީޒް ކުރުމެވެ.
މަސްދަރު: އޭއެފްޕީ
