އީރާން އޮތީ ނެތި ދިޔުމާ ގާތުގައި، އެމެރިކާ އޮތީ ވަރަށް ވަރުގަދަކޮށް: ޓްރަމްޕް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދަމުން އަންނަ ހަނގުރާމައިގައި، އެމެރިކާ އޮތީ ވަރަށް ވަރުގަދަކޮށް ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ބުދަ ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ހަނގުރާމައިގައި އެމެރިކާ އޮތީ ވަރަށް ވަރުގަދަކޮށް ކަމަށާއި، ކޮންމެ ފަދަ ޙާލަތަކަށް ދިޔަ ނަމަވެސް އެމެރިކާގެ ވަރުގަދަކަން ފެންނާނެ ކަމަށެވެ. ހަމަ އެހެންމެ، ކުރިއަށް އޮތް ތަނުގައި ހޮރުމޯޒް ކަނޑު އޮޅި އަށް ވަރަށް ބޮޑަށް ފޯކަސް ކުރައްވާނެ ކަމަށް ވެސް ޓްރަމްޕް ވިދާޅުވެފައިވެ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން ދުނިޔޭގެ ބާޒާރު ތަކަށް ބޮޑެތި ލޮޅުން ތަކެއް އަރަމުން އަންނައިރު، އީރާން އިން ބުނަމުން އަންނަނީ އެމެރިކާ އާއި އިޒްރޭލް އިން ދެމުން އަންނަ ހަމަލާތައް ހުއްޓާ ނުލާ ނަމަ، މެދު އިރުމަތީގެ ސަރަހައްދުން ތެޔޮ ބޭރު ކުރުން ހުއްޓުވާނެ ކަމަށެވެ. އެ ސަރަހައްދުން ދަތުރު ކުރަމުން އަންނަ އުޅަނދު ތަކަށް އީރާން އިން ހުރަސް އަޅަމުން އަންނައިރު، އެކަމުގެ ސަބަބުން ދުނިޔޭގެ އިޤްތިޞާދަށް ވަނީ ބޮޑު ނުތަނަވަސްކަމެއް ކުރިމަތިވެފަ އެވެ. 

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، މިހާރު އީރާންގެ މުޅި ސަރަހައްދު އޮތީ އެމެރިކާގެ ބާރުގެ ދަށުގައި ކަމަށެވެ. އެހެންކަމުން ދެން އެމެރިކާ އިން އެންމެ ބޮޑު ސަމާލު ކަމެއް ދޭނީ ހޮރުމޯޒް ކަނޑު އޮޅި އަށް ކަމަށް ޓްރަމްޕް ވިދާޅުވި އެވެ. މި ހަފުތާގެ ކުރީ ކޮޅު އެމެރިކާގެ ސީބީއެސް ނިއުސް އަށް ދެއްވި އިންޓަވިޔުއެއްގައި ޓްރަމްޕް ވަނީ، ހޮރުމޯޒް ކަނޑު އޮޅި ވެސް އެމެރިކާގެ ފުރިހަމަ ބާރުގެ ދަށަށް ގެނައުމަށް ވިސްނަމުންދާ ކަމަށެވެ. 

މީގެ އިތުރުން، މިހާރު އީރާން އޮތީ ބަލިވުމުގެ މަގު މަތީގައި ކަަމށް ފާހަގަ ކުރައްވައި ޓްރަމްޕް ވަނީ ވަރުގަދަ އިންޒާރެއް އަނެއްކާ ވެސް ދެއްވައިފަ އެވެ. އެގޮތުން އެމެރިކާގެ ސިފައިން ދޭ ހަމަލާތައް ވަރުގަދަ ކޮށްފި ނަމަ، އީރާން އަކީ އަލުން އާރާސްތު ނުކުރެވޭ ވަރުގެ ޤައުމަކަށް ވެގެންދާނެ ކަމަށް ވެސް ޓްރަމްޕް ވިދާޅުވި އެވެ. އަދި އޭނާ ވިދާޅުވީ، އީރާން މިހާރު އޮތީ އެ ޤައުމުގެ ނިމުމާއި ނުވަތަ ނެތި ދިޔުމާ ވަރަށް ގާތުގައި ކަމަށެވެ. 

އިތުރަށް ޓްރަމްޕް ވިދާޅުވެފައި ވަނީ، އީރާންގެ ވެރި ރަށް ތެހެރާންގެ އިތުރުން، އެ ޤައުމުގެ އެހެން ސަަރަހައްދު ތަކަށް ހަމަލާ ދިނުމުގެ ޤާބިލުކަން އެމެރިކާ އަށް އޮތް ކަމަށެވެ. ނަމަވެސް، އެފަދަ ހަމަލާ ތަކެއް ދީފި ނަމަ އީރާން އަލުން ބިނާ ކުރުމަކީ މުސްތަހީލު ކަމަކަށް ވާނެ ކަމަށާއި، އެއީ އެމެރިކާ އިން އެދޭ ގޮތް ނޫން ކަމަށް ވެސް ޓްރަމްޕް ވިދާޅުވެފައިވެ އެވެ.