ތައިލެންޑުގެ ބޯޓަކަށް ހަަމަލާ ދިނުމާ ގުޅިގެން، އީރާންގެ ސަފީރު އެ ޤައުމުގެ ފޮރިން މިނިސްޓްރީ އަށް ހާޒިރު ކޮށްފި
12 މާރިޗު 2026 | ބުރާސްފަތި 08:21ތައިލެންޑުގެ ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އީރާންގެ ސަފީރު ހާޒިރު ކޮށްފައި ވަނީ ތައިލެންޑުގެ ދިދަ ޖަހާފައިވާ "މަޔޫރީ ނާރީ" ނަމަކަށް ކިޔާ ބޯޓަކަށް ދިން ހަމަލާއާ ގުޅޭ ގޮތުން ސުވާލުކޮށް، އެ ހާދިސާގެ ހަގީގަތް ސާފު ކުރުމަށް.
ތައިލެންޑާއި، އީރާންގެ ދިދަ | ރޮއިޓާސް
ހޮރުމޯޒް ކަނޑު އޮޅިން ދަތުރު ކުރި ތައިލެންޑުގެ މުދާ އުފުލާ ބޯޓަކަށް ދިން ހަމަލާއަކާ ގުޅިގެން، ތައިލެންޑުގައި ހުންނަވާ އީރާންގެ ސަފީރު އެ ޤައުމުގެ ފޮރިން މިނިސްޓްރީ އަށް ހާޒިރު ކޮށްފި އެވެ.
ތައިލެންޑުގެ ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އީރާންގެ ސަފީރު ހާޒިރު ކޮށްފައި ވަނީ ތައިލެންޑުގެ ދިދަ ޖަހާފައިވާ "މަޔޫރީ ނާރީ" ނަމަކަށް ކިޔާ ބޯޓަކަށް ދިން ހަމަލާއާ ގުޅޭ ގޮތުން ސުވާލުކޮށް، އެ ހާދިސާގެ ހަގީގަތް ސާފު ކުރުމަށެވެ. ތައިލެންޑުގެ ސަރުކާރުން ދެކޭ ގޮތުގައި މި ހަމަލާ އަކީ ބައިނަލްއަޤުވާމީ ކަނޑުގެ ދަތުރު ފަތުރަށް އޮތް ނުރައްކަލެކެވެ.
މި ހާދިސާއާ ގުޅޭ ގޮތުން އެ ބޯޓު އޮޕަރޭޓު ކުރާ ކުންފުނިން ބުނެފައި ވަނީ، ހަމަލާ ދިން ވަގުތު ބޯޓުގައި ތިބި ފަޅުވެރިންގެ ތެރެއިން ތިން މީހަކު ގެއްލިފައިވާ ކަަމަށެެވެ. އަދި ބެލެވޭ ގޮތުގައި އެ ތިން ފަޅުވެރިން ތިބީ ބޯޓުގެ އިންޖީނު ރޫމުގައި ތާށިވެފައި ކަމަށް ބުނެފައިވެ އެވެ. އެ ކުންފުނިން ބުނެފައި ވަނީ، އެ މީހުން ހޯދުމުގެ މަސައްކަތް އަދި ވެސް ކުރިއަށް ގެންދަމުން އަންނަ ކަމަށެވެ.
ތައިލެންޑުގެ ފޮރިން މިނިސްޓްރީ އިން ވަނީ އީރާންގެ ސަފީރާ ބައްދަލުކޮށް، އެ ހާދިސާއާ ގުޅިގެން އެ ޤައުމުގެ ކަންބޮޑުވުންތައް ހިއްސާ ކޮށްފަ އެވެ. މީގެ އިތުރުން، އެ ހަމަލާގެ ފަހަތުގައި ތިބީ ކޮން ބައެއްތޯ ދެނެގަތުމަށާއި، ގެއްލިފައިވާ ފަޅުވެރިންގެ ސަލާމަތްތެރިކަން ކަށަވަރު ކުރުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށް ވެސް ތައިލެންޑުގެ ސަރުކާާރުން ވަނީ ބުނެފަ އެވެ.
މަސްދަރު: އަލް ޖަޒީރާ
