ތެލުގެ އަގު ހެޔޮ ކުރުމަށް، ސްޓްރެޓީޖިކް ރިޒާވް ބޭނުން ކުރައްވާނެ ކަމަށް ޓްރަމްޕް ވިދާޅުވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާ އަށް އުފުލިފައިވާއިރު، ތެލުގެ އަގު ހެޔޮ ކުރުމަށް އެމެރިކާގެ ޕެޓްރޯލިއަމް ރިޒާވް ބޭނުން ކުރައްވާނެ ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ސިންސިނާޓީ ސަރަހައްދަށް ކުރެއްވި ދަތުރުފުޅެއްގެ ތެރެއިން ބުދަ ދުވަހު ދެއްވި އިންޓަވިޔުއެއްގައި ޓްރަމްޕް ވިދާޅުވީ، ތެލުގެ އަގު ހެޔޮ ކުރުމަށް ކުރަން ޖެހޭ ކަންކަން އެމެރިކާ އިން ކުރާނެ ކަމަށާއި، އެގޮތުން ޕެޓްރޯލިއަމް ރިޒާވް ބޭނުން ކުރައްވާނެ ކަމަށެވެ. ޓްރަމްޕް ވިދާޅުވީ މިވަގުތު އެ ރިޒާވް ބޭނުން ކުރުމުން، ތެލުގެ އަގު ދަށަށް ދާނެ ކަމަށެވެ. 

ޓްރަމްޕް މިހެން ވިދާޅުވެފައިވާއިރު، މެދު އިރުމަތީގެ ހަނގުރާމައާ ގުޅިގެން ތެލުގެ އަގު އުފުލިގެން ދިޔުން ކޮންޓްރޯލް ކުރުމަށް އެމަޖެންސީ ތެލުގެ ރިޒާވް އިން 400 މިލިއަން ބެރަލް ބާޒާރަށް ނެރުމަށް، ބުދަ ދުވަހުގެ ކުރީ ކޮޅު އިންޓަނޭޝަނަލް އެނާޖީ އެޖެންސީ އިން ނިންމި އެވެ. މިއީ އެ އެޖެންސީ އިން މިހާތަނަށް ކުރި އެންމެ ބޮޑު ރިލީޒް އެވެެ. 

ސްޓްރެޓީޖިކް ޕްޓްރޯލިއަމް ރިޒާވްގައި މިހާާރު ހުރީ ގާތް ގަނޑަކަށް 415 މިލިއަން ބެރަލުގެ ތެލެވެ. މިއީ އެ ރިޒާވްގެ ހާފަށް ވުރެ މަދުން މައްޗަށް ހުރި މިންވަރު ކަމަށް ފާހަގަ ކޮށްފައިވެ އެވެ. އެގޮތުން އެމެރިކާގެ ކުރީގެ ރައީސް ޖޯ ބައިޑަންގެ ވެރި ކަމުގައި އެކި ފަހަރު މަތިން އެ ރިޒާވް އިން ތެޔޮ ނަގާފައި ވުމުން، މިހާރު އެ މިންވަރު މަދުވެފައި ހުރީ އެވެ. 2022 ވަނަ އަހަރު ރަޝިޔާ އިން ޔޫކްރެއިން އަށް ދިން ހަމަލާ އަށް ފަހު، ޕެޓްރޯލްގެ އަގު ހެޔޮ ކުރުމަށް 180 މިލިއަން ބެރަލް ރެކޯޑު މިންވަރަށް ވިއްކާފައިވާ ކަމަށް ފާހަގަ ކުރެވުނެވެ. 

ދުނިޔޭގެ ބާޒާރުގައި ތެލުގެ އަގު މައްޗަށް ގޮސްފައިވާތީ، އެކަމުގެ ސަބަބުން ރައީސް ޓްރަމްޕް އަށް އަންނަނީ ޕްރެޝަރު ބޮޑު ވަމުންނެވެ. ޚާއްސަކޮށް މިއަހަރުގެ ނޮވެމްބަރު މަހުގެ ތެރޭގައި އެމެރިކާގެ މިޑް ޓާމް އިންތިޚާބު އޮންނައިރު، މިކަމުގެ ސަބަބުން ރައްޔިތުންގެ ދިރިއުޅުމުގެ އަގުތައް މައްޗަށް ގޮސް، ސަރުކާރާ މެދު ރައްޔިތުން ހިތްހަމަ ނުޖެހުމުގެ ފުރުސަތު ވަރަށް ބޮޑެވެ. މިހާރު ވެސް ސާވޭ ތަކުން ދައްކާ ގޮތުގައި، އިޤްތިސާދީ ކަންކަމުގައި އެމެރިކާގެ ރައްޔިތުން ޓްރަމްޕް އަށް ދެނީ ދަށް ރޭޓިން އެކެވެ.