އީރާން ހަނގުރާމައިގެ ފުރަތަމަ ހަފުތާގައި އެމެރިކާ އިން 11.3 ބިލިއަން ޑޮލަރު ޚަރަދުކޮށްފި

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ފުރަތަމަ ހަފުތާގައި އެކަނިވެސް 11.3 ބިލިއަން ޑޮލަރަށްވުރެ ގިނައިން އެމެރިކާއިން ޚަރަދުކޮށްފައިވާކަމަށް، ޕެންޓަގަނުން ގާނޫނު ހަދާ މަޖިލީހަށް ދީފައިވާ މައުލޫމާތާ ހަވާލާދީ ނިއުޔޯކް ޓައިމްސްއިން ރިޕޯޓުކޮށްފިއެވެ. މި ރިޕޯޓުން ހާމަވާގޮތުގައި، މި ހަނގުރާމައިގައި ހަތިޔާރާއި ވަސީލަތްތައް ބޭނުންކުރަމުންދާ މިންވަރު ހުރީ ވަރަށް މަތީގައެވެ.

އަންގާރަ ދުވަހު ސިއްރުކޮށް ބޭއްވި މި ބައްދަލުވުމުގެ މައުލޫމާތު އެނގޭ ފަރާތްތަކާ ހަވާލާދީ ނިއުޔޯކް ޓައިމްސްއިން ބުނެފައިވަނީ، 11.3 ބިލިއަން ޑޮލަރުގެ މި އަދަދަކީ ހަމަލާތައް ފެށުމުގެ ކުރިން ވާންޖެހޭ ތައްޔާރީތަކަށް ހިނގި ގިނަ ޚަރަދުތައް ނުހިމަނައި ލިބިފައިވާ އަދަދެއް ކަމަށެވެ. އެހެންކަމުން، ހަނގުރާމައިގެ ފުރަތަމަ ހަފުތާގެ ޖުމްލަ ޚަރަދު މިއަށްވުރެ އެތައް ގުނައެއް އިތުރުވެގެންދާނެ ކަމަށް ބެލެވޭކަމަށް ކޮންގްރެސްގެ މެންބަރުންނަށް ވަނީ އަންގާފައެވެ.

މީގެ އިތުރުން، ހަނގުރާމައިގެ ފުރަތަމަ ދެ ދުވަހުގެ ތެރޭގައި އެކަނިވެސް ގާތްގަނޑަކަށް 5.6 ބިލިއަން ޑޮލަރުގެ ހަތިޔާރު ބޭނުންކޮށްފައިވާކަމަށް ޑިފެންސް އޮފިޝަލުން މީގެކުރިން ކޮންގްރެސްއަށް މައުލޫމާތު ދީފައިވާކަމަށް އެމެރިކާގެ މީޑިއާތަކުން ރިޕޯޓުކުރެއެވެ. މިއީ ކުރިން އާންމުކޮށް އަންދާޒާކުރި މިންވަރަށްވުރެ މާ މަތީ އަދަދެކެވެ.