'ރާނުގެ ބަނދަރުތަކަށް ހަމަލާދީފިނަމަ ފާރިސީ ކަނޑުއޮޅީގެ ހުރިހާ ބަނދަރުތަކަކީ ހަމަލާ ދޭނެ ކަމަށް އީރާނުން ބުނެފި

އިސްރާއީލާ ގުޅިގެން އެމެރިކާއިން އީރާނަށް ދެމުންދާ އުދުވާނީ ހަމަލާތަކުގެ ތެރެއިން، އީރާނުގެ ބަނދަރުތަކަށް އެމެރިކާއިން ހަމަލާދީފިނަމަ، ފާރިސީ ކަނޑުއޮޅީގެ އައްސޭރިފަށުގެ ގައުމުތަކުގެ ހުރިހާ ބަނދަރުތަކަކާއި އިގްތިސާދީ މަރުކަޒުތަކަކީ އީރާނުން ހަމަލާދޭނެ ސައްހަ އަމާޒުތަކެއްގެ ގޮތުގައި ބަލާނެ ކަމުގެ އިންޒާރު އީރާނުގެ ހަތިޔާރު އެޅި ބާރުތަކުގެ އިސް ތަރުޖަމާނު ދެއްވައިފިއެވެ.

ބުދަ ދުވަހު ވާހަކަދައްކަވަމުން ބްރިގޭޑިއާ ޖެނެރަލް އަބުލްފަޒްލް ޝެކަރްޗީ ވިދާޅުވީ، އީރާނުގެ ބަނދަރުތަކަށް ހަމަލާދޭނެ ކަމަށް ބުނެ އެމެރިކާއިން ދެމުންދާ އިންޒާރުތައް ތަންފީޒުކޮށްފިނަމަ، ފާރިސީ ކަނޑުއޮޅީގައި އީރާނަށް ހަމަލާނުދެވޭނެ އެއްވެސް ބަނދަރެއް، އިގްތިސާދީ މަރުކަޒެއް ނުވަތަ ތަނެއް ނޯންނާނެ ކަމަށާއި، އެ ހުރިހާ ތަނަކަށް ސައްހަ އަމާޒުފަތްތަކެއްގެ ގޮތުގައި ހަމަލާދޭނެ ކަމަށެވެ.

ޝެކަރްޗީ ވިދާޅުވި ގޮތުގައި، ފެބްރުއަރީ މަހުގެ ފަހުކޮޅުން ފެށިގެން އެމެރިކާއާއި އިޒްރޭލުން ދެމުންދާ އުދުވާނީ ހަމަލާތަކާ ގުޅިގެން އީރާނުން މިހާތަނަށް ކެތްތެރިކަން އިސްކޮށްފައިވެއެވެ. އެގޮތުން އީރާނުގެ ހަމަލާތައް މިހާތަނަށް އަމާޒުކޮށްފައިވަނީ ހަމައެކަނި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށާއި ވަސީލަތްތަކަށް އެކަނި ކަމަށް އޭނާ ފާހަގަކުރެއްވިއެވެ.

ނަމަވެސް، އީރާނުގެ ދެކުނުގެ މުހިންމު އުމްރާނީ ވަސީލަތްތަކަށް އެމެރިކާއިން ހަމަލާދީފިނަމަ، ފާރިސީ ކަނޑުއޮޅީގެ ގައުމުތަކުގައި ހުރި ހުރިހާ ތަންތަނަކަށް ހަމަލާތައް ފުޅާކުރާނެ ކަމުގެ އިންޒާރު ޖެނެރަލް ވަނީ ދެއްވާފައެވެ.

މި އިންޒާރު އައިސްފައިވަނީ، ފާރިސީ ކަނޑުއޮޅީގައި ހިނގަމުންދާ ހަމަނުޖެހުންތަކާ ގުޅިގެން ބައިނަލްއަގުވާމީ ބާޒާރުގައި ހަކަތައާއި މުދަލުގެ އަގު އުފުލެމުންދާތީ ވޮޝިންޓަނަށް ބޮޑެތި ފިއްތުންތަކެއް ކުރިމަތިވެފައިވާ ދަނޑިވަޅެއްގައި، އީރާނުގެ ތެޔޮ އުފައްދާ މަރުކަޒުތަކަށް ހަމަލާދޭނެ ކަމަށް ބުނެ އެމެރިކާއިން ދެމުންދާ އިންޒާރުތަކާ ގުޅިގެންނެވެ.

ދުނިޔޭގެ ތެލުގެ ޑިމާންޑުގެ ފަސްބައިކުޅަ އެއްބައި ހިއްސާކުރާ ހޯރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ހުރަސްތައް ކުރިމަތިކުރުން މި ހަފުތާގެ ކުރީކޮޅު ވަރުގަދަކުރުމާ ގުޅިގެން، ތެލުގެ އަގުތައް ދަނީ މެދުނުކެނޑި އުފުލެމުންނެވެ.

އެމެރިކާގެ އަސްކަރީ އޮޕަރޭޝަންތަކުގެ ސަބަބުން އީރާނުގެ ކަނޑުގެ ސިފައިންގެ އުޅަނދުތައް އީރާނުގެ ދެކުނުގެ ބަނދަރުތަކުގައި ތާށިވެފައިވާ ކަމަށް ބުނެ އެމެރިކާގެ އަސްކަރިއްޔާއިން ދައްކަމުންދާ ވާހަކަތައް ޝެކަރްޗީ ވަނީ ދޮގުކުރައްވާފައެވެ.

ދައުލަތުގެ ޓީވީއަށް ދެއްވި ބަސްދީގަތުމެއްގައި އޭނާ ވިދާޅުވީ، އެއީ ސައްތަ އިންސައްތަ ދޮގު ޚަބަރެއް ކަމަށާއި، އީރާނުގެ ހަތިޔާރު އެޅި ބާރުތައް އޮތީ ވަރަށް ވަރުގަދަކޮށް ކަމަށެވެ. އަދި ބޭނުންވެއްޖެ ހިނދެއްގައި މިހާތަނަށް ހިންގާފައިވާ އޮޕަރޭޝަންތަކަށްވުރެ މާ ވަރުގަދަ އޮޕަރޭޝަންތަކެއް ހިންގާނެ ކަމަށްވެސް އޭނާ ވިދާޅުވިއެވެ.