އީރާނުގެ ހަމަލާތަކުގައި މެދުއިރުމަތީގައި ހުރި އެމެރިކާގެ 17 ތަނަކަށް ގެއްލުންދީފި: ނިއުޔޯކް ޓައިމްސް

މެދުއިރުމަތީގައި ހުރި އެމެރިކާގެ މަދުވެގެން 17 ތަނަކަށް އީރާނުގެ ހަމަލާތަކުގައި ގެއްލުން ލިބިފައިވާ ކަމަށް ރިޕޯޓްތައް ބުނެފި އެވެ.

އިޒްރޭލާއި ވޮޝިންޓަނުން ގުޅިގެން އީރާނަށް ހަމަލާދޭން ފެށި ފަހުން، އީރާނުން ދިން ޑްރޯން އަދި މިސައިލް ހަމަލާތަކުގައި މެދުއިރުމަތީގެ އެކި ސަރަހައްދުތަކުގައި ހުރި އެމެރިކާގެ އަސްކަރީ، ޑިޕްލޮމެޓިކް އަދި ވައިގެ ދިފާއީ ނިޒާމުތައް ހިމެނޭ މަދުވެގެން 17 ތަނަކަށް ގެއްލުން ލިބިފައިވާކަން ނިއުޔޯކް ޓައިމްސްއިން ބުދަ ދުވަހު ކުރި ދިރާސާތަކުން ވަނީ ހާމަވެފަ އެވެ.

ގެއްލުން ލިބުނު ތަންތަނުގެ ތެރެއިން މަދުވެގެން 11 ތަނަކީ އަސްކަރީ މަރުކަޒުތަކާއި ވަސީލަތްތަކެވެ. މިއީ މެދުއިރުމަތީގައި ގާއިމުކޮށްފައިވާ އެމެރިކާގެ އެފަދަ ހުރިހާ ވަސީލަތްތަކުގެ ގާތްގަނޑަކަށް ދެބައިކުޅަ އެއްބައެވެ.

އީރާނުގެ ހަމަލާތަކުގައި އެންމެ ބޮޑު މާލީ ގެއްލުމެއް ލިބިފައިވަނީ ވައިގެ ދިފާއީ ނިޒާމުތަކަށެވެ. އެގޮތުން ގަތަރުގެ އުއްމު ދަހަލް ކައިރީގައި ހުންނަ، 4،800 ކިލޯމީޓަރު (3،000 މޭލު) ގެ ސަރަހައްދެއް ބެލެހެއްޓުމުގެ ގާބިލުކަން ހުރި 1.1 ބިލިއަން ޑޮލަރުގެ އާލީ-ވޯނިންގ ރޭޑާ ސިސްޓަމަށް ގެއްލުން ލިބިފައިވާކަން ސެޓެލައިޓް ފޮޓޯތަކުން ފެންނަން އެބަހުއްޓެވެ.

މީގެ އިތުރުން، "ޓާމިނަލް ހައި އެލްޓިޓިއުޑް އޭރިއާ ޑިފެންސް" (ތާޑް) ނިޒާމުގެ ބައެއް ބައިތަކަށްވެސް އީރާނުން ހަމަލާދީފައިވާ ކަމަށް އެ ނޫހުގެ ދިރާސާ އިން ދައްކައެވެ.

ފެބްރުއަރީ 28 ވަނަ ދުވަހު ބަހްރެއިންގައި ހުންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓްގެ މައި މަރުކަޒަށް ދިން ހަމަލާގައި ލިބުނު ގެއްލުން ގާތްގަނޑަކަށް 200 މިލިއަން ޑޮލަރަށް އަރާނެ ކަމަށް ޕެންޓަގަނުން އަންދާޒާކޮށްފައިވާ ކަމަށް ކޮންގްރެސްގެ އޮފިޝަލަކާ ހަވާލާދީ ނިއުޔޯކް ޓައިމްސްއިން ރިޕޯޓްކުރެއެވެ.

އީރާނުން އެމެރިކާގެ ޑިޕްލޮމެޓިކް މިޝަންތަކަށްވެސް އަމާޒުކޮށް ހަމަލާދީފައިވާއިރު، މީގެ ސަބަބުން ދުބާއީގައި ހުންނަ ކޮންސިއުލޭޓާއި، ކުވައިތު ސިޓީ އަދި ރިޔާޟްގައި ހުންނަ އެމްބަސީތައް ވަގުތީ ގޮތުން ބަންދުކުރަން ޖެހުނެވެ. ނަމަވެސް މި ހަމަލާތަކުގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައެއް ނުވެއެވެ.

އެމެރިކާގެ އޮފިޝަލުން އެ ނޫހަށް މައުލޫމާތު ދެއްވި ގޮތުގައި، މި ހަމަލާތަކުން އެނގިގެންދަނީ ޓްރަމްޕް ސަރުކާރުގެ ގިނަ ބަޔަކު ހީކުރި ވަރަށްވުރެ ބޮޑަށް އީރާނުން އޮތީ ހަނގުރާމައަކަށް ތައްޔާރުވެގެން ކަމެވެ.

މެދުއިރުމަތީގެ މަސްރަހު ގޯސްވެގެން ދިޔައީ ފެބްރުއަރީ 28 ވަނަ ދުވަހު އިޒްރޭލާއި އެމެރިކާއިން ގުޅިގެން އީރާނަށް ދޭން ފެށި ހަމަލާތަކާ ގުޅިގެންނެވެ. މި ހަމަލާތަކުގައި މިހާތަނަށް 1،200 އަށްވުރެ ގިނަ މީހުން މަރުވެފައިވާ ކަމަށް ރިޕޯޓްތައް ބުނާއިރު، އޭގެ ތެރޭގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީވެސް ހިމެނިވަޑައިގަންނަވައެވެ.

އީރާނުން ދެމުންދާ ބަދަލުހިފުމުގެ ހަމަލާތަކުގައި، މި ކެމްޕޭން ފެށުނީއްސުރެ އެމެރިކާގެ އަސްކަރިއްޔާގެ އަށް މީހަކު މަރުވެ، ގާތްގަނޑަކަށް 140 މީހުންނަށް އެކިވަރުގެ އަނިޔާތައް ލިބިފައިވެއެވެ.