އީރާނުން ކުވައިތުގައި ހުންނަ އެމެރިކާ ބޭސްތަކަށް ހަމަލާދީ އެމެރިކާގެ 100 ސިފައިން ޒަޚަމްކޮށްފި

ކުވައިތުގައި ހުންނަ އެމެރިކާގެ އަސްކަރީ މަރުކަޒަކަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ދިން ހަމަލާތަކެއްގައި އެމެރިކާގެ 100 ސިފައިން ޒަޚަމްވެއްޖެއެވެ. ކުވައިތުގެ އަލް-އުދައިރީ އެއަރ ބޭސްއަށް އަމާޒުކޮށް މި ހަމަލާތައް ދީފައިވަނީ މިސައިލާއި ޑްރޯން ބޭނުންކޮށްގެންނެވެ.

އައި.އާރު.ޖީ.ސީގެ ޕަބްލިކް ރިލޭޝަންސް އޮފީހުން ނެރުނު "ޓްރޫ ޕްރޮމިސް 4" އޮޕަރޭޝަނުގެ 31 ވަނަ ބަޔާނުގައި ބުނެފައިވަނީ، މިއީ "ޔާ ހައިދަރު އަލް-ކައްރާރު" ގެ ނަމުގައި ކުރިއަށްގެންދާ ހަރަކާތުގެ 38 ވަނަ ބުރުގެ ދަށުން ދިން ހަމަލާއެއް ކަމަށެވެ. ރަމަޟާން މަހުގެ 21 ވިލޭރޭ  އައި.އާރު.ޖީ.ސީގެ ކަނޑުގެ ސިފައިން ދިން މި ވަރުގަދަ ހަމަލާތަކަކީ އެ ސަރަހައްދުގައި ތިބި އެމެރިކާގެ އަސްކަރީ ބާރުތަކާ ދެކޮޅަށް ހިންގި ކާމިޔާބު އޮޕަރޭޝަނެއް ކަމަށް އެ ބަޔާނުގައިވެއެވެ.

އަލް-އުދައިރީގައި ހުންނަ އެމެރިކާގެ ހެލިކޮޕްޓަރު ބޭސްއަށް އެއްވަގުތެއްގައި ދިން ދެ މިސައިލް ހަމަލާއާ ގުޅިގެން، އެމެރިކާގެ ގިނަ އަދަދެއްގެ ސިފައިންނަށް އެކިވަރުގެ އަނިޔާތައް ލިބިފައިވާ ކަމަށް އެ އިދާރާއިން ބުނެއެވެ. އަދި ޒަޚަމްވި 100 އަށްވުރެ ގިނަ ސިފައިން މިހާރު ވަނީ ކުވައިތުގެ އަލް-ޖާބިރު އަދި އަލް-މުބާރަކް ހޮސްޕިޓަލަށް ބަދަލުކޮށްފައެވެ.

މީގެ އިތުރުން، އެމެރިކާގެ ފިފްތު ފްލީޓްގެ މައި މަރުކަޒު ކަމަށްވާ މިނާގެ ސަލްމާން ބަނދަރުގައި ހުންނަ އެމެރިކާގެ އަސްކަރީ މަރުކަޒުގެ މުހިންމު އިންފްރާސްޓްރަކްޗަރތަކަށް ވެސް އީރާނުގެ މިސައިލާއި ޑްރޯން ހަމަލާތައް އަމާޒުވެފައިވާ ކަމަށް ބަޔާނުގައިވެއެވެ. މީގެ ތެރޭގައި އެ މަރުކަޒުގައި ބޭނުންކުރާ މުހިންމު "ލީޑްސް"  ސިސްޓަމަށް ވެސް ބޮޑެތި ގެއްލުންތަކެއް ވަނީ ލިބިފައެވެ.

ހަމައެއާއެކު، "މުޙައްމަދު އަލް-އަޙްމަދު" އަދި "ޢަލީ އަލް-ސާލިމް" ނޭވަލް ބޭސްގައި ހުރި ޕެޓްރިއަޓް މިސައިލް ސިސްޓަމްތަކަށާއި، ހަތިޔާރު ގުދަންތަކުގެ އިތުރުން އެމެރިކާ ސިފައިން ތިބޭ ބެރެކްސްތަކަށް ވެސް ވަރުގަދަ ހަމަލާތަކެއް އަމާޒުވެ، ބޮޑެތި ގެއްލުންތަކެއް ލިބިފައިވާ ކަމަށް އައި.އާރު.ޖީ.ސީން ބުނެއެވެ.

އައި.އާރު.ޖީ.ސީން ބުނި ގޮތުގައި، އެމެރިކާގެ ޓެރަރިސްޓް ބާރުތަކާއި އިސްތިއުމާރީ ޒަޔަނިސްޓް ރެޖީމާ ދެކޮޅަށް ކުރަމުންދާ ހަނގުރާމަ އެއްވެސް މެދުކެނޑުމެއް ނެތި ކުރިއަށްދާނެއެވެ.

އެ އިދާރާގެ ބަޔާން ނިންމާލަމުން ބުނެފައިވަނީ، އީރާނުން ބޭނުންވަނީ ދުޝްމަނުން ފުރިހަމައަށް އަމާންދިނުން ކަމަށެވެ. އަދި މި ހަނގުރާމަ ނިމުމަކަށް އަންނާނީ އީރާނުގެ މައްޗަށް އޮތް ހަނގުރާމައިގެ ބިރުވެރިކަން އެއްކޮށް ފިލައިގެން ދިއުމުން ކަމަށް ވެސް ބަޔާނުގައިވެއެވެ.