އައިއާރުޖީސީން ހިޒްބުاللهއާ ގުޅިގެން އިޒްރޭލުގެ އެކި ސަރަހައްދުތަކަށާއި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ވަރުގަދަ ހަމަލާތަކެއް ދީފި

އިސްލާމިކް ރިވެލޫޝަނަރީ ގާޑް ކޯޕްސް (އައިއާރުޖީސީ) އިން ބުނި ގޮތުގައި، އީރާނުން ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ ބަދަލުހިފުމުގެ ހަމަލާތަކުގެ 40 ވަނަ ބުރު ވަނީ ކުރިއަށް ގެންގޮސްފަ އެވެ. މި އޮޕަރޭޝަނުގެ ދަށުން ސަރަހައްދުގެ އެކި ކަންކޮޅުތަކުގައި ހުރި ދުޝްމަނުންގެ އަމާޒުތަކަށް ވަރުގަދަ ހަމަލާތަކެއް ވަނީ ދީފައެވެ.

އައިއާރުޖީސީން ހާމަކުރި ގޮތުގައި، މި އޮޕަރޭޝަނުގެ އެންމެ ފަހުގެ މަރުހަލާގައި އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި އަމާޒުތަކަށް ގަދަރު، އިމާދު، ޚައިބަރު ޝެކަން އަދި ފައްތާހު މަރުކާގެ މިސައިލްތައް ވަނީ ފޮނުވާލާފައެވެ.

މެދުނުކެނޑި 5 ގަޑިއިރު ވަންދެން ދިން ބަދަލުހިފުމުގެ ހަމަލާތައް

އައިއާރުޖީސީން ބުނީ، މި އޮޕަރޭޝަން ބައްޓަންކޮށްފައިވަނީ ފަސް ގަޑިއިރުގެ މުއްދަތަކަށް މެދުނުކެނޑި ހަމަލާތައް ދެވޭނެ ގޮތަށް ކަމަށެވެ.

މި ހަމަލާތައް ދީފައިވަނީ ލުބުނާނުގެ ހިޒްބުالله މުޖާހިދުންނާ ގުޅިގެން ކަމަށްވެސް އެ އައިއާރުޖީސީ އިން ފާހަގަކުރިއެވެ.

ހިޒްބުالله އިން މި ހަމަލާތަކުގައި ބައިވެރިވެފައިވަނީ ގިނަ އަދަދެއްގެ ޑްރޯން އާއި މިސައިލް ބޭނުންކޮށްގެން ކަމަށާއި، މި ގުޅިފައިވާ ހަމަލާތަކުގައި އިޒްރޭލުން ހިފާފައިވާ ބިންތަކުގެ 50 އަށްވުރެ ގިނަ އަމާޒަކަށް ހަމަލާދީފައިވާ ކަމަށް އައިއާރުޖީސީން ބުންޏެވެ.

"މި ވަރުގަދަ އަދި ގުޅިފައިވާ ހަމަލާތަކުގެ ސަބަބުން، ކުޑަކުދިން މަރަމުންދާ ޔަހޫދީ ސަރުކާރުގެ އަސްކަރީ މަރުކަޒުތަކަށް ވަނީ ފޫނުބެއްދޭ ވަރުގެ ގެއްލުންތަކެއް ލިބިފައެވެ. މީގެ ތެރޭގައި އުތުރުގެ ހައިފާ ބަނދަރާއި، މެދުތެރޭގެ ތެލް އަވީވްގެ އިތުރުން ދެކުނުގެ ބީރުޝެބާގައި ހުރި އަސްކަރީ މަރުކަޒުތައް ހިމެނެއެވެ."

ދުޝްމަނުންނަށް ކުރިމަތިލާން ޖެހިފައިވާ ހަގީގަތް

އައިއާރުޖީސީން ބުނި ގޮތުގައި، ޒަޔަނިސްޓް ސަރުކާރުގެ މީޑިއާތަކުން އިއުތިރާފުވެފައިވާ ފަދައިން، ވޭތުވެދިޔަ 24 ގަޑިއިރުގެ ތެރޭގައި އީރާނުން އިޒްރޭލަށް ފޮނުވާލި މިސައިލްތަކުގެ އަދަދު ވަނީ ވަރަށް ބޮޑަށް އިތުރުވެފައެވެ. އަދި މީގެ ސަބަބުން ޒަޔަނިސްޓުންގެ ތެރެއިން މަރުވި މީހުންނާއި އަނިޔާވި މީހުންގެ އަދަދުވެސް ވަނީ އިންތިހާއަށް މައްޗަށް ގޮސްފައެވެ.

މި ނުރައްކާތެރި ހަމަލާތައް މެދުނުކެނޑި ކުރިއަށްދާއިރު، އިޒްރޭލުގެ ޣައިރުގާނޫނީ ވަޒަންވެރިންގެ ދިރިއުޅުން ވަނީ ބިރުވެރިކަމެއްގެ ތެރޭގައެވެ. އެމީހުންގެ މުޅި ދިރިއުޅުން ބިނާވެފައިވަނީ ނުރައްކަލުގެ ރަނގަބީލުގެ އަޑަށާއި، ގިނަ ވަގުތުތަކެއް ވަންދެން ރައްކާތެރި ބަންކަރުތަކުގައި ތިބުމަށް ކަމަށް އައިއާރުޖީސީން ބުންޏެވެ.

"މި ހަމަލާތަކުގެ ސަބަބުން ދުޝްމަނުންނަށް ވަނީ ހަނގުރާމައިގެ މައިދާނުގައި އާ ހަގީގަތްތަކަކާ ކުރިމަތިލާން ޖެހިފައެވެ."

އައިއާރުޖީސީގެ 40 ވަނަ ބުރުގެ މި ހަމަލާތަކުގައި، ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށްވެސް ވަނީ ހަމަލާދީފައެވެ. މީގެ ތެރޭގައި އުރުދުންގައި ހުރި އަލް-އަޒްރަގް މަރުކަޒާއި ސައުދީ އަރަބިއްޔާގައި ހުރި އަލް-ޚަރްޖް މަރުކަޒު ހިމެނެއެވެ.

މުޅި މަޝްރަހަށް ބަލާއިރު، މިއީ އެމެރިކާގެ ރައީސް ޑޮނަލްޑް ޓްރަމްޕްގެ ދޮގުތަކާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ނުބައި ރޭވުންތަކުގެ ސަބަބުން އުފެދުނު ހަނގުރާމައިގެ އެންމެ ބޮޑު ނަތީޖާ ކަމަށް އައިއާރުޖީސީން އިތުރަށް ބުންޏެވެ.

ޝަހީދުންގެ ހަނދާނުގައި ކުރިއަށްގެންދިޔަ 39 ވަނަ ބުރު

މީގެ ކުރިން އައިއާރުޖީސީން ވަނީ ބަދަލުހިފުމުގެ އޮޕަރޭޝަނުގެ 39 ވަނަ މަރުހަލާ ކުރިއަށްގެންގޮސްފައެވެ. އެ ޖަމާއަތުން ބުނި ގޮތުގައި މި ބުރު ހާއްސަކޮށްފައިވަނީ ގައުމުގެ ދިފާއުގައި ފުރާނަ ގުރުބާންކުރި ޝަހީދުންގެ ހަނދާނަށެވެ.

މި މަރުހަލާގައި އަމާޒުކޮށްފައިވަނީ ޕާޝިއަން ގަލްފް ސަރަހައްދުގައި ތިބި އެމެރިކާގެ "ޓެރަރިސްޓް" ސިފައިންނަށެވެ. މި ހަމަލާތަކުގައި މަލްޓި-ވޯހެޑް ގަދަރު އަދި ޚުއްރަމްޝަހަރު މިސައިލްގެ އިތުރުން އިމާދު މިސައިލް ބޭނުންކޮށްފައިވާ ކަމަށް ބަޔާނުގައިވެއެވެ.

އީރާނުގެ ފައުޖުތަކުން ދެމުންދާ ހިތްވަރުގަދަ އަދި ނަތީޖާ ނެރެދޭ ހަމަލާތަކަށް އައިއާރުޖީސީން ވަނީ ތައުރީފުކޮށްފައެވެ. "މި ހަމަލާތަކުގެ ސަބަބުން އިޒްރޭލުން ހިފާފައިވާ ބިންތަކުގައި ބިރުވެރިކަން އުފެދި، ޒަޔަނިސްޓުންނަށް ވަނީ ވޭތުވެދިޔަ 11 ދުވަހު މެދުނުކެނޑި ރައްކާތެރި ތަންތަނުގައި ބަންދުވެގެން ތިބެން މަޖުބޫރުވެފައެވެ."

އެމެރިކާގެ އަސްކަރީ މަރުކަޒުތަކަށް މީގެ ކުރިން ދިން ހަމަލާތައް

އައިއާރުޖީސީގެ ކަނޑުގެ ސިފައިން ކުރިއަށްގެންދިޔަ ބަދަލުހިފުމުގެ 38 ވަނަ މަރުހަލާގެ ތަފްސީލުވެސް ކުރީގެ ބަޔާނެއްގައި ވަނީ ހާމަކޮށްފައެވެ.

"މި ކާމިޔާބު އަދި ވަރުގަދަ އޮޕަރޭޝަނުގެ ސަބަބުން، މި ސަރަހައްދުގައި ބާކީ ތިބި އެމެރިކާގެ އަސްކަރީ ބާރުތައް ވަނީ ފޮހެލާފައެވެ،" ބަޔާނުގައިވެއެވެ.

އެ ބަޔާނުގައިވާ ގޮތުން، އެއްވަގުތެއްގައި ދިން ވަރުގަދަ ދެ މިސައިލް ހަމަލާއެއް ވަނީ އަލް-އަދީރީ ހެލިކޮޕްޓަރު މަރުކަޒަށް އަމާޒުކޮށްފައެވެ. މީގެ ސަބަބުން އެމެރިކާގެ ގިނަ އަދަދެއްގެ ސިފައިން ވިއްސިވިހާލިވެގެން ދިޔައިރު، އަނިޔާވި 100 އަށްވުރެ ގިނަ ސިފައިން ވަނީ ކުވެއިތުގެ އަލް-ޖާބިރު އަދި އަލް-މުބާރަކް ހޮސްޕިޓަލަށް ގެންގޮސްފައެވެ.

އައިއާރުޖީސީން ބުނި ގޮތުގައި، ބަހްރޭންގައި ހުންނަ އެމެރިކާގެ ފަސްވަނަ ފްލީޓުގެ މައި މަރުކަޒު ކަމަށްވާ މިނާ ސަލްމާން ބަނދަރުގައި ހުރި މުހިންމު ވަސީލަތްތަކަށްވެސް އީރާނުގެ މިސައިލާއި ޑްރޯން ހަމަލާތައް ވަނީ އަރާފައެވެ.

މީގެ އިތުރުން، ކުވެއިތުގައި ހުންނަ ކޭމްޕް ޕެޓްރިއޮޓް، ހަތިޔާރު ގުދަންތައް، އަދި މުހައްމަދު އަލް-އަހްމަދު އާއި އަލީ އަލް-ސާލިމް ކަނޑުގެ ސިފައިންގެ މަރުކަޒުތަކުގައި ހުރި ސިފައިން ތިބޭ ތަންތަނަށްވެސް ވަނީ ހަމަލާދީފައެވެ.

އެމެރިކާ އާއި އިޒްރޭލާ ދެކޮޅަށް ކުރާ މި މަސައްކަތް ހުއްޓާނުލާނެ ކަމަށް ބުނަމުން އައިއާރުޖީސީން ބަޔާން ނިންމާލާފައިވަނީ، "އަހަރެމެންގެ ހަމައެކަނި އަމާޒަކީ ދުޝްމަނުން ފުރިހަމައަށް ބަލިވުން ކަމަށާއި، މި ހަނގުރާމަ ނިންމާލާނީ ގައުމުގެ މައްޗަށް އޮތް ހަނގުރާމައިގެ ބިރުވެރިކަން މުޅިން ފިލައިދިއުމުން" ކަމަށް ބުނަމުންނެވެ.

"އޮޕަރޭޝަން ޓްރޫ ޕްރޮމިސް 4" ފަށާފައިވަނީ، ވޭތުވެދިޔަ މަހުގެ ފަހުކޮޅު އެމެރިކާ އާއި އިޒްރޭލުން އީރާނާ ދެކޮޅަށް އެއްވެސް އުސޫލެއް ނެތް ހަމަލާތަކެއް ދޭން ފެށުމާ ގުޅިގެންނެވެ.