ސަރަހައްދުގައި ހުރި އެމެރިކާ އާއި އިޒްރޭލްގެ އިޤްތިޞާދީ މަރުކަޒު ތަކަށް ހަމަލާ ދޭނެ ކަމުގެ އިންޒާރު އީރާން އިން ދީފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، ސަރަހައްދުގައި ހުރި އެ ދެ ޤައުމުގެ އިޤްތިޞާދީ މަރުކަޒު ތަކަށް ވެސް ހަމަލާ ދޭނެ ކަމުގެ އިންޒާރު އީރާން އިން ދީފި އެވެ.

ބުދަ ދުވަހު އީރާން އިން މިފަދަ އިންޒާރެއް ދީފައި ވަނީ، އަންގާރަ ދުވަހުގެ ރޭގެ ވަގުތެއްގައި އީރާންގެ ބެންކަކަށް އަމާޒުކޮށް ހަމަލާ ތަކެއް ދީފައި ވަނިކޮށެވެ. އީރާން އިން ބުނެފައި ވަނީ އެމެރިކާ އާއި އިޒްރޭލްގެ އިޤްތިޞާދީ ތަން ތަނަށް ހަމަލާ ދޭނެ ކަމަށާއި، އޭގެ ތެރޭގައި ބެންކުތައް ވެސް ހިމެނޭނެ ކަމަށެވެ. 

އީރާންގެ ދައުލަތުގެ މީޑިއާ އިން އާންމު ކުރި ބަޔާނެއްގައި، އެ ޤައުމުގެ އަސްކަރިއްޔާގެ މަރުކަޒީ އޮޕަރޭޝަނަލް ކޮމާންޑް ޚާތަމުލް އަންބިޔާއު އިން ބުނީ، އެމެރިކާ އާއި ޔަހޫދީ ދައުލަތް އިޒްރޭލް އަށް ނިސްބަތްވާ އިޤްތިޞާދީ މަރުކަޒުތަކާއި، ބެންކު ތަކަށް ހަމަލާ ދިނުމުގެ ފުރުސަތު ދުޝަމަނުން މިހާރު ފަހި ކޮށްދީފައިވާ ކަމަށެވެ. މިއީ އީރާންގެ މުހިންމު ތަން ތަނަށް ދެމުންދާ ހަމަލާ ތަކަށް ރައްދު ދިނުމުގެ ގޮތުން ކުރާނެ ކަމެއް ކަމަށް ވެސް އެ ކޮމާންޑް އިން ބުނެފައިވެ އެވެ. 

މި ނިންމުމާ ގުޅިގެން މުޅި ސަރަހައްދުގައި ދިރިއުޅޭ އާންމު ރައްޔިތުން، ބެންކުތަކާ އެއް ކިލޯ މީޓަރު ކައިރިއަށް ނުދިޔުމަށް އީރާންގެ އަސްކަރިއްޔާ އިން ވަނީ އިލްތިމާސް ކޮށްފަ އެވެ. މިއީ ހަމަޅާ ތަކުގެ ސަަބަބުން އާންމު މީހަކަށް ލިބިދާނެ ގެއްލުމަކުން ސަލާމަތް ކުރުމަށް އެޅި ފިޔަވަޅެއްގެ ގޮތުގައި ރިޕޯޓު ތަކުގައި ވަނީ ފާހަގަ ކޮށްފަ އެވެ. 

އީރާންގެ މީޑިއާ ތަކުގައި ބުނެފައިވާ ގޮތުން، އަންގާރަ ދުވަހުގެ ރޭ އެމެރިކާ އާއި އިޒްރޭލް އިން ވަނީ އެ ޤައުމުގެ ވެރި ރަށް ތެހެރާންގައި ހުންނަ ބެންކަކަށް ހަމަލާ ދީފަ އެވެ. މި ހަމަލާ ތަކުގައި ބެންކުގެ މުވައްޒަފުންގެ ތެރެއިން ބަޔަކު މަރުވެފައިވާ ކަމަށް ރިޕޯޓު ކޮށްފައި ވީ ނަމަވެސް، މަރުވި މީހުންގެ ސީދާ އަދަދެއް ކަށަވަރު ކުރެވިފައި ނުވެ އެވެ.