ވަލީ އަހުދު މުޙައްމަދު ރިޔާސަތު ބެލެހެއްޓެވި ސައުދީގެ ކެބިނެޓުން ވެސް ނިންމީ އީރާން ކުށްވެރި ކުރާ ކަމަށް، އެމެރިކާ އާއި އިޒްރޭލްގެ ވާހަކައެއް ނެތް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން އީރާން އިން ރައްދުގައި ހަމަލާ ތަކެއް ދެމުން އަންނައިރު، ސައުދީ އަރަބިއްޔާގެ ވަޒީރުންގެ މަޖިލިސް ނުވަތަ، ކެބިނެޓުން ވެސް އީރާން ކުށްވެރި ކުރާ ކަމަށް ނިންމައިފި އެވެ.

އަންގާރަ ދުވަހު ކުރިއަށް ގެންދިޔަ ސައުދީ އަރަބިއްޔާގެ ކެބިނެޓުގައި ވަނީ އެ ޤައުމުގެ ސިޔާދަތާއި، ސަރަހައްދީ ހަމަޖެހުން ރައްކާތެރު ކުރުމަށް ބޭނުންވާ ހުރިހާ ފިޔަވަޅެއް އެޅުމުގެ ހައްގު ސައުދީ އަރަބިއްޔާ އަށް ލިބިގެންވާ ކަމަށް ނިންމައިފަ އެވެ. އެ ބައްދަލުވުމުގެ ރިޔާސަތު ބެލެހެއްޓެވީ، ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އެވެ. 

ކެބިނެޓުގެ ބައްދަލުވުމުގައި ސައުދީގެ ވަޒީރުން ވަނީ، އެ ޤައުމުގެ އެކި އެކި ސަރަހައްދު ތަކަށާއި، ތަން ތަނަށް ހަމަލާ ދިނުމަށް މަސައްކަތް ކުރި "ދުޝްމަނުންގެ" މިސައިލްތަކާއި ޑްރޯންތައް ހުއްޓުވައި ނައްތާލުމުގައި ސައުދީގެ ވައިގެ ދިފާއީ ނިޒާމުން ދެއްކި ހުނަރުވެރި ކަމަށް ތައުރީފު ކޮށްފަ އެވެ. ވަޒީރު ފާހަގަ ކުރައްވާފައި ވަނީ، އެކަމުން ދައްކުވައި ދެނީ ސައުދީ އަރަބިއްޔާާގެ ދިފާއީ ނިޒާމުގެ ބާރުވެރިކަން އަދި ޚަރުދަނާކަން ކަމަށެވެ. 

މީގެ އިތުރުން ސައުދީގެ ކެބިނެޓުން ވަނީ އެ ޤައުމަށާއި، ގަލްފު ކޯޕަރޭޝަން ކައުންސިލްގެ ޤައުމުތަކާއި، ބައެއް އަރަބި ޤައުމުތަކާއި، އިސްލާމީ ޤައުމުތައް އަދި ރަޙުމްތެރި ޤައުމު ތަކަށް އީރާން އިން ދެމުންދާ ހަމަލާތައް ކުށްވެރި ކުރާ ކަމަށެވެ. އެ ހަމަލާ ތަކަކީ ސަރަހައްދީ ސަލާމަތާއި ރައްކާތެރި ކަަަމަށް ދެމެހެއްޓެނިވި ގޮތެއްގައި ކުރިމަތިވެފައިވާ ނުރައްކަލެއް ކަމަށާއި، އެއީ ބައިނަލްއަޤުވާމީ ޤާނޫނު ތަކުގެ އިތުރުން، މުއާހަދާތަކާ ފުށު އަރާ ކަމެއް ކަމަށް ވެސް ސައުދީގެ ކެބިނެޓުން ވަނީ ނިންމައިފަ އެވެ. ޚާއްސަ ގޮތެއްގައި އާންމު ތަންތަނާއި، ވަސީލަތްތަކަށް ހަމަލާ ދިނުމަކީ ވަރަށް ސީރިއަސް ކަމެއް ކަމަށް ކެބިނެޓުން ފާހަގަ ކޮށްފައިވެ އެވެ. 

ސައުދީގެ ކެބިނެޓުން އީރާން ކުށްވެރި ކޮށްފައިވާއިރު، މިއީ އެމެރިކާ އާއި އިޒްރޭލް އިން އިސްވެ އީރާން އަށް ހަމަލާ ދިނުމުގެ ސަބަބުން ފެށިފައިވާ ހަނގުރާމަ އެކެވެ. ނަމަވެސް، އެމެރިކާ އާއި އިޒްރޭލް އިން ދިން ހަމަލާ ތަކުގެ އެއްވެސް ވާހަަކައެއް އެ ކެބިނެޓުގައި ގެނެސްފައި ނުވެ އެވެ. އެ ކެބިނެޓުން ވަނީ މިހާރު މެދު އިރުމަތީގެ ސަރައްދުގައި ކުރިމަތިވެފައިވާ ގޮން ޖެހުންތަކާ ކުރިމަތިލުމަށް ގަލްފުގެ ޤައުމުތަޚާއި، އަރަބި ބައިވެރިންނާ އެކު ސައުދީ އަރަބިއްޔާ އިން ކުރަމުން އަންނަ މަސައްކަތް ތަކަށް ވެސް ބަލާލައިފަ އެވެ. 

މިގޮތުން ގަލްފު ކޯޕަރޭޝްން ކައުންސިލް އާއި، ޔޫރަޕިއަން ޔޫނިއަންގެ ވަޒީރުން ގުޅިގެން ބޭއްވި ބައްދަލުވުމުގެ އިތުރުން، އަރަބި ލީގުގެ ބައްދަލުވުމުގައި ނެރުނު ބަޔާން ތަކަށް ސައުދީގެ ވަޒީރުން ވަނީ މަރުޙަބާ ކިޔުއްވައިފަ އެވެ. މި ދެ ބައްދަލުވުމުގައި ވެސް ވަނީ އީރާން އިން ދިން ހަމަލާތައް ކުށްވެރިކޮށް، އަދި ސަރަހައްދީ ސަލާމަތާއި ރައްކާތެރިކަން ޔަޤީން ކުރުމަށް އެކުގައި މަސައްކަތް ކުރުމަށް ގޮވާލައިފަ އެވެ.