އީރާން ހަނގުރާމަ ނިންމާނީ ޓްރަމްޕްގެ މަޤުސަދުތައް ހާސިލުވުމުން ކަމަށް ބުނެފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ ނިމުމަކަށް އަންނާނީ، އެމެރިކާގެ ރައީސް ޑޮނަލްޑް ޓްރަމްޕު ކަނޑައަޅުއްވާފައިވާ މަޤުސަދުތައް ޙާސިލުވުމުން ކަަމަށް ވައިޓް ހައުސްގެ ތަރުޖަމާނު ކެރޮލިން ލެވިޓް ވިދާޅުވެއްޖެ އެވެ.

ރިޔާސީ ގަނޑުވަރު، ވައިޓް ހައުސްގައި އަންގާރަ ދުވަހު އޮތް ނޫސްވެރިންގެ ބައްދަލުވުމެއްގައި ލެވިޓް ވިދާޅުވީ، އީރާންގެ އަމާޒު ތަކަށް އެމެރިކާ އާއި އިޒްރޭލް ގުޅިގެން ދެމުންދާ ހަމަލާތައް ހުއްޓާލާނީ ކަނޑައެޅިފައިވާ އަސްކަރީ ލަނޑު ދަނޑިތައް ފުރިހަމަ އަށް ހާސިލުވުމުން ކަމަށެވެ. އަދި އީރާން އިން ރަސްމީކޮށް އެއްބަސް ވިޔަސް ނުވިޔަސް، އެ ޤައުމުން އެއްވެސް ޝަރުތަކާ ނުލައި ފުރިހަމަ އަށް އަމާންދޭ ޙާލަތަށް ދިޔުމަކީ އެ އޮޕަރޭޝަންގެ މައިގަނޑު އެއް މަގުސަދު ކަމަށް އޭނާ ފާހަގަ ކުރެއްވި އެވެ. 

އީރާންއާ ދެކޮޅަށް ކުރިއަށް ގެންދާ އޮޕަރޭޝަންގެ ކުރިއެރުންތަކާ ގުޅޭ ގޮތުން ވާހަކަ ދައްކަވަމުން ލެވިޓް ވިދާޅުވީ، ހަމަލާތައް ކުރިއަށް ދަނީ ރޭވިފައިވާ ތާވަލަށް ވުރެ ވެސް ބާރު މިނުގައި ކަމަށެވެ. އެގޮތުން އެމެރިކާގެ އަސްކަރިއްޔާ އާއި، ހިތްވަރު ގަދަ ސިފައިން ވަރަށް ހަލުވިކަމާ އެކު ކަނޑައެޅިފައިވާ އަމާޒުތައް ހާސިލު ކުރަމުންދާ ކަމަށް ވެސް އޭނާ ވަނީ ވިދާޅުވެފަ އެެވެ. ލެވިޓްގެ އިތުރުން ޓްރަމްޕް ވެސް ވަނީ މިހެން ވިދާޅުވެފައެވެ. އަދި ހަނގުރާމަ ކާމިޔާބުވަމުން ދާ ކަމަށް ވިދާޅުވެ ވާހަކަ ދައްކަވައިފަ އެވެ. 

އެމެރިކާ އިން ކުރިއަށް ގެންދާ އަސްކަރީ އޮޕަރޭޝަންގެ މައިގަނޑު މަޤުސަދު ތަކުގެ ތަފްސީލް ދެއްވަމުން ލެވިޓް ވިދާޅުވީ، އީރާންގެ މިސައިލް ތަކާއި، އެ ތަކެތި އުފެއްދުމުގެ ޤާބިލުކަން ނައްތާލުން އަދި އެ ޤައުމުގެ ކަނޑުގެ ސިފައިންގެ ބާރު ކަނޑުވާލުން ހިމެނޭ ކަމަށެވެ. މީގެ އިތުރުން އީރާނަށް ދުވަހަކު ވެސް ނިއުކްލިއާ ހަތިޔާރު ނުލިބޭނެކަން ދާއިމީ ގޮތެއްގައި ކަށަަވަރު ކުރުމާއި، އެ ސަރަހައްދުގައި ޙަރަކާތްތެރިވާ އީރާނަށް ތާއީދު ކުރާ ޓެރަރިސްޓު ޖަމާއަތްތައް ބަލިކަށި ކޮށްލުމަކީ ވެސް، އޮޕަރޭޝަންގެ މުހިންމު ބައެއް ކަމަށް އޭނާ ވިދާޅުވި އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހުން ފެށިގެން އެމެރިކާ އާއި އިޒްރޭލް އިން ގެންދަނީ އީރާންގެ އެކި ސަރަހައްދު ތަަކަށް ހަމަލާ ދެމުންނެވެ. އޭގެ ރައްދުގައި އީރާން ވެސް ވަރުގަދަ ހަމަލާ ތަކެއް ދެމުން އަންނައިރު، އެމެރިކާ އާއި އިޒްރޭލް އަށް ވެސް ވަނީ ނުތަނަވަސްކަން ކުރިމަތިވެފަ އެވެ. ޚާއްސަކޮށް މެދު އިރުމަތީގެ ސަރަހައްދުގައި ހުރި އެމެރިކާގެ ގިނަ އަސްކަރީ ބޭސް ތަކަށް އީރާން އިން ހަމަލާ ދީފައިވާއިރު، އެ ތަންތަނަށް ވަނީ ބޮޑެތި ގެއްލުން ތަކެއް ވެސް ލިބިފަ އެވެ.