ޕުޓިން ގެންދަވަނީ އީރާންގެ ލީޑަރުންނާ ބަރާބަރަށް މުއާމަލާތް ކުރައްވަމުން

ރަޝިޔާގެ ރައީސް ވްލަޑިމިއަރ ޕުޓިން ގެންދަވަނީ އީރާނުގެ ލީޑަރުންނާ ބަރާ ބަރަށް މުއާމަލާތު ކުރައްވައި، ގުޅުން ބާއްވައި އަދި ސަރަހައްދީ ސަލާމަތަށް ކުރަމުން އަންނަ މަސައްކަތުގައި އެހީތެރިވާނެ ކަމުގެ ޔަޤީންކަން ދެއްވަމުން ކަމަށް ރަޝިޔާ އިން ބުނެފި އެވެ.

ރަޝިޔާގެ ރިޔާސީ ގަނޑުވަރު، ކްރެމްލިންގެ ތަރުޖަމާނު ދިމިތްރީ ޕެސްކޮވް ވިދާޅުވީ، އީރާނާއި އީރާންގެ ލީޑަރުންނާއި، ރަޝިޔާއާ ދެމެދު ދެމެހެއްޓެނިވި ގުޅުމެއް އޮތް ކަމަށެވެ. އޭނާ ވިދާޅުވީ ސަރަހައްދުގައި ސުލްޙަ އާއި ސަލާމަތް އަލުން ޤާއިމު ކުރުމަށް ކުރެވިދާނެ ކޮންމެ ކަމެއް ކުރުމަށް، ރަޝިޔާ އަބަދު ވެސް ތައްޔާރަށް އޮތް ކަމަށް ޕުޓިން ވިދާޅުވެފައިވާ ކަމަށް ވެސް، ޕެސްކޮވް ވަނީ ހާމަ ކުރައްވައިފަ އެވެ. 

މެދު އިރުމަތީގެ ސަރަހައްދުގައި މިހާރު އޮތް ޙާލަތާ ގުޅިގެން ފާއިތުވި ދުވަސް ތަކުގައި ރަޝިޔާގެ ރައީސް ޕުޓިން އާއި، ރަޝިޔާގެ ފޮރިން މިނިސްޓަރު ސާރުގޭ ލަވްރޮވް ވަނީ އީރާންގެ އިސްވެރިންނާ ވާހަކަ ދެއްކެވުން ކުރިއަށް ގެންދަވައިފަ އެވެ. އެގޮތުން ރަޝިޔާ އާއި އީރާންއާ ދެމެދު ގިނަ ކަންތައްތަކާ ގުޅޭ ގޮތުން މަޝްވަރާ ކޮށްފައިވާ ކަމަށް ވެސް ބުނެފައިވެ އެވެ. 

މީގެ އިތުރުން ރަޝިޔާގެ ރައީސް ޕުޓިން ވަނީ، އެމެރިކާގެ ރައީސް ޑޮނަލްޑް ޓްރަމްޕާ އެކު ވާހަކަ ދައްކަވައި މަޝްވަރާ ކުރައްވައިފަ އެވެ. އެ މަޝްވަރާ ތަކާ ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން ޓްރަމްޕް ވިދާޅުވެފައި ވަނީ، އެ މަޝްވަރާ ތަކަކީ ވަރަށް ރަނގަޅު އަދި އުންމީދީ މަޝްވަރާ ތަކެއް ކަމަށެވެ. 

އެމެރިކާ އާއި އިޒްރޭލް އިން އީރާން އަށް އަމާޒުކޮށް ދިން ހަމަލާތަކާ ގުޅިގެން، މެދު އިރުމަތީގެ މަސްރަހު ހޫނުވެފައިވާއިރު، ބައިނަލްއަޤުވާމީ މުޖުތަމައުން އަންނަނީ އެ ސަރަހައްދުގެ ޙާލަތާ މެދު ކަންބޮޑުވުން ފާޅު ކުރަމުންނެވެ. މި ޙާލަތުގައި ރަޝިޔާ އިން އީރާން އާއެކު ގާތް ގުޅުމެއް ބޭއްވުމަކީ، ސަރަހައްދުގެ ސިޔާސީ ހަމަހަމަކަން ދެމެހެއްޓުމަށް ކުރާ މަސައްކަތެއްގެ ގޮތުގައި ބެލެވިދާނެ ކަމަށް ބައިނަލްއަޤުވާމީ މާހިރުން ފާހަގަ ކޮށްފައިވެ އެވެ. 

އެމެރިކާ އާއި އިޒްރޭލް އިން އީރާން އަށް ހަމަލާ ދިނުމާ ގުޅިގެން، ރަޝިޔާ އިން ވަނީ އެކަން ކުށްވެރި ކޮށްފަ އެވެ. އެެމެރިކާގެ ހަމަލާ ތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ވެފައިވާއިރު، އެ މަގާމަށް ފަހުން އައްޔަން ކުރެއްވި މުޖުތަބާ ޚާމަނާއީ އަށް ވެސް ޕުޓިން ވަނީ މަރުޙަބާ ވިދާޅުވެފަ އެވެ.