ހޮރުމޯޒް ކަނޑު އޮޅިން ދަތުރު ކުރި މުދާ އުފުލާ ބޯޓަކަށް ހަމަލާދީ، އަލިފާން ރޯކޮށްލައިފި

ހޮރުމޯޒް ކަނޑު އޮޅިން ދަތުރު ކުރަމުން ދިޔަ މުދާ އުފުލާ ބޯޓަކަށް ހަމަލާދީ، އެ ބޯޓުގައި އަލިފާން ރޯކޮށްލާފައިވާ ކަމަށް އިނގިރޭސިވިލާތުގެ އަސްކަރިއްޔާ އިން ބުނެފި އެވެ. 

އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް އިން ހާމަ ކޮށްފައިވާ ގޮތުގައި، އެ ބޯޓަަށް ހަމަލާ ދިނީ ކޮން ބައެއްކަން މިހާތަނަށް އެނގިފައި ނެތެވެ. މީގެ އިތުރުން އެ ބޯޓުގައި ތިބި ފަޅުވެރިންނަށް ރައްކާތެރިކަމާ އެކު އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށް ވެސް ބުނެފައިވެ އެވެ. 

މި ހާދިސާ ހިނގާފައިވާ ހޮރުމޯޒް ކަނޑު އޮޅި އަކީ ދުނިޔޭގެ އެންމެ މުހިންމު ތެލާއި ގޭސް އުފުލުމުގެ އެންމެ މުހިންމު މަގެވެ. މިއީ އީރާނާއި، އަރަބި ޤައުމުތަކާ ދެމެދުގައި އޮންނަ ކަނޑު އޮޅި އެކެވެ. މީގެ ކުރިން އެ ކަނޑު އޮޅިން ދަތުރު ކޮށްފައިވާ އުޅަނދު ތަކަށް ހަމަލާ ދީފައިވާއިރު، އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން ވެސް އެ ކަނޑު އޮޅިން ދަތުރު ކުރުން ވަނީ ބިރުވެރި ކަމަކަށް ވެފަ އެވެ. 

ހޮރުމޯޒް ކަނޑު އޮޅީގައި ބޯޓަަކަށް ހަަމަލާ ދީފައިވާއިރު، މިހާތަނަށް އެއްވެސް ފަރާތަކުން މި ހަމަލާގެ ޒިންމާ އުފުލާފައި ނުވެ އެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން، ހޮރުމޯޒް ކަނޑު އޮޅިން ދަތުރު ކުރާ އުޅަނދު ފަހަރަށް ހަމަލާ ދޭނެ ކަމުގެ އިންޒާރު އީރާނުން އޮތީ ދީފަ އެވެ.