އީރާންގެ އައު ރޫހީ ލީޑަރު މުޖުތަބާ ޚާމަނާއީ ހުންނެވީ ގަދަވެ ސަލާމަތުން ކަމަށް ހާމަ ކުރައްވައިފި

އީރާންގެ އައު ރޫހީ ލީޑަރު މުޖުތަބާ ޚާމަނާއި ހުންނެވީ ސަލާމަތުން ކަމަށް ހާމަ ކުރައްވައިފި އެވެ. 

އެކަން ހާމަ ކުރައްވާފައި ވަނީ އީރާންގެ ރައީސް މަސްއޫދު ޕެޒެޝްކިއާންގެ ދަރިކަލުން ޔޫސުފް ޕެޒެޝްކިއާން އެވެ. ބުދަ ދުވަހު ޔޫސުފް ވިދާޅުވީ ރޫހީ ލީޑަރު މުޖުތަބާ ޚާމަނާއީ ހުންނެވީ ގަދަވެ ސަލާމަތުން ކަމަށެވެ. 

އީރާންގެ ސަރުކާރުގެ އެޑްވައިޒަރުގެ މަގާމު ވެސް ފުރުއްވަމުން ގެންދަވާ ޔޫސުފް ޕެޒެޝްކިއާން، އޭނާގެ ރަސްމީ ޓެލެގްރާމް ޗެނަލްގައި ކުރެއްވި ޕޯސްޓެއްގައި ވިދާޅުވީ، ރޫހީ ލީޑަރު މުޖުތަބާ ޚާމަނާއީ އަށް އަނިޔާވެފައިވާ ކަމުގެ ޚަބަރުތައް އޭނާ އަށް ވެސް ލިބިވަޑައިގެންނެވި ކަމަށެވެ. 

އެހެންވެ އެކަމުގެ ހަގީގަތް ބެލުމަށްޓަކައި ކަމާ ގުޅުން ހުރި ފަރާތްތަކާ ސުވާލު ކުރައްވާފައިވާ ކަމަށް ޔޫސުފް ހާމަ ކުރެއްވި އެވެ. އަދި މާތް ﷲގެ އިރާދަފުޅާ އެކު، އައު ރޫހީ ލީޑަރު މުޖުތަބާ ޚާމަނާއީ ހުންނެވީ ސަލާމަތުން ކަމަށާއި، އެމަނިކުފާނުގެ ޙާލު ކޮޅު ވެސް ވަރަށް ރަނގަޅު ކަމުގެ ޔަޤީންކަން ލިބިވަޑައިގެންނެވި ކަމަށް ޔޫސުފް ވަނީ ހާމަ ކުރައްވައިފަ އެވެ. 

މުޖުތަބާ ޚާމަނާއީ އަށް އަނިޔާވެފައިވާ ކަމަށް ދެކެވޭ ވާހަކަތައް ފެންމަތިވެފައި ވަނީ، އީރާންފެ ދައުލަތުގެ ޓީވީ އިން އެމަނުކުފާނަކީ "ރަމަޟާން މަހުގެ ހަނގުރާމައިގައި ޒަޚަމުވެފައިވާ ބަޠަލެއް"ގެ ގޮތުގައި ސިފަ ކުރުމާ ގުޅިގެންނެވެ. ނަމަވެސް، ހަނގުރާމައިގައި މުޖުތަބާ ޚާމަނާއީ އަށް ލިބިވަޑައިގެންފައި ވަނީ ކޮން ކަހަލަ އަނިޔާ ތަކެއް ކަމެއް، ނުވަތަ އަނިޔާވީ ކިހިނެއް ކަމެއް ދައުލަތުގެ މީޑިއާ އިން ސާފު ކޮށްދީފައި ނުވެ އެވެ. 

އީރާންގެ އެންމެ މަތީ ވެރިޔާ އަދި ރޫހީ ލީޑަރުގެ މަޤާމަށް މުޖުތަބާ ޚާމަނާއީ އައްޔަން ކުރައްވާފައި ވަނީ މި ހަފުތާގެ ތެރޭގަ އެވެ. އެމަނިކުފާނަކީ، އެމެރިކާގެ ހަމަލާ ތަކުގައި އަވަހާރަވެފައިވާ އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ދަރިކަލުންނެވެ. އިސްލާމީ އިންޤިލާބަށް ފަހު އީރާންގެ ތިން ވަނަ ރޫހީ ލީޑަރުގެ މަޤާމަށް މުޖުތަބާ ޚާމަނާއީ އައްޔަން ކުރެއްވި ފަހުން، އެމަނިކުފާނުގެ ޞިއްޙީ ޙާލު ކޮޅާ ގުޅޭ ގޮތުން އެކި ވާހަކަތައް ފެތުރެމުން އައިސްފައިވެ އެވެ.