އީރާނަށް ދެމުންދާ ހަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު މައްޗަށް ދަނިކޮށް އިރާގުން ތެޔޮ އުފެއްދުން މަދުކޮށްފި

ޢިރާގުގެ ރުމައިލާ ތެޔޮ ވަޅުން ދުވާލަކު އުފައްދާ މިންވަރުން 700،000 ފީފާ މަދުކޮށް، ހުޅަނގު ގުރުނާގެ ތެ ތެޔޮ ވަޅުން އުފައްދާ މިންވަރުން ދުވާލަކު 460،000 ފީފާ މަދުކޮށްފައިވާ ކަމަށް އަލްޖަޒީރާ އިން ރިޕޯޓުކޮށްފިއެވެ.

ރުމައިލާ ތެޔޮ ވަޅަކީ ޢިރާގުގެ ދެކުނުގައި، ބަސްރާ ސިޓީގެ ހުޅަނގު ދެކުނުން ގާތްގަނޑަކަށް 50 ކިލޯމީޓަރު ދުރުގައި އޮންނަ ތަނެކެވެ. މި ތެޔޮ ވަޅު ހޯދާފައިވަނީ 1953 ވަނަ އަހަރު، ޢިރާގު ޕެޓްރޯލިއަމް ކޮމްޕެނީގެ ސަބްސިޑިއަރީއެއް ކަމަށްވާ ބަސްރާ ޕެޓްރޯލިއަމް ކޮމްޕެނީންނެވެ. އަންދާޒާކުރެވޭ ގޮތުގައި މި ވަޅުގައި 17 ބިލިއަން ފީފާގެ ތެޔޮ އެބަހުއްޓެވެ. މިއީ އިރާގުގެ ޖުމްލަ ތެޔޮ ރިޒާވް ކަމަށްވާ 143 ބިލިއަން ފީފާގެ 12 އިންސައްތައެވެ. ދުނިޔޭގެ އެންމެ ބޮޑު އެއް ތެޔޮ ވަޅު ކަމަށްވާ ރުމައިލާ ވަޅު ހިންގަނީ ބީޕީ ކުންފުނިން އިރާގު ސަރުކާރާއި ޕެޓްރޯޗައިނާއާ ގުޅިގެންނެވެ. ކުންފުނީގެ ތަފާސްހިސާބުތަކުން ދައްކާގޮތުގައި، 2024 ވަނަ އަހަރު މި މަޝްރޫޢުން ދުވާލަކު 1.4 މިލިއަނަށްވުރެ ގިނަ ފީފާ ތެޔޮ ނަގަމުންދިޔައިރު، މިދިޔަ އަހަރުގެ ކުރީކޮޅު މި އަދަދު ހުރީ ދުވާލަކު 1.2 މިލިއަން ފީފާގައެވެ. ވެސްޓް ގުރުނާ 2 އިން އުފައްދާ މިންވަރު ހުރީ ދުވާލަކު 500،000 ފީފާއަށްވުރެ ކުޑަކޮށް ދަށުގައެވެ.

އެމެރިކާގެ ރައީސް ވިދާޅުވީ، އީރާނުގެ ފަރާތުން ކުރިމަތިވެފައިވާ "މިހާރުން މިހާރަށް ހުރި ނުރައްކާ" ނައްތާލުމަކީ މާ މުހިންމު ކަމެއް ކަމަށްވާތީ، ވަކި މުއްދަތަކަށް ތެލުގެ އަގު އުފުލުނު ނަމަވެސް އެކަމަށް ކެތްކުރެއްވިދާނެ ކަމަށެވެ.

މި ހަމަނުޖެހުންތައް އަވަހަށް ނިމޭނެ ކަމުގެ އެއްވެސް ނިޝާނެއް ނުފެންނާތީއާއި، ތެޔޮ ސަޕްލައި ކުރުމުގައި ހުރި ނުތަނަވަސްކަމުގެ ސަބަބުން އެމެރިކާގައި ޕެޓްރޯލްގެ އަގުތައް ވަނީ ވަރަށް ބޮޑަށް އުފުލިފައެވެ.

އީރާނުގެ ކަނޑުގެ އަދި ވައިގެ ގިނަ އަމާޒުތަކަކަށް ދެމުންދާ ހަމަލާތައް މިހާތަނަށް ކާމިޔާބު ކަމަށް ސިފަކުރައްވަމުން ޓްރަމްޕް ވިދާޅުވީ، "ގާތްގަނޑަކަށް ހުރިހާ ތަނެއް މިހާރު ވަނީ ހަލާކުކޮށްލެވިފައި" ކަމަށެވެ.

މި ހަމަލާތަކުގެ ރައްދުގައި އީރާނުން ވަނީ އަވަށްޓެރި އަރަބި ގައުމުތަކަށް މިސައިލާއި ޑްރޯން ހަމަލާތައް ދީ، ހަކަތައިގެ ވިޔަފާރީގައި މުހިންމު މަގަކަށްވާ ހޯރްމޫޒް ކަނޑުއޮޅިން ދަތުރުކުރާ އުޅަނދުތަކަށް ހުރަސްއަޅާފައެވެ.

ނަމަވެސް، މެދުނުކެނޑި ދެމުންދާ ހަމަލާތަކުގެ ސަބަބުން، ތެހެރާނުން މިސައިލް ފޮނުވުމުގެ ގާބިލުކަން އެންމެ ފަހުން ނެތިދާނެ ކަމަށް ޓްރަމްޕް ލަފާކުރެއްވިއެވެ. އޭނާ ވިދާޅުވީ "އެމީހުން ވަރަށް ގިނަ އަދަދެއްގެ މިސައިލް ފޮނުވި ނަމަވެސް، އޭގެ ތެރެއިން ގިނަ މިސައިލްތަކެއް ވައްޓާލަމުން" ގެންދާ ކަމަށެވެ.

އަނެއްކޮޅުން ހޮރްމޫޒް ކަނޑުއޮޅިން ތެޔޮ ޓޭންކަރުތަކަށް މިނިވަންކަމާއެކު ދަތުރު ނުކުރެވި، ތެޔޮ ބަރުކުރާ ބަނދަރުތަކަށް ނުދެވޭނަމަ، ކުރިއަށް އޮތް މަދު ދުވަސްކޮޅެއްގެ ތެރޭގައި އިރާގުން ތެޔޮ އުފައްދާ މިންވަރު ދުވާލަކު 3 މިލިއަން ފީފާއަށްވުރެ ބޮޑަށް މަދުކުރަން މަޖުބޫރުވާނެ ކަމަށް ޚަބަރުތައް ބުނެއެވެ.

ޢިރާގުގެ ތެލާ ބެހޭ ދެ އޮފިޝަލަކު ރޮއިޓާސް ނިއުސް އެޖެންސީއަށް މައުލޫމާތު ދެއްވި ގޮތުގައި، މިއަދާ ހަމައަށް އިރާގުން ވަނީ ރުމައިލާ ތެޔޮ ވަޅުން ދުވާލަކު އުފައްދާ މިންވަރުން 700،000 ފީފާ އަދި ވެސްޓް ގުރުނާ 2 ވަޅުން ދުވާލަކު 460،000 ފީފާ މަދުކޮށްފައެވެ.

އޮފިޝަލުން ވިދާޅުވި ގޮތުގައި، ހޮރްމޫޒް ކަނޑުއޮޅީގެ ދަތުރުފަތުރު މަޑުޖެހުމުގެ ސަބަބުން އެކްސްޕޯޓް ކުރުމަށް ހުރަސްތަކެއް ކުރިމަތިވެ، ޢިރާގުގެ ދެކުނު ބަނދަރުތަކުގައި ތެޔޮ ރައްކާކުރާ ތަންތަން ވަނީ ފުރެން ކައިރިވެފައެވެ.