އެމެރިކާ އާއި އިޒްރޭލާ ދެކޮޅަށް ޖިހާދަށް ތެދުވުމަށް އިރާގުގެ މަޝްހޫރު ދީނީ އިލްމްވެރިއަކު ފަތުވާ ނެރެފި
އިރާގުގެ ދީނީ އިލްމުވެރިޔާ އާޔަތުﷲ ޖަވާދު އަލް-ޚާލިސީ، އެމެރިކާ އާއި އިޒްރޭލާ ދެކޮޅަށް ޖިހާދު ކުރުމަށް ފަތުވާ ނެރުއްވުމާ ގުޅިގެން، އެ ގައުމުގެ ރެސިސްޓެންސް ގްރޫޕްތަކުން ދަނީ ވަރުގަދަ ހަމަލާތަކެއް ދެމުން. މި ހަނގުރާމައިގައި ބައިވެރިވާ ވިލާތުގެ ގައުމުތަކުގެ މަސްލަހަތުތަކަށް ހަމަލާދޭނެ ކަމުގެ އިންޒާރު އެ ޖަމާއަތްތަކުން ދީފައިވާއިރު، ނަޖަފް ސަރަހައްދަށް އެމެރިކާ ސިފައިން ހުއްދައެއް ނެތި ފޭބި މައްސަލަ އިރާގު ސަރުކާރުން ވަނީ ބައިނަލްއަގުވާމީ އިއްތިހާދަށް ހުށަހަޅާފައި.
ޔޫއެސް ނޭވީން އާންމުކޮށްފައިވާ މި ފޮޓޯއިން ފެންނަނީ، 2026 ފެބްރުއަރީ 28 ވަނަ ދުވަހު ކަނޑުމަތީގައި ކުރިއަށްދިޔަ "އޮޕަރޭޝަން އެޕިކް ފިއުރީ" އަށް އެހީތެރިކަން ފޯރުކޮށްދިނުމުގެ ގޮތުން، އެމެރިކާގެ ނިމިޓްޒް ކްލާސްގެ މަތިންދާބޯޓު އުފުލާ މަނަވަރު، ޔޫއެސްއެސް އަބްރަހަމް ލިންކަން (CVN 72) ގެ ފްލައިޓް ޑެކްމަތީގައި ހަތިޔާރުތައް ތައްޔާރުކުރުމަށް އެމެރިކާގެ ކަނޑުގެ ސިފައިން މަސައްކަތް ކުރަމުންދާ މަންޒަރު. | ގެޓީ އިމޭޖަސް
އިރާގުގެ ހަނގުރާމަވެރި ޖަމާއަތްތަކުން އެމެރިކާ އާއި އިޒްރޭލުގެ އަމާޒުތަކަށް ވަރުގަދަ ހަމަލާތަކެއް ދެމުންދަނިކޮށް، އެ ގައުމުގެ ދީނީ އިލްމުވެރިއަކު ޖިހާދު ކުރުމަށް ފަތުވާ ނެރުއްވައިފިއެވެ.
އިރާގުގެ މަޝްހޫރު ދީނީ އިލްމުވެރިއަކު، އިރާގުގައާއި ދުނިޔޭގެ އެކި ކަންކޮޅުތަކުގައި ތިބި އެމެރިކާ އަދި އިޒްރޭލުގެ ފައުޖުތަކާ ދެކޮޅަށް ޖިހާދު ކުރުމަށް ގޮވާލައްވާފައިވާއިރު، އިރާގުގެ ރެސިސްޓެންސް ގްރޫޕްތަކުން ވަނީ ފާއިތުވި 24 ގަޑިއިރު ތެރޭގައި 27 ހަމަލާއެއް ދީފައެވެ. އަދި އެމެރިކާ އާއި އިޒްރޭލުން ހިންގާ އުދުވާނުގައި ބައިވެރިވާ ކޮންމެ ގައުމަކީ ހަމަލާދޭންޖެހޭ އަމާޒެއް ކަމަށް އެ ޖަމާއަތްތަކުން ވަނީ އިންޒާރު ދީފައެވެ.
އާޔަތުﷲ ޖަވާދު އަލް-ޚާލިސީ ނެރުއްވި ފަތުވާގައި، އިރާގުގައާއި މުޅި ދުނިޔޭގައި ތިބި އެމެރިކާ އަދި އިޒްރޭލުގެ ސިފައިންނާ ދެކޮޅަށް ޖިހާދުގެ އޮޕަރޭޝަންތައް ހިންގުމަށް ގޮވާލައްވާފައިވެއެވެ. އަދި މިފަދަ ހަމަލާތަކުގައި މަރުވާ މީހުންނަކީ ޝަހީދުންގެ ގޮތުގައި ބެލެވޭނެ ކަމަށްވެސް އޭނާ ވިދާޅުވިއެވެ.
މި ގޮވާލުމާ އެކު، އިސްލާމިކް ރެސިސްޓެންސް އިން އިރާގު (އައި.އާރް.އައި) އިން ވަނީ ފާއިތުވި 24 ގަޑިއިރު ތެރޭގައި ދުޝްމަނުންގެ އަމާޒުތަކަށް ޑްރޯން އަދި މިސައިލް ބޭނުންކޮށްގެން 27 އޮޕަރޭޝަނެއް ހިންގާފައިވާކަން އިއުލާންކޮށްފައެވެ.
މީގެ އިތުރުން، އުރުދުންގައި ހުރި މުހިންމު އަމާޒަކަށް ޑްރޯން ހަމަލާތަކެއް ދީފައިވާ ކަމަށާއި، އިރާގުގެ އެކި ސަރަހައްދުތަކުގައި ތިބި އެމެރިކާ ސިފައިންގެ ބޭސްތަކަށް މީގެ ކުރިންވެސް ހަމަލާދީފައިވާނެ ކަމަށް އެ ޖަމާއަތުން ބުނެފައިވެއެވެ.
އިސްލާމިކް ރެސިސްޓެންސް އިން ނެރުނު ހަރުކަށި ބަޔާނެއްގައި އިންޒާރު ދީފައިވަނީ، އެމެރިކާ އާއި އިޒްރޭލުން މި ސަރަހައްދާ ދެކޮޅަށް ހިންގާ އުދުވާނުގައި އެއްވެސް ސިފައެއްގައި ބައިވެރިވާ ކޮންމެ ބަޔަކީ އެ ޖަމާއަތުގެ ހަމަލާތައް އަމާޒުވާނެ ބައެއް ކަމަށެވެ.
"ކުށްވެރި ޒަޔަނިސްޓް-އެމެރިކާ ދުޝްމަނުން ދަނީ އިސްލާމީ ޖުމްހޫރިއްޔާ އީރާނާއި މި ސަރަހައްދުގެ މިނިވަން ރައްޔިތުންނާ ދެކޮޅަށް އެމީހުންގެ ބައިވެރިން ރުކުރުވާލަމުން. އަދި މި ނާއިންސާފު ހަނގުރާމައިގައި ބައިވެރިވުމަށް ވިލާތުގެ ބައެއް ގައުމުތަކުގެ ކިބައިން އާދޭސްކުރަމުން،" އެ ބަޔާނުގައިވެއެވެ.
"މި ހަނގުރާމައިގައި ބައިވެރިވާ ވިލާތުގެ ކޮންމެ ގައުމަކީ ރައްޔިތުންނާއި އަހަރެމެންގެ މުގައްދަސް ތަންތަނުގެ ދުޝްމަނެއް ކަމުގައި ބެލެވޭނެ. އަދި މި އުދުވާނުގައި ބައިވެރިވުމުގެ އަދަބެއްގެ ގޮތުން، އިރާގާއި މި ސަރަހައްދުގައި ހުރި އެ ގައުމުތަކުގެ ފައުޖުތަކާއި މަސްލަހަތުތަކަށް ހަމަލާދޭނެ،" ބަޔާނުގައި އިތުރަށް ބުނެފައިވެއެވެ.
މި އިންޒާރަށް ތާއީދުކުރައްވައި، ނުޖަބާ މޫވްމަންޓްގެ މިލިޓަރީ ޑެޕިއުޓީ އަބްދުލްގާދިރު އަލް-ކަރުބަލާއީ ބުރާސްފަތި ދުވަހުގެ ރޭ ނެރުއްވި ބަޔާނެއްގައި ވަނީ، މި ކަމުގެ ތެރެއަށް ވަދެގަންނަ ވިލާތުގެ ގައުމުތަކަށް އިންޒާރު ދެއްވާފައެވެ.
އަލް-ކަރުބަލާއީ ވިދާޅުވީ، ނޭޓޯ ނުވަތަ ފަރަންސޭސިވިލާތް، ޖަރުމަނުވިލާތް އަދި އިނގިރޭސިވިލާތް ފަދަ ގައުމުތަކުން އިރާގުގެ ބިމަށް އަތްގަދަކޮށް ހަނގުރާމަ ފުޅާކުރަން މަސައްކަތްކޮށްފި ނަމަ، އިރާގާއި މި ސަރަހައްދުގައި ހުރި އެ ގައުމުތަކުގެ ހުރިހާ މަސްލަހަތުތަކަކީ އިސްލާމިކް ރެސިސްޓެންސް އިން ހަމަލާދޭނެ އަމާޒުތަކެއް ކަމަށެވެ.
މި ހަމަނުޖެހުންތައް ބޮޑުވެފައި މިވަނީ، އިރާގުގެ ނަޖަފް ޕްރޮވިންސަށް އެމެރިކާ ސިފައިން ހުއްދައެއް ނެތި ހެލިކޮޕްޓަރުގައި ފޭބުމުގެ ސަބަބުން އިރާގުގެ ހަނގުރާމަވެރިއަކު މަރުވި ހާދިސާއާ ގުޅިގެން، ބައިނަލްއަގުވާމީ އިއްތިހާދަށް އިރާގު ސަރުކާރުން ރަސްމީކޮށް ޝަކުވާ ހުށަހަޅާފައިވާ ދަނޑިވަޅެއްގައެވެ.
އިރާގުގެ ޖޮއިންޓް އޮޕަރޭޝަންސް ކޮމާންޑްގެ ޑެޕިއުޓީ ކޮމާންޑަރު ލެފްޓިނެންޓް ޖެނެރަލް ގާއިސް އަލް-މުހައްމަދާވީ ބުރާސްފަތި ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވީ، ނަޖަފްގެ ސަހަރާ ސަރަހައްދުން ބަޔަކު ފެނިގެން އެކަން ތަހުގީގު ކުރުމަށް ކަރުބަލާ އޮޕަރޭޝަންސް ކޮމާންޑްގެ ތިން ރެޖިމެންޓެއް އެ ސަރަހައްދަށް ފޮނުވި ކަމަށެވެ.
"އެ ފައުޖު އެ ސަރަހައްދަށް ދިޔުމުން ވައިގެ މަގުން ވަރުގަދަ ހަމަލާތަކެއް އަމާޒުވި. މި ހާދިސާގައި އެކަކު މަރުވެ، ދެ މީހަކު ޒަޚަމްވި،" އޭނާ ވިދާޅުވިއެވެ.
މި ހާދިސާއާ ގުޅިގެން އެ ސަރަހައްދު ބަލައި ފާސްކުރުމަށް ކައުންޓަރ-ޓެރަރިޒަމް ސާވިސްގެ ދެ ރެޖިމެންޓެއް ފޮނުވި ނަމަވެސް، އެއްވެސް ބަޔަކު ފެނިފައި ނުވާ ކަމަށް އޭނާ އިތުރަށް ވިދާޅުވިއެވެ.
އެމެރިކާ އާއި އިޒްރޭލުން އީރާނަށް ހަމަލާދިންތާ އަށް މަސް ފަހުން، މިދިޔަ ހޮނިހިރު ދުވަހު އަނެއްކާވެސް ވަނީ އީރާނަށް ވައިގެ ހަމަލާތަކެއް ދީފައެވެ.
މީގެ ރައްދުގައި އީރާނުން ވަނީ އިޒްރޭލުން ހިފާފައިވާ ބިންތަކަށާއި، ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ގިނަ އަދަދެއްގެ މިސައިލާއި ޑްރޯން ހަމަލާތައް ދީފައެވެ.
