އިރާގުގެ ބޮޑު ވަޒީރަކަށް އަލް މާލިކީ ގެންނަން ނިންމާފައި ވަނިކޮށް، ރޫބިއޯގެ ވަރުގަދަ އިންޒާރެއް

އިރާގުގެ ބޮޑު ވަޒީރުގެ މަގާމަށް، އެ ޤައުމުގެ ކުރީގެ ބޮޑު ވަޒީރު ނޫރީ އަލް މާލިކީ ގެންނަން ނިންމާފައި ވަނިކޮށް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަރުގަދަ އިންޒާރެއް ދެއްވައިފި އެވެ.

އިރާގެ ޝިއާ އިއްތިހާދުން ނިންމާފައި ވަނީ އެ ޤައުމުގެ ބޮޑު ވަޒީރުގެ މަގާމަށް އަލް މާލިކީ ގެނައުމަށެވެ. ކޯޑިނޭޝަން ފްރޭމްވޯކް އިން ނެރުނު ބަޔާނެއްގައި ބުނީ، ޤާނޫނު ހަދާ މަޖިލީހުގެ އެންމެ ބޮޑު ބްލޮކްގެ ކެންޑިޑޭޓުގެ ގޮތުގައި، ބޮޑު ވަޒީރުގެ މަގާމަށް އަލް މާލިކީ ނޮމިނޭޓު ކުރުމަށް އަޣުލަބިއްޔަތުން ނިންމާފައިވާ ކަމަށެވެ. އެ ބަޔާނުގައި ވަނީ އަލް މާލިކީގެ ސިޔާސީ އަދި އިދާރީ ތަޖުރިބާ އާއި، ދައުލަތް ހިންގެވުމުގައި އޭނާގެ އަތުގައި އޮތް ފުރިހަމަ ރެކޯޑު ވެސް ފާހަގަ ކޮށްފަ އެވެ.

އެކަމާ ގުޅޭ ގޮތުން ރޫބިއޯ ވިދާޅުވީ އީރާން އަށް ތާއީދު ކުރާ ސަރުކާރެއް އެފެދުމުން އެމެރިކާ އާއި އިރާގާ ދެމެދު އޮންނަ ގުޅުމަށް ބުރޫ އަރާނެ ކަމަށެވެ. އެމެރިކާގެ ބާރުގަދަ ނުފޫޒު ތަކުގެ ސަބަބުން 2014 ވަނަ އަހަރު ބޮޑު ވަޒީރުގެ މަގާމުން އަލް މާލިކީ ދުރުވިއިރު، އަލުން އޭނާ ބޮޑު ވަޒީރު ކަމަށް ވަޑައިގެންނެވުމަކީ އެމެރިކާ އިން ކަންބޮޑުވާނެ ކަމެކެވެ. 

ރޫބިއޯ ވިދާޅުވީ އިރާގުގައި ދެން އުފެދޭ ސަރުކާރުން މެދު އިރުމަތީގައި ސުލްޙަ އާއި އަމާންކަން ޤާއިމު ކުރުމަށް ބާރުވެރިކަން ގެނެސްދޭނެ ސަރުކާރަކަށް ވާނެ ކަމަށް އުންމީދު ކުރައްވާ ކަމަށެވެ. އަލް މާލިކީ ވަނީ މީގެ 10 އަހަރު ކުރިން ވެސް އިރާގުގެ ބޮޑު ވަޒީރުކަން ކުރައްވައިފަ އެވެ. އެގޮތުން 2006 ވަނަ އަހަރުން ފެށިގެން، 2014 ވަނަ އަހަރަށް އޭނާ ވަނީ އެ ޤައުމުގެ ބޮޑު ވަޒީރުކަން ކުރައްވައިފަ އެވެ.

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް ވިދާޅުވެފައި ވަނީ، ސެކްރެޓަރީ އޮފް ސްޓޭޓް ރޫބިއޯ ބަޔާން ކުރެއްވީ އީރާން ކޮންޓްރޯލް ކުރާ ސަރުކާރަކަށް އިރާގު ގެ މަސްލަހަތު ކުރިއަށް ނުގެންދެވޭނެ ކަމަށެވެ. އަދި އެފަދަ ސަރުކާރަކުން އިރާގު ސަރަހައްދީ ހަނގުރާމަތަކާ ދުރުގައި ބޭއްވޭނެ ކަމަށް ނުދެކޭ ކަމަށާއި، އެމެރިކާ އާއި އިރާގާ ދެމެދު އޮންނަ ފައިދާ ހުރި ގުޅުން ކުރިއަށް ނުގެންދެވޭނެ ކަމށް ރޫބިއޯ ވަނީ ވިދާޅުވެފަ އެވެ، 

އިރާގުގެ ސިޔާސީ ބައެއް މަސްދަރު ތަކުން އޭއެފްޕީ އަށް ބުނެފައިވާ ގޮތުގައި، އަލް މާލިކީގެ ކުރީގެ ސަރުކާރާ މެދު އެމެރިކާ އިން ހިތްހަމަ ނުޖެހޭކަން އެ ޤައުމުން ވަނީ އިރާގަށް އަންގައިފަ އެވެ. އަދި ޤައުމުގެ ބޮޑު ވަޒީރު ހޮވުމަކީ އިރާގުގެ ނިންމުމެއް ކަމަށާއި، ނަމަވެސް، ދެން އަންނަ ސަރުކާރާ މެދު އެމެރިކާ އިން، އެމެރިކާގެ މަސްލަހަތަށް ރިއާޔަތްކޮށް ނިންމުންތައް ނިންމާނެ ކަމަށް އެ ސިޓީގައި ބުނެފައިވާ ކަމަށް މައުލޫމާތު ދީފައިވެ އެވެ. 

އިރާގުގެ ތެލުގެ އާމްދަނީގެ ބޮޑު ބައެއް އެމެރިކާގެ ނިއު ޔޯކްގެ ފެޑަރަލް ރިޒާވް ބޭންކުގައި ބެހެއްޓިފައިވާތީ، އިރާގުގައި އެމެރިކާ އަށް ބާރާއި، ނުފޫޒު ހިންގުމުގެ ފުރުސަތު އެބަ އޮތެވެ. މިއީ އެމެރިކާގެ ހަމަލާ އަށް ފަހު، 2003 ވަނަ އަހަރު ސައްދާމް ޙުސެއިންގެ ވެރިކަން ވައްޓާލުމަށް ފަހު، އެމެރިކާ އިން ހަމަޖައްސާފައިވާ އިންތިޒާމެކެވެ. 

އަންގާރަ ދުވަހު އައު ރައީސް އަކު ހޮވުމަށް އިރާގުގެ ޤާނޫނު ހަދާ މަޖިލީހުގެ ބައްދަލުވުމެއް އޮންނާނެ ކަމަށް ރިޕޯޓުތައް ބުނެ އެވެ. އިރާގުގެ ރައީސް އަކީ މާ ބޮޑެތި ބާރު ތަކެއް ލިބިފައިވާ މަގާމަކަށް ނުވި ނަމަވެސް، ބޮޑު ވަޒީރު އައްޔަން ކުރައްވާނީ ރައީސް އެވެ.