އިރާގުގެ ސުލައިމާނިއްޔާގައި ބާރުގަދަ ގޮވުންތަކެއް ގޮވައިފި
ޢިރާޤުގެ ސުލައިމާނިއްޔާގައި ހަރަކާތްތެރިވާ އީރާނުގެ ކުރުދީ ހަތިޔާރު އެޅި ޖަމާޢަތެއްގެ މައި މަރުކަޒަށް އަމާޒުކޮށް ބާރުގަދަ ހަމަލާތަކެއް ދީފި. މި ހަމަލާތަކުގެ ޒިންމާ އަދި އެއްވެސް ފަރާތަކުން އުފުލާފައި ނުވާއިރު، މިއީ އީރާނާ ދެކޮޅަށް އެމެރިކާއިން ކުރުދީ ޖަމާޢަތްތަކާ ގުޅުން ބާއްވާ ކަމުގެ ރިޕޯޓްތަކެއް ފެންމަތިވެފައިވާ ދަނޑިވަޅެއްގައި ދީފައިވާ ހަމަލާތަކެއް. އަދި މިއީ ބޯޑަރު ސަރަޙައްދުގައި ޓެރަރިސްޓް ހަރަކާތްތައް ހިންގާ ކަމަށް ބުނެ އީރާނުން އިންޒާރު ދީފައިވަނިކޮށް ދިން ހަމަލާތަކެއް.
ފެބްރުއަރީ މަހުގެ 28 ވަނަ ދުވަހު އީރާނަށް ދިން ހަމަލާތަކުގެ ތެރޭގައި، އެމެރިކާގެ ކަނޑުގެ ސިފައިންގެ ނިމިޓްޒް ކްލާސްގެ މަތިންދާބޯޓު އުފުލާ މަނަވަރު، ޔޫއެސްއެސް އަބްރަހަމް ލިންކަންގައި ހުރި ޖެޓްތައް ފެންނަ މަންޒަރެއް. | ރޮއިޓާސް
ޢިރާޤުގެ އުތުރުގައި އޮންނަ ކުރުދިސްތާން ސަރަޙައްދުގެ ސުލައިމާނިއްޔާ ޕްރޮވިންސްގެ އެކި ސަރަޙައްދުތަކުގައި ބާރުގަދަ ގޮވުންތަކެއް ގޮވާފައިވާކަން އަލްޖަޒީރާއިން ހާމަ ކޮށްފި އެވެ.
އަލްޖަޒީރާ އިން ބުނީ ގޮވުންތައް ފެންނަ ވީޑިއޯ ފުޓޭޖް ކަށަވަރުކޮށްފައިވާ ކަމަށެވެ.
އެ ސަރަޙައްދުގެ މީޑިއާތަކުން ރިޕޯޓްކޮށްފައިވާ ގޮތުގައި، ސުލައިމާނިއްޔާ ޕްރޮވިންސްގެ އަރަބާތު، ޒަރްކުއިޒް އަދި ސުރުދާޝް ކައިރިން މަދުވެގެން ހަތަރު ގޮވުމެއްގެ އަޑު ވަނީ އިވިފައެވެ. މި ހަމަލާތައް އަމާޒުކޮށްފައިވަނީ ޢިރާޤުގައި ހަރަކާތްތެރިވާ އީރާނުގެ ކުރުދީ ހަތިޔާރު އެޅި ޖަމާޢަތެއް ކަމަށްވާ "ކުރުދިސްތާން ޓޮއިލާސް އެސޯސިއޭޝަން" ނުވަތަ ކޯމަލާގެ މައި މަރުކަޒަށެވެ.
މި ހަމަލާތަކުގެ ޒިންމާ އުފުލަނީ ކޮން ފަރާތަކުން ކަމެއް އަދި މިހާތަނަށް ސާފުވެފައެއް ނުވެއެވެ.
މި ހަމަލާތައް ދީފައި މިވަނީ، އީރާނާ ދެކޮޅަށް ބަޣާވާތް ކުރުމަށް ހިތްވަރު ދިނުމުގެ ގޮތުން އެމެރިކާއިން އެ ސަރަޙައްދުގެ ކުރުދީ ޖަމާޢަތްތަކާ ގުޅުން ބާއްވަމުންދާ ކަމުގެ ރިޕޯޓްތަކެއް ފެންމަތިވެފައި ވަނިކޮށެވެ. އަދި ޢިރާޤާއި އީރާނު ގުޅޭ ބޯޑަރު ސަރަޙައްދުގައި "ޓެރަރިސްޓް ހަރަކާތްތަކެއް" ހިންގަމުންދާ ކަމަށް ބުނެ އީރާނުން އިންޒާރު ދީފައިވާ ދަނޑިވަޅެއްގައެވެ.
