ޚާމަނާއީ އަވަހާރަ ކޮށްލުމުން، އިރާގުން ތިން ދުވަހުގެ ރަސްމީ ހިތާމަ އިއުލާން ކޮށްފި

އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލުމާ ގުޅިގެން، އިރާގުގެ ސަރުކާާރުން ތިން ދުވަހުގެ ރަސްމީ ހިތާމަ އިއުލާާން ކޮށްފި އެވެ. 

އިރާގުގެ ސަރުކާރުގެ ތަރުޖަމާނު ބާސިމް އަލްއަވާދީ ވިދާޅުވީ، އިލްމުވެރިއެއް އަދި މުޖާހިދެއްގެ ގޮތުގައި ހުންނެވި ރޫހާނީ ލީޑަރު ޚާމަނާއީ އަވަހާރަވުމުން ވަރަށް ބޮޑަށް ހިތާމަ ކުރައްވާ ކަމަށެވެ. އަދި އެ ހާދިސާއާ ގުޅިގެން އީރާންގެ ރައްޔިތުންނާއި، މުޅި އިސްލާމީ އުންމަތަށް ތައުޒިޔާ ފޮނުވާ ކަމަށް ވެސް އޭނާ ވިދާޅުވެފައިވެ އެވެ. އިރާގުން ސިފަ ކޮށްފައިވާ ގޮތުގައި މި ހަމަލާ އަކީ އިންސާނީ އަދި އަޚުލާގީ މިންގަނޑުތަކާއި، އަދި ބައިނަލްއަޤުވާމީ ޤާނޫނު ތަކާ ޚިލާފު އަމަލެކެވެ. 

އައިއެންއޭ ނޫސް އިދާރާ އިން އަލްއަވާދީއާ ހަވާލާދި ރިޕޯޓު ކޮށްފައި ވަނީ، ޚާމަނާއީ އަކީ އިސްލާމީ އުންމަތުގެ އެންމެ ކުރީ ސަފުގައި ހިމެނޭ ބޭފުޅެއްގެ ގޮތުގައި އަލްއަވާދީ ސިފަ ކުރައްވާފައިވާ ކަމަށެވެ. އަދި ޚާމަނާއީ އަވަހާރަ ކޮށްލުމަކީ ވަރަށް ސާފުކޮށް ހިންގާފައިވާ އަމަލެއް ކަމަށާއި، އެއީ ދެރަވެ އަދި ހިތާމަ ކުރާ ފަދަ އަމަލެއް ކަމަށް ވެސް، އިރާގު ސަރުކާރުގެ ތަރުޖަމާނު ވިދާޅުވެފައިވެ އެވެ. 

އިރާގުގެ ސަރުކާާރުން ތިން ދުވަހުގެ ރަސްމީ ހިތާާމަ އިއުލާާން ކުރުމަކީ، އީރާން އާއި އިރާގާ ދެމެދު އޮންނަ ގާތް ގުޅުން ހާމަވާ ކަމެކެވެ. މި ދެ ޤައުމުގެ ދެ މެދުގައި ދީނީ، ސިޔާސީ އަދި އިޤްތިޞާދީ ގުޅުންތައް ވަރަށް ބަދަހިކޮށް އޮންނަކަން ފާހަގަވެފައިވެ އެވެ. އިރާގުގެ އިތުރުން، ސަރަހައްދުގެ އެހެން ޤައުމު ތަކުން ވެސް ވަނީ މި ހާދިސާއާ ގުޅިގެން ކަންބޮޑުވުން ފާޅުކޮށް، އީރާން އަށް ތައުޒިޔާ ފޮނުވައިފަ އެވެ. 

އެމެރިކާ އާއި އިޒްރޭލް އިން ހޮނިހިރު ދުވަހު އީރާން އަށް ދޭން ފެށި ހަމަލާ ތަކުގައި ޚާމަނާއީގެ އިތުރުން، އީރާނުގެ ސަރުކާރުގެ އިސްވެރިން އަދި އަސްކަރިއްޔާގެ އިސްވެރިން ވެސް ވަނީ އަވަހާރަ ކޮށްލައިފަ އެވެ.