އީރާނުގެ ހަނގުރާމައިގެ ތެރެއަށް ރަޝިޔާ ނުވަނުމަށް އެމެރިކާ އިން ގޮވާާލައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ތެރެއަށް ރަޝިޔާ ނުވަނުމަށް، އެމެރިކާ އިން ގޮވާލައިފި އެވެ. 

އެމެރިކާއިން މިހެން ގޮވައިލީ އެ ޤައުމުގެ ސެކްރެޓަރީ އޮފް ވޯ ޕީޓް ހެގްސެތު އެވެ. ހެގްސެތު މިފަދައިން ވާހަކަ ދައްކަވާފައި މި ވަނީ، އެމެރިކާގެ ރައީސް ޑޮނަލްޑް ޓްރަމްޕް އާއި، ރަޝިޔާގެ ރައީސް ވްލަޑިމިއަރ ޕުޓިން ފޯނުން ގުޅުއްވައި މަޝްވަރާ ތަކެއް ވެސް ކުރެއްވި ފަހުންނެވެ. 

އެމެރިކާގެ ޕެންޓަގަންގައި ބޭއްވި ނޫސްވެރިންގެ ބައްދަލުވުމުގައި ހެގްސެތު ވިދާޅުވީ އެ ފޯނު ކޯލުގައި އޭނާ ބައިވެރިވެފައި ނެތް ނަމަވެސް، ބައިވެރިވި ބޭފުޅުން ބުނެފައި ވަނީ އެއީ ވަރަށް ވަރުގަދަ ކޯލެއް ކަމަށެވެ. އެއާ އެކު ހެގްސެތު ވަނީ، ރަޝިޔާ އާއި ޔޫކްރެއިންއާ ދެމެދު ސުލްޙަ ޤާއިމު ކުރުމުގެ ފުރުސަތު އޮތް ކަމަށް ތަކުރާރުކޮށް ވިދާޅުވެފަ އެވެ. 

އެކަން ފާހަގަ ކުރައްވައި ހެގްސެތު ވިދާޅުވީ، މިހާރު އީރާންއާ ދެކޮޅަށް ކުރަމުން އަންނަ ހަނގުރާމައިގައި ރަޝިޔާ ބައިވެރި ނުވުމަށް އެދޭ ކަމަށެވެ. ހެގްސެތު މިހެން ވިދާޅުވެފައިވާއިރު، ރަޝިޔާ އިން ވަނީ އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ ކުށްވެރި ކޮށްފަ އެވެ. އީރާން އާއި ރަޝިޔާ އަކީ ގާތް ގުޅުމެއް އޮންނަ ދެ ޤައުމަށް ވާއިރު، ދާދި ފަހުން އީރާންގެ އައު ރޫހީ ލީޑަރުގެ މަގާމަށް އައްޔަން ކުރެވުނު މުޖުތަބާ ޚާމަނާއީ އަށް ވެސް ރަޝިޔާގެ ރައީސް ޕުޓިން ވަނީ މަރުޙަބާ ވިދާޅުވެފަ އެވެ. 

މިދިޔަ ހަފުތާގެ ތެރޭގައި އެމެރިކާ ސަރުކާރުގެ ބައެއް އިސް ފަރާތް ތަކުން ބުނެފައި ވަނީ، އެމެރިކާގެ މަސައްކަތް ތަކުގެ މައުލޫމާތާއި، އެމެރިކާގެ ތަންތަނުގެ މައުލޫމާތު ރަޝިޔާ އިން އީރާން އަށް ދެމުން އަންނަ ކަމަށެވެ. އަދި އެ މައުލޫމާތު ބޭނުން ކޮށްގެން، އީރާން އިން މެދު އިރުމަތީގައި ހުރި އެމެރިކާގެ އަމާޒު ތަަކަށް ހަމަލާ ދިނީ ކަމަށް ވެސް ބުނެފައިވެ އެވެ. 

ނަަމަވެސް، އެމެރިކާގެ ރައީސް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ވަނީ ރަޝިޔާ އިން އެފަދަ މައުލޫމާތު ދޭ ކަމަށް ބުނާ ވާހަކަ ތަކަކީ ދޮގެއް ކަމަށް ފާހަގަ ކޮށްފަ އެވެ. އަންގާރަ ދުވަހު ވިޓްކޮޮފް ވިދާޅުވީ، އެ މައްސަލައިގައި ރަޝިޔާ އިން ދައްކާ ވާހަކަ އާއި، އެ ޤައުމުން ބުނާ ބުނުން ޤަބޫލު ކުރެވޭ ކަމަށެވެ.