ޕްރިން ސުލްޠާން އެއާ ބޭސް އަށް އަމާޒު ކުރި ހަ ބެލިސްޓިކް މިސައިލް ސައުދީ އިން ނައްތާލައިފި

ޕްރިން ސުލްޠާން އެެއާ ބޭސް އަށް އަމާޒުކޮށް ފޮނުވާލި ހަ ބެލިސްޓިކް މިސައިލް ހުއްޓުވައި، އެ މިސައިލްތައް ނައްތާލާފައިވާ ކަމަށް ސައުދީ އަރަބިއްޔާގެ ޑިފެންސް މިނިސްޓްރީ އިން ބުނެފި އެވެ. 

ބުދަ ދުވަހު ސައުދީގެ ޑިފެންސް މިނިސްޓްރީ އިން ބުނެފައި ވަނީ، އެ ޤައުމުގެ އިރު ދެކުނު ސަރަހައްދާ ދިމާއަށް ދޫކުރި އިތުރު ބެލިސްޓިކް މިސައިލެއް ވެސް ހުއްޓުވައި ނައްތާލާފައިވާ ކަމަށާއި، ގިނަ ޑްރޯން ތަކެއް ވެސް ހުއްޓުވާފައިވާ ކަމަށެވެ. 

ޑިފެންސް މިނިސްޓްރީ އިން ސޯޝަލް މީޑިއާގައި ކުރި ވަކި ވަކި ޕޯސްޓު ތަކުގައި ބުނީ، ޝައިބާ ފީލްޑްއާ ދިމާާލަށް ދަތުރު ކުރަމުން ދިޔަ ހަތް ޑްރޯންއެއް ވައިގެ ދިފާއުން ވައްޓާލާފައިވާ ކަމަށެވެ. ހަމަ އެހެންމެ، ހަފަރް އަލް ބާޓީންގައި އިތުރު ޑްރޯން ތަކެއް ނައްތާލާފައިވާ ކަމަށް ވެސް ޑިފެންސް މިނިސްޓްރީ އިން ބުނެފައިވެ އެވެ. 

މީގެ އިތުރުން ޑިފެންސް މިނިސްޓްރީ އިން ބުނެފައި ވަނީ އެ ހަމަލާތައް ދީފައި ވަނީ ސައުދީގެ މުހިންމު ސިފައިންގެ މަރުކަޒުތަކާއި، ތެލުގެ ވަސީލަތްތައް ހިމެނޭ ސަރަހައްދަކަށް ކަމަށެވެ. ޕްރިން ސުލްޠާން އެއާ ވޭސް އަކީ ސައުދީ އަރަބިއްޔާގެ އެންމެ މުހިންމު ސިފައިންގެ އެއާ ބޭސް ތަކުގެ ތެރެއިން އެއް ބޭސް ކަމަށްވާއިރު، ޝައިބާ އަކީ ތެލުގެ އެންމެ މުހިންމު ސަރަހައްދެވެ. 

މި ހަމަލާތައް ހުއްޓުވުމަށް ސައުދީ އަރަބިއްޔާގެ ދިފާއީ ބާރު ތަކުން ކާމިޔާބު ހޯދާފައިވާ ކަމަށް ބުނެފައިވާއިރު، އެކަމުގެ ތެރޭގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށް ޑިފެންސް މިނިސްޓްރީ އިން ހާމަ ކޮށްފައިވެ އެވެ. މި ހަމަލާ ތަކުގައި ބޭނުން ކުރި ޑްރޯން ތަކާއި، މިސައިލްތައް ހުއްޓުވުމަށް ބޭނުން ކޮށްފައި ވަނީ ޒަމާނީ ދިފާާއީ ނިޒާމު ތަކުން ކަމަށް ވެސް ޑިފެންސް މިނިސްޓްރީ އިން ބުނެފައިވެ އެވެ. 

ނަމަވެސް، ސައުދީގެ ޑިފެންސް މިނިސްޓްރީގެ ބަޔާނުގައި އެއީ ކޮން ފަރާތަކުން އަމާޒު ކުރި ހަމަލާ ތަކެއް ކަމެއް ބުނެފައި ނުވެ އެވެ. ނަމަވެސް، މީގެ ކުރިން ވެސް ސައުދީ އަރަބިއްޔާ އަށް މިފަދަ ހަމަލާ ތަކެއް އަމާޒުވެފައިވާއިރު، މިއީ ސަރަހައްދީ ހަނގުރާމައާ ގުޅުން ހުރި ހަމަލާ ތަކެއް ކަމަށް ބެލުމުގެ ފުރުސަތު އެބަ އޮތް ކަމަށް މާހިރުން ބުނެ އެވެ.