އީރާނުން އިޒްރޭލުގެ ހައިފާގެ ތެޔޮ ރައްކާކުރާ މަރުކަޒަށް ހަމަލާދީފި

އީރާންގެ ތެޔޮ ގުދަންތަކަށް އިޒްރޭލުން ދިން ހަމަލާތަކުގެ ބަދަލުހިފުމުގެ ގޮތުން، ހައިފާގައި ހުންނަ އިޒްރޭލުގެ ތެޔޮ ރައްކާކުރާ މަރުކަޒުތަކަށް އީރާންގެ ވައިގެ ސިފައިން ޑްރޯން ހަމަލާތަކެއް ދީފިކަން އެ ގައުމުގެ އަސްކަރިއްޔާއިން އަންގާރަ ދުވަހު އިއުލާންކޮށްފިއެވެ.

އީރާންގެ އަސްކަރިއްޔާއިން ނެރުނު ބަޔާނުގައި ބުނެފައިވަނީ، އެމެރިކާ އާއި ކުޑަކުދިން މަރަމުންދާ ޒަޔަނިސްޓް އިޒްރޭލުން ހިންގާ ޖަރީމާތަކާ ދެކޮޅަށް ކުރާ ހަނގުރާމަ، ބާތިލުގެ މައްޗަށް ހައްގަށް ނަސްރު ލިބެންދެން މެދުކެނޑުމެއް ނެތި ކުރިއަށްދާނެ ކަމަށެވެ.

އެމެރިކާ އާއި ޒަޔަނިސްޓް އިޒްރޭލުން އީރާނާ ދެކޮޅަށް ފުޅާ ދާއިރާއެއްގައި އަސްކަރީ ހަރަކާތްތަކެއް ފަށާފައިވަނީ، ފެބްރުއަރީ މަހުގެ 28 ވަނަ ދުވަހު އީރާންގެ އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި، އަސްކަރިއްޔާގެ އިސް ކޮމާންޑަރުންތަކެއްގެ އިތުރުން އާންމު ރައްޔިތުންތަކެއް އަވަހާރަކޮށްލުމާ ގުޅިގެންނެވެ.

އެމެރިކާ އާއި އިޒްރޭލުން އީރާނަށް ދެމުންދާ ހަމަލާތަކުގައި އެ ގައުމުގެ އަސްކަރީ މަރުކަޒުތަކަށާއި އާންމުން ދިރިއުޅޭ ސަރަހައްދުތަކަށް ވައިގެ މަގުން ގިނަ ހަމަލާތަކެއް ދީފައިވާއިރު، މި ހަމަލާތަކުގައި ގިނަ ބަޔަކު މަރުވެ، އީރާންގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.

މި ހަމަލާތަކަށް ރައްދު ދިނުމުގެ ގޮތުން އީރާންގެ ހަތިޔާރު އެޅި ފައުޖުތަކުން ދަނީ އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި އެމެރިކާ އާއި އިޒްރޭލުގެ މަރުކަޒުތަކަށާއި، ސަރަހައްދީ ގައުމުތަކުގައި ހުރި އެ ގައުމުތަކުގެ އަސްކަރީ ބޭސްތަކަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތައް ފޮނުވަމުންނެވެ.