އީރާނާ ދެކޮޅަށް ކުރާ ހަނގުރާމާގައި އެމެރިކާގެ 140 ސިފައިން ޒަޚަމްވެއްޖެ ކަމަށް ޕެންޓަގަން އިން ބުނެފި
އީރާނުން ދިން ހަމަލާތަކުގައި އެމެރިކާ ސިފައިންގެ ހަތް މީހަކު މަރުވެފައިވާ ކަމަށް އެމެރިކާގެ އަސްކަރިއްޔާއިން މީގެ ކުރިން ވަނީ ހާމަކޮށްފައި.
ޔޫއެސް ނޭވީން އާންމުކޮށްފައިވާ މި ފޮޓޯއިން ފެންނަނީ، 2026 މާރިޗު 1 ވަނަ ދުވަހު ކަނޑުމަތީގައި ކުރިއަށްދިޔަ "އޮޕަރޭޝަން އެޕިކް ފިއުރީ" އަށް އެހީތެރިކަން ފޯރުކޮށްދިނުމުގެ ގޮތުން، ނިމިޓްޒް ކްލާސްގެ މަތިންދާބޯޓު އުފުލާ މަނަވަރު، ޔޫއެސްއެސް އަބްރަހަމް ލިންކަން (CVN 72) ގެ ފްލައިޓް ޑެކުން ފުރުމަށް ތައްޔާރުވަމުންދާ ސްޓްރައިކް ފައިޓަރ ސްކޮޑްރަން (VFA) 14 ގެ އެފް/އޭ-18އީ ސުޕަރ ހޯނެޓް މަތިންދާބޯޓެެއް. | ގެޓީ އިމޭޖަސް
އީރާނާ ދެކޮޅަށް ކުރަމުންދާ ހަނގުރާމަ ފެށުނު ފަހުން މިހާތަނަށް ދިން އެކި ހަމަލާތަކުގައި އެމެރިކާ ސިފައިންގެ 140 މީހަކު ޒަޚަމްވެފައިވާ ކަމަށް ޕެންޓަގަނުން އަންގާރަ ދުވަހު ބުނެފިއެވެ.
ޕެންޓަގަންގެ ތަރުޖަމާނު ސޯން ޕާނެލް ނެރުއްވި ބަޔާނެއްގައި ވިދާޅުވީ، ޒަޚަމްވި ސިފައިންގެ ތެރެއިން ގިނަ މީހުންނަށް ލިބިފައިވަނީ ކުދި އަނިޔާތައް ކަމަށާއި، އޭގެ ތެރެއިން 108 ސިފައިން މިހާރު އަލުން ޚިދުމަތަށް ނުކުމެފައިވާ ކަމަށެވެ.
މީގެ އިތުރުން ޕާނެލް ވިދާޅުވީ، ހަމަލާތަކުގައި ސީރިއަސް އަނިޔާތަކެއް ލިބުނު އަށް ސިފައިންނަށް މިހާރުވެސް އެންމެ މަތީ ފެންވަރުގެ ސިއްހީ ފަރުވާ ދެމުންދާ ކަމަށެވެ.
މި ހަނގުރާމައިގެ ކުރީކޮޅު އީރާނުން ދިން ހަމަލާތަކުގައި އެމެރިކާ ސިފައިންގެ ހަތް މީހަކު މަރުވެފައިވާ ކަމަށް އެމެރިކާގެ އަސްކަރިއްޔާއިން މީގެ ކުރިން ވަނީ ހާމަކޮށްފައެވެ.
އެމެރިކާ އާއި އިޒްރޭލުގެ ފައުޖުތަކުން ގުޅިގެން ފެބްރުއަރީ މަހުގެ 28 ވަނަ ދުވަހު އީރާނާ ދެކޮޅަށް ވަރުގަދަ ވައިގެ ހަމަލާތަކެއް ދޭން ފެށުމުން، އީރާނުން ވަނީ އެ ސަރަހައްދުގެ އެކި ގައުމުތަކުގައި ހުރި އެމެރިކާގެ މަރުކަޒުތަކަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތަކެއް ދީފައެވެ.
ޕެންޓަގަންގެ ވެރިޔާ ޕީޓް ހެގްސެތު އަންގާރަ ދުވަހުގެ ކުރީކޮޅު ވިދާޅުވީ، އީރާނަށް އަމާޒުކޮށް އެމެރިކާއިން ދެމުންދާ ހަމަލާތައް މިހާރު އިތުރަށް ވަރުގަދަކޮށްފައިވާ ކަމަށެވެ.
