އީރާނުގެ އައު ރޫހީ ލީޑަރަށް އޮމާން އިން ވެސް މަރުޙަބާ ކިޔައިފި

އީރާންގެ ރޫހީ ލީޑަރު ނުވަތަ، އެންމެ މަތީ ވެރިޔާގެ މަޤާމަށް އައްޔަން ކުރި މުޖުތަބާ ޚާމަނާއީ އަށް، އޮމާން އިން ވެސް މަރުޙަބާ ކިޔައިފި އެވެ.

އޮމާންގެ ރަސްމީ ނޫސް އެޖެންސީ އިން ރިޕޯޓު ކޮށްފައިވާ ގޮތުގައި، އެ ޤައުމުގެ ސުލްޠާން ހައިޘަމް ބިން ޠާރިޤު ވަނީ މުޖުތަބާ ޚާމަނާއީ އަށް މަރުޙަބާ ވިދާޅުވެފަ އެެވެ. އެ މަރުޙަބާގައި ވަނީ އޮމާާން އާއި އީރާނާ ދެމެދު އޮންނަ ގުޅުން އިތުރަށް ބަދަހިވުމަށް ވެސް އެދިވަޑައިގެންފައި އެވެ.

އީރާނުގެ އައު ރޫހީ ލީޑަރުގެ މަޤާމަށް އައްޔަން ކުރި މުޖުތަބާ ޚާމަނާއީ އަކީ، އެ ޤައުމުގެ ކުރީގެ ރޫހީ ލީޑަރު އާޔަތުﷲ އަލީ ޚާމާނައީގެ ދަރިކަލުންނެވެ. މުޖުތަބާ ޚާމަނާއީ އަކީ، އިސްލާމީ އިންޤިލާބަށް ފަހު އީރާންގައި އައްޔަން ކުރި ތިން ވަނަ ރޫހީ ލީޑަރެވެ.

އެމެރިކާ އާއި އިޒްރޭލުން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން މެދު އިރުމަތީގައި ނުތަނަވަސްކަން ބޮޑުވެފައިވާއިރު، އޮމާން އިން ގެންދަނީ މަސްރަހު ފިނި ކުރުމަށް ވަރަށް ބޮޑަށް މަސައްކަތް ކުރަމުންނެވެ. އަދި ހަނގުރާމަ ހުއްޓާލުމަށް ވެސް އޮމާން އިން ވަނީ ގޮވާލައިފަ އެވެ. 

މެދު އިރުމަތީގައި އުފެދިފައިވާ ނުތަނަވަސްކަމުގެ އަސަރު އޮމާނަށް ވެސް ވަނީ ފޯރައިފަ އެވެ. އެގޮތުން މާޗު މަހުގެ ތިން ވަނަ ދުވަހު ވަނީ އޮމާންގެ ވިޔަފާރި ބަނދަރެއް ކަމަށްވާ ދުގުމްގައި ހުރި ތެޔޮ ރައްކާ ކުރާ ޓޭންކަކަށް ގިނަ އަދަދެއްގެ ޑްރޯން ހަމަލާ ތަކެއް ވަނީ އަމާޒުވެފަ އެވެ. އެއީ އެމެރިކާ އާއި އިޒްރޭލުން އީރާން އަށް ހަމަލާ ދެމުން ދިޔަ ވަގުތެއްގަ އެވެ. 

އެމެރިކާ އާއި އިޒްރޭލްގެ ހަމަލާ ތަކަށް ރައްދު ދިނުމުގެ ގޮތުން، އީރާނުން ވެސް ވަނީ ހަމަލާ ތަކެއް ދީފަ އެވެ. އެގޮތުން އީރާން އިން ހަމަލާ އަމާޒު ކޮށްފައި ވަނީ މެދު އިރުމަތީގެ ސަރަހައްދުގައި ހުރި އެމެރިކާގެ އަސްކަރީ ބޭސް ތަކުގެ އިތުރުން، އެމެރިކާގެ އެމްބަސީ ތަކަށެވެ. 

އޮމާން އަކީ އާންމު ގޮތެއްގައި އީރާން އާއި، ހުޅަނގުގެ ޤައުމުތަކާ ދެމެދު މެދުވެރިއެއްގެ ދައުރު އަދާ ކުރާ ޤައުމަކަށް ވާއިރު، އީރާންގެ އައު ރޫހީ ލީޑަރާ އެކު އޮމާން އިން ބާއްވާ ގާތް ގުޅުމަކީ ސަރަހައްދީ ހަމަޖެހުމަށް މުހިންމު ކަމެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ. އޮމާންގެ ސުލްޠާންގެ މަރުޙަބާގެ މި މެސެޖަކީ ދެ ޤައުމުގެ ދެ މެދުގައި އޮތް ޒަމާންވީ ގުޅުން ދެމެހެއްޓުމަށް ބާރު އެޅުމުގެ ގޮތުން ފޮނުވި މެސެޖެއް ކަމަށް ބެލެވެ އެވެ. 

އޮމާންގެ ސުލްޠާންގެ އިތުރުން، ރަޝިޔާގެ ރައީސް ވްލަޑިމިއަރ ޕުޓިން ވެސް ވަނީ އީރާންގެ އައު ރޫހީ ލީޑަރަަށް މަރުޙަބާ ވިދާޅުވެފަ އެވެ. ރަޝިޔާ އިން ވެސް ވަނީ އީރާންއާ އެކު އޮތް ގާތް ގުޅުން ދަމަހައްޓައި، އެ ގުޅުން ވަރުގަދަ ކުރާނެ ކަމަށް ހާމަ ކޮށްފަ އެވެ.