އީރާން ހަނގުރާމަ އިން އެންމެ ބޮޑު ފައިދާއެއް ލިބެނީ ހަމައެކަނި ރަޝިޔާ އަށް: ޔޫރަޕިއަން ކައުންސިލްގެ ރައީސް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި އެންމެ ބޮޑު ފައިދާއެއް ލިބުނު ހަމައެކަނި ޤައުމަކީ ރަޝިޔާ ކަމަށް، ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވެއްޖެ އެވެ.

ބެލްޖިއަމްގެ ވެރި ރަށް ބްރަސަލްސްގައި ތިއްބަވާ ޔޫރަޕުގެ އިއްތިހާދުގެ ސަފީރުންނާ މުޚާބަތު ކުރައްވައި ދެއްވި ތަޤުރީރެއްގައި ކޮސްޓާ ވަނީ، މެދު އިރުމަތީގެ މަސްރަހު ގޯސްވުމުގެ ސަބަބުން ރަޝިޔާ އަށް ލިބެމުންދާ ސިޔާސީ، އަދި އިޤްތިޞާދީ ކުރިއެރުން ތަކަށް އަލިއަޅުވާލައްވައިފަ އެވެ. 

އެގޮތުން ކޮސްޓާ ވިދާޅުވި ގޮތުގައި މެދު އިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ހަކަތައިގެ އަގުތައް އުފުލުމަކީ ރަޝިޔާ އަށް ލިބޭ ވަރަށް ބޮޑު މާލީ ކުރިއެރުމެއް ކަަމަށެވެ. މިގޮތުން ހަކައިގެ އަގު ބޮޑުވުމުން ލިބޭ އިތުރު އާމްދަނީ ރަޝިޔާ އިން ބޭނުން ކުރަމުން ދަނީ ޔޫކްރެއިންއާ ދެކޮޅަށް ކުރަމުންދާ ހަނގުރާމަ އަށް ފަންޑު ކުރުމަށް ކަަމަށް އޭނާ ފާހަގަ ކުރެއްވި އެވެ. މީގެ އިތުރުން، ޔޫކްރެއިން އަށް ފޮނުވަން ހުރި އަސްކަރީ ވަސީލަތްތައް މެދު އިރުމަތީގެ މަސްރަހަށް ބަދަލު ކުރަން ޖެހުމަކީ ވެސް، ރަޝިޔާ އަށް ލިބޭ ނުސީދާ ފައިދާއެއް ކަމަށް އޭނާ ވިދާޅުވި އެވެ. 

ހަމަ އެހެންމެ، ބައިނަލްއަޤުވާމީ މުޖުތަމައުގެ ސަމާލުކަން ޔޫކްރެއިންގެ ހަނގުރާމަ އިން ކުޑަވެ، މެދު އިރުމަތީގެ މަސްރަހަށް ހުއްޓުމަކީ ރަޝިޔާ އަށް ލިބޭ ވަރަށް ބޮޑު ލުޔެއް ކަމަށް ކޮސްޓާ ވަނީ ފާހަގަ ކުރައްވައިފަ އެވެ. އޭނާ ފާހަގަ ކުރެއްވި ގޮތުގައި ދުނިޔޭގެ ސަމާލުކަން އެހެން ދިމާލަކަށް އެނބުރިފައި އޮތުމުން، ޔޫކްރެއިންގެ ފްރަންޓްލައިންގައި ރަޝިޔާ އިން ކުރިއެރުން ތަކެއް ހޯދުމަށް ފަސޭގަ ވެގެން ދާނެ އެވެ. 

ޔޫރަޕިއަން ކައުންސިލްގެ ރައީސްގެ ވާހަކަފުޅުގައި ވަނީ އެމެރިކާގެ ސިޔާސަތަށް ވެސް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ބައިނަލްއަޤުވާމީ ޤަވާއިދު ތަކުގެ މައްޗަށް ބިނާވެފައިވާ ނިޒާމަށް އެމެރިކާ އިން ގޮން ޖަހަމުންދާ ކަމަށާއި، އެ ނިޒާމު ހިމާޔަތް ކުރުމަށް ޔޫރަޕުގެ އިއްތިހާދުނ މަސައްކަތް ކުރަން ޖެހޭ ކަމަށް އޭނާ ވިދާޅުވި އެވެ. މިއީ ދުނިޔޭގެ ހަމަޖެހުމަށް ކޮންމެހެން މުހިންމު ކަމެއްގެ ގޮތުގައި އޭނާ ވަނީ ސިފަ ކުރައްވައިފަ އެވެ. 

މެދު އިރުމަތީގެ މަސްރަހު އިތުރަށް ގޯސްދިޔަ ނުދީ ހިފެހެއްޓުމުގެ މުުހިންމު ކަމުގެ މައްޗަށް ވެސް ކޮސްޓާ ވަނީ އަލިއަޅުއްވާލައްވައި ވާހަކަ ދައްކަވައިފަ އެވެ. އަދި އެ ހަމަނުޖެހުން އިތުރަށް ފުޅާ ވެގެން ދިޔުމަކީ، މެދު އިރުމަތީގެ އިތުރުން، ޔޫރަޕާއި މުޅި ދުނިޔެ އަށް ވެސް އޮތް ބޮޑު ނުރައްކަލެއް ކަމަށް އޭނާ ފާހަގަ ކުރެއްވި އެވެ.