އެމެރިކާއާ މަޝްވަރާ ނުކުރާނަން، މިސައިލް ހަމަލާ ދިނުން ކުރިއަށް ގެންދާނަން: އީރާނުގެ ފޮރިން މިނިސްޓަރު އަރާގްޗީ

އެމެރިކާ އާއެކު މަޝްވަރާ ކުރުމުގެ އެއްވެސް ވިސްނުމެއް އީރާނުގައި ނެތް ކަމަށާއި، ބޭނުން ވެއްޖެ ކޮންމެ ހިނދެއްގައި އީރާނުން މިސައިލް ހަމަލާތައް ދިނުމުގައި ދެމި އޮންނާ ކަމަށް އެ ޤައުމުގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

އަންގާރަ ދުވަހު އެމެރިކާގެ ޕީބީއެސް ނިއުސް އަށް ދެއްވި ބަސްދީގަތުމެއްގައި އީރާނުގެ ފޮރިން މިނިސްޓަރު އަރާގްޗީ ވިދާޅުވީ، އީރާން އިން މިސައިލް ހަމަލާތައް ދިނުން ކުރިއަށް ގެންދިޔުމަށް ފުރިހަމަ އަށް ތައްޔާރުވެފައިވާ ކަމަށެވެ. އަދި އެމެރިކާ އާއެކު، އެއްވެސް ކަމެއްގައި މަޝްވަރާ ކުރުމަކީ މިވަގުތު އީރާންގެ އެޖެންޑާގައި އޮތް ކަމެއް ނޫން ކަމަށް ވެސް އަރާގްޗީ ވިދާޅުވި އެވެ. 

އީރާންގެ ފޮރިން މިނިސްޓަރު އަރާގްޗީ މިހެން ވިދާޅުވެފައި މި ވަނީ، އީރާންއާ ދެކޮޅަށް ކުރިއަށް ގެންދާ ހަނގުރާމަ ވަރަށް އަވަހަށް ނިމުމަކަށް އަންނާނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވާ ވަގުތެއްގަ އެވެ. ޓްރަމްޕްގެ އެ ވާހަކަ ތަކަށް ރައްދު ދެއްވަމުން އަރާގްޗީ ވަނީ، މަޝްވަރާގެ ދޮރުތައް ބަންދުވެފައިވާ ކަމަށް ހާމަ ކުރައްވައިފަ އެވެ. އަދި އަސްކަރީ ގޮތުން ކުރިމަތިލުމަށް އީރާން އިން ފަސް ނުޖެހޭނެ ކަމުގެ އިންޒާރު ވެސް އަރާގްޗީ ދެއްވި އެވެ. 

މީގެ އިތުރުން އަރާގްޗީ ވިދާޅުވީ، އީރާންގެ ދިފާއުގައި ކުރަން ޖެހުނު ކޮންމެ ކަމެއް ކުރުމުގެ ޤާބިލުކަން އެ ޤައުމަށް ލިބިގެންވާ ކަމަށެވެ. އަދި މިސައިލް ހަމަލާ ތަކަކީ ބޭނުންވާ މަޤުސަދު ޙާސިލުވަންދެން ކުރިއަށް ގެންދާނެ ޙަމަލާތަކެއް ކަމަށް ވެސް އަރާގްޗީ ވަނީ ހާމަ ކުރައްވައިފަ އެވެ. 

މެދު އިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި އީރާންގެ މި ނިންމުމާ އެކު އެމެރިކާ އާއި އީރަންގެ ގުޅުން އިތުރަށް ގޯސްވެ، އަސްކަރީ ކުރިމަތިލުންތައް ވަރުގަދަ ވެގެންދާނެ ކަމަށް ބައިނަލްއަޤުބާމީ މާހިރުން ލަފާ ކޮށްފައިވެ އެވެ.