މުޖުތަބާ ޚާމަނާއީ އަކީ ކުރިމަތިވި މާޔޫސް ކަމެއް: ޓްރަމްޕް

އެމެރިކާގެ ހަމަލާ ތަކެއްގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލުމާ ގުޅިގެން، އައު ރޫހީ ލީޑަރަކަށް އައްޔަން ކުރައްވާފައިވާ މުޖުތަބާ ޚާމަނާއީ އަކީ ކުރިމަތިވި މާޔޫސް ކަމެއް ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހޯމަ ދުވަހު އެމެރިކާގެ ފްލޮރިޑާއި ހުންނަވާ ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ އައު ރޫހީ ލީޑަރަކަށް މުޖުތަބާ ޚާމަނާއީ އައްޔަން ކުރުމަކީ މާޔޫސް ކަމެއް ކަމަށެވެ. ޓްރަމްޕް އެހެން ވިދާޅުވެފައިވާއިރު، މީގެ ކުރިން ވެސް އޭނާ ވަނީ މުޖުތަބާ ޚާމަނާއީ އަށް ނުރުހުން އަމާޒު ކުރައްވައި ފާޑު ވިދާޅުވެފަ އެވެ. 

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ އައު ލީޑަރުގެ ސަބަބުން އެ ޤައުމަށް ކުރިމަތިވެފައިވާ މައްސަލަ ތަަކަށް އެއްވެސް ޙައްލެއް ލިބޭނެ ކަމަށް ޤަބޫލުފުޅު ނުކުރައްވާ ކަމަށެވެ. އަދި މުޖުތަބާ ޚާމަނާއީގެ ޒައާމަތުގައި ވެސް ފެނިގެން ދާނީ، ކުރިން ވެސް އީރާން އިން ފެންނަމުން ދިޔަ ދަތި އަދި އުނދަގޫ ޙާލަތްތައް ކަަމަށް ޓްރަމްޕް ފާހަގަ ކުރެއްވި އެވެ. 

މުޖުތަބާ ޚާމަނާއީއާ ގުޅޭޭ ގޮތުން ޓްރަމްޕް ވާހަކަ ދެއްކެވުމުން، އޭނާ އަކީ އެމެރިކާގެ އަމާޒަކަށް ވެދާނެތޯ ނޫސްވެރިޔަކު ވަނީ ސުވާލު ކޮށްފަ އެވެ. އެ ސުވާލަށް ޖަވާބު ދެއްވަމުން ޓްރަމްޕް ވިދާޅުވީ، އީރާންގެ އައު ރޫހީ ލީޑަރު މުޖުތަބާ ޚާމަނާއީ އަކީ އެމެރިކާގެ އަމާޒެއްތޯ، ނުވަތަ ނޫންްތޯ ވިދާޅުވުމަކީ މިވަގުތު އެންމެ އެކަށީގެންވާ ކަމެއް ނޫން ކަމަށެވެ. ނަމަވެސް، މީގެ ކުރިން ޓްރަމްޕް ވިދާޅުވެފައި ވަނީ އެމެރިކާގެ ރުހުން ނެތް މީހަކު ރޫހީ ލީޑަރުގެ މަގާމަށް އައްޔަން ކޮށްފި ނަމަ، އޭނާ އަކީ އެމެރިކާގެ އަމާޒަކަށް ވާނެ ކަމަށެވެ. އަދި އެ މީހަކަށް މާާ ގިނަ ދުވަހު ވެރި ކަމުގައި ނުހުންނެވޭނެ ކަމަށް ވެސް ޓްރަމްޕް ވިދާޅުވެފައިވެ އެވެ. 

މީގެ އިތުރުން އީރާން އިން އެމެރިކާގެ އެތެރޭގައި ޙަރަކާތްތެރިވާ "ސްލީޕަރ ސެލް" ތަކެއް، ނުވަތަ ވަގުތު ޖެހުމުން ހަމަލާ ދޭން ތިބި ގުރޫޕު ތަކެއް ޙަރަކާތްތެރި ކުރުވަފާނެތީ، އެމެރިކާ އިން އެކަމަށް ވަރަށް ބޮޑަށް ސަމާލުވެގެން ތިބި ކަމަށް ޓްރަމްޕް ވިދާޅުވި އެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އެމެރިކާގެ ސަލާމަތީ ބާރު ތަކުން އެފަދަ ކަންކަން ވަރަށް ގާތުން ބަލަމުން ދާނެ ކަމުގެ ޔަޤީންކަން ދެއްވާ ކަމަށެވެ. 

އެމެރިކާ އިން އީރާންގެ ރޫހީ ލީޑަރު ޚާމަނާއީ އަވަހާރަ ކޮށްލުމާ ގުޅިގެން ދެ ޤައުމުގެ ދެ މެދުގައި ވަނީ ނުތަނަވަސްކަން ބޮޑުވެފަ އެވެ. ކުރީގެ ރޫހީ ލީޑަރު ޚާމަނާއީ އަވަހާރަ ކޮށްލި ހާދިސާ އަށް ފަހު، އީރާންގެ ސިޔާސީ މަސްރަހަށް ބޮޑެތި ބަދަލު ތަކެއް އަންނަމުންދާއިރު، އެމެރިކާ އާއި އީރާން އިން އަންނަނީ އެއް ޤައުމު އަނެއް ޤައުމަށް އިންޒާރު ދެމުންނެވެ.