އެމެރިކާ އާއި އިޒްރޭލްގެ ހަނގުރާމަ އެ ދެ ޤައުމަށް ނާކާމިޔާބު ކަމަށް އަރާގްޗީ ވިދާޅުވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ އަކީ އެ ދެ ޤައުމަށް ނާކާމިޔާބު ހަނގުރާމައެއް ކަމަށް، އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

އަރާގްޗީ މިހެން ވިދާޅުވެފައި ވަނީ، އީރާންއާ ދެކޮޅަށް އެމެރިކާ އާއި އިޒްރޭލް އިން ކުރަމުން އަންނަ ހަނގުރާމައާ ގުޅޭ ގޮތުން ވާހަކަ ދައްކަވަމުންނެވެ. 

އެގޮތުން އަރާގްޗީ ވިދާޅުވީ އެމެރިކާ އާއި އިޒްރޭލްގެ ފުރަތަމަ ރޭވުން ނުވަތަ، ޕްލޭން އޭ ފެއިލްވެފައިވާ ކަމަށެވެ. އޭގެ ފަހުން ވެސް އެކި ކަހަލަ ރޭވުންތައް ތަންފީޒު ކުރުމަށް މަސައްކަތް ކުރި ނަމަވެސް، އެ ހުރިހާ ކަމެއް ވެސް ނާކާމިޔާބު ވެފައިވާ ކަމަށް އަރާގްޗީ ވިދާޅުވި އެވެ. ހަމަ އެއާ އެކު، މި ހަނގުރާމައިގައި އެމެރިކާ އާއި އިޒްރޭލް އިން ޙާސިލު ކުރަން ބޭނުންވާ ވަކި ލަނޑު ދަނޑިއެއް ނެތް ކަމަށް ވެސް އޭނާ ތުހުމަތު ކުރެއްވި އެވެ. 

މީގެ އިތުރުން އަރާގްޗީ ވިދާޅުވެފައި ވަނީ ހަނގުރާމައިގައި ވަކި މިސްރާބެއް ނެތުމުގެ ސަބަބުން، އިޒްރޭލް އިން މިހާރު އަމާޒު ހިފާފައި ވަނީ އާންމުން ދިރިއުޅޭ ސަރަހައްދު ތަކަށް ވަކި ތަރުތީބެއް ނެތް ގޮތަށް ހަމަލާ ދިނުމަށް ކަމަށެވެ. މީގެ އިތުރުން އީރާންގެ ހަކަތައާ ބެހޭ އިންފްރާސްޓްރަކްޗާ އަށް ހަމަލާ ދިނުމުގެ ސަބަބުން، ދުނިޔޭގެ ބާޒާރުގައި ތެލުގެ އަގު އިންތިހާ އަށް އުފުލިގެން ގޮސްފައިވާ ކަމަށް އޭނާ ފާހަގަ ކުރެއްވި އެވެ. 

މީގެ ކުރިން ވެސް އެމެރިކާ އާއި އިޒްރޭލްއާ ދެކޮޅަށް ފާޅުގައި ބަސް ވިދާޅުވެފައިވާ އަރާގްޗީ ވަނީ، އިޒްރޭލް އިން މިހާރު ކުރިއަށް ގެންދާ އޮޕަރޭޝަން ތަކުން ޙާސިލު ކުުރަން އުޅޭ ބުއްދިވެރި އެއްވެސް މަޤުސަދެއް ފެންނަން ކަމަށެވެ. އެގޮތުން ހަނގުރާމަ ފެށުނުއިރު ކަނޑައެޅި މަޤުސަދުތައް ޙާސިލު ނުވުމުން، ފާއިތުވި 10 ދުވަހުގެ ތެރޭގައި އެ ޤައުމު ތަކުގެ އަމަލުތައް ހުރީ އެއްވެސް މިސްރާބެއް ނެތް ގޮތެއްގައި ކަމަށް އަރާގްޗީ ވަނީ ވިދާޅުވެފަ އެވެ. 

މި މޭރުމުން ވާހަކަ ދައްކަވަމުން އަރާގްޗީ ވަނީ، އީރާންގެ ދިފާއުގައި ސާބިތުވެ ތިބޭނެ ކަމުގެ ޔަޤީންކަން ދެއްވައިފަ އެވެ. އަދި ބޭރުގެ ބާރު ތަކުން އީރާންގެ އިސްތިޤުލާލަށް އަރައި ގަތުމަަށް ކުރާ މަސައްކަތް ކާމިޔާބުވިޔަ ނުދޭނެ ކަމަށް ވެސް އަރާގްޗީ ވިދާޅުވި އެވެ.