ހަނގުރާމަ ނިންމާނެ ވަގުތު ކަނޑަ އަޅާނީ އަހަރަމެން، އެމެރިކާ އަކުން ނޫން: އީރާން

އެމެރިކާ އާއި އިޒްރޭލުން އީރާންއާ ދެކޮޅަށް ކުރިއަށް ގެންދާ ހަނގުރާމަ ނިންމާނެ ވަގުތު ކަނޑަ އަޅާނީ އެ ޤައުމުން ކަމަށާއި، އެއީ އެމެރިކާާ އިން ކަނޑައަޅަން ޖެހޭ ކަމެއް ނޫން ކަމަށް އީރާނުން ބުނެފި އެވެ. 

އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ތަރުޖަމާނު ޖެނަރަލް މުޙައްމަދު ނައީނީ ވަނީ، އެމެރިކާގެ ރައީސް ޑޮނަލްޑް ޓްރަމްޕްގެ ވާހަކަ ތަކަށް ރައްދު ދެއްވައިފަ އެވެ. ޓްރަމްޕް ވިދާޅުވެފައި ވަނީ ހަނގުރާމަ ނިމެން މިހާރު ކައިރިވެފައިވާ ކަމަަށާއި، ވަރަށް އަވަހަށް ހަނގުރާމަ ނިމިދާނެ ކަމަށެވެ. 

އެ ވާހަކަ ތަކަށް ރައްދު ދެއްވައި ނައީނީ ވިދާޅުވީ، ޓްރަމްޕް ހައްދަވަނީ ކަނޑައެޅިގެން އިތުރުފުޅު ކަމަށެވެ. އެގޮތުން ޓްރަމްޕް މަސައްކަތް ކުރަމުން ގެންދަނީ ހަނގުރާމަ އިން ކުރިމަތިވެފައިވާ ލަދުވެތި ބަލިވުންތައް، އެއީ ކާމިޔާބީ ތަކަކަށް ހެއްދެވުމަށް ކަމަށް ވެސް އޭނާ ވިދާޅުވި އެވެ. 

ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، ނައީނީ ވިދާޅުވީ މި ހަނގުރާމައިގެ ނިމުން ކަނޑަ އަޅާނީ އީރާނުން ކަމަށެވެ. އެމެރިކާގެ ހަތިޔާރު ހުސްވަމުން އަންނަ ކަމަށާއި، އެމެރިކާ އިން މަސައްކަތް ކުރަނީ ހަނގުރާމައިން އިއްޒަތްތެރިކަމާއި ޝަރަފުވެރިކަމާ އެކު ނިކުމެވޭނެ ގޮތެއް ހޯދަން ކަަމަށް ވެސް ނައީނީ ވަނީ ވިދާޅުވެފަ އެވެ. 

މީގެ އިތުރުން ނައީނީ ވިދާޅުވީ ޕާޝިއަން ގަލްފު ސަރަހައްދުގައި އެމެރިކާގެ ހުރިހާ ހަނގުރާމައިގެ ބިނާ ތަކެއް ވަނީ ބަލި ކަށިވެފައި ކަމަށެވެ. އެކަން ފާހަގަ ކުރައްވައި އޭނާ ވިދާޅުވީ، އެކަން އެމެރިކާގެ ރައްޔިތުންނަށް ހަގީގަތަަށް ބުނެދޭން އެ ޤައުމުގެ ރައީސް ޓްރަމްޕް ބޭނުންފުޅު ނުވާ ކަމަށެވެ. 

އެމެރިކާ އާއި އިޒްރޭލްގެ ހަމަލާ ތަކުގެ ސަބަބުން އީރާންގެ މިސައިލް ޤާބިލުކަން ވަރަށް ބޮޑަށް ދަށްވެފައިވާ ކަމަށް ޓްރަމްޕް ވިދާޅުވެފައިވާއިރު، ނައީނީ ވަނީ އެ ވާހަކަތައް ދޮގު ކުރައްވައިފަ އެވެ. އޭނާ ވިދާޅުވީ މިހާރު ހަނގުރާމައިގެ ފުރަތަަމަ ދުވަސްތަކާ އަޅާ ބަލާއިރު، ބޮޑު އަދަދަކަށް މިސައިލްތައް ބޭނުން ކުރަމުން އަންނަ ކަމަށާއި، އެއީ ޓަނެއްގެ ބަރުދަނަށް ވުރެ ބޮޑު ހަތިޔާރުތައް ކަމަށެވެ.