އީރާންއާ ދެކޮޅަށް ދޭ ހަމަލާތައް އަދި ނުނިމޭ ކަމަށް ވިދާޅުވެ، ނަތަންޔާހޫގެ އިންޒާރެއް
10 މާރިޗު 2026 | އަންގާރަ 11:17އެގޮތުން ނަތަންޔާހޫ ވިދާޅުވީ އިޒްރޭލްގެ އުންމީދަކީ އީރާންގެ ރައްޔިތުން އެ ޤައުމުގެ އަނިޔާވެރި ވެރި ކަމުގެ ކަންބޮޑުވުން ތަކުން ސަލާމަތް ކުރުން ކަަަށާއި، އެކަން ނިންމާނީ އީރާންގެ ރައްޔިތުން ކަމަށް. ނަމަވެސް، މިހާތަނަށް އިޒްރޭލް އިން އެޅި ފިޔަވަޅު ތަކާ އެކު އީރާންގެ ބާރުތައް ކަނޑުވާލަމުންދާ ކަމަށާއި، އެ މަސައްކަތް އަދި ނުނިމޭ ކަމަށް ނަތަންޔާހޫ ވިދާޅުވި.
އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ | ގެޓީ އިމޭޖަސް
އެމެރިކާ އާއި އިޒްރޭލް އިން އީރާންއާ ދެކޮޅަށް ފަށާފައިވާ އަސްކަރީ ހަމަލާ ދިނުން އަދި ނުނިމޭ ކަމަށާއި، އީރާންގެ ދީނީ ލީޑަރޝިޕް ބަލި ކަށިވަމުންދާ ކަމަށް ވިދާޅުވެ، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އިންޒާރު ދެއްވައިފި އެވެ.
ހޯމަ ދުވަހުގެ ރޭ ނޭޝަނަލް ހެލްތު ކޮމާންޑް ސެންޓަރަށް ކުރެއްވި ޒިޔާރަތުގެ ތެރެއިން ދެއްކެވި ވާހަކަފުޅުގައި ނަތަންޔާހޫ މި އިންޒާރު ދެއްވާފައިވާއިރު، އަންގާރަ ދުވަހު އިޒްރޭލްގެ ސަރުކާރުން ވަނީ އެ ވާހަކަތައް ހިމެނޭ ބަޔާނެއް ވެސް ނެރެފަ އެވެ.
އެގޮތުން ނަތަންޔާހޫ ވިދާޅުވީ އިޒްރޭލްގެ އުންމީދަކީ އީރާންގެ ރައްޔިތުން އެ ޤައުމުގެ އަނިޔާވެރި ވެރި ކަމުގެ ކަންބޮޑުވުން ތަކުން ސަލާމަތް ކުރުން ކަަަށާއި، އެކަން ނިންމާނީ އީރާންގެ ރައްޔިތުން ކަމަށެވެ. ނަމަވެސް، މިހާތަނަށް އިޒްރޭލް އިން އެޅި ފިޔަވަޅު ތަކާ އެކު އީރާންގެ ބާރުތައް ކަނޑުވާލަމުންދާ ކަމަށާއި، އެ މަސައްކަތް އަދި ނުނިމޭ ކަމަށް ނަތަންޔާހޫ ވިދާޅުވި އެވެ.
އެމެރިކާ އާއި އިޒްރޭލް އިން އީރާން އަށް އަމާޒުކޮށް ހަމަލާ ދީފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. އެ ހަމަލާ ތަކުގައި އީރާންގެ އެންމެ މަތީ ވެރިޔާ އަދި ރޫހީ ލީޑަރު އާޔަތުﷲ އަލީ ޚާމަނާއީ ވަނީ އަވަހާރަ ކޮށްލައިފަ އެވެ. އެކަމުގެ ރައްދުގައި އީރާން އިން ގެންދަނީ އިޒްރޭލްގެ އިތުރުން، އެމެރިކާގެ އަމާޒު ތަަކަށް ވެސް ގިނަ ހަމަލާ ތަކެއް ދެމުންނެވެ.
އެމެރިކާ އާއި އިޒްރޭލް އިން އީރާން އަށް މިފަހަރު ހަމަލާތައް ދޭން ފެށިއިރު، އެމެރިކާ އާއި އީރާންއާ ދެމެދު ދިޔައީ ނިއުކްލިއަރ މަޝްވަރާތައް ކުރިއަށް ގެންދަމުންނެވެ. އެގޮތުން މަޝްވަރާ ތަކުގެ ތިން ބައްދަލުވުމެއް ބާއްވައި، ހަތަރު ވަނަ ބައްދަލުުވުމަށް ތައްޔާރު ވަމުން ދަނިކޮށް ހަމަލާ ދީފައިވެ އެވެ. އޭރު މަޝްވަރާ ތަކުގެ މެދުވެރިއެއްގެ ދައުރު އަދާ ކުރަމުން އައި އޮމާން އިން ބުނެފައި ވަނީ، މަޝްވަރާ ތަކުން ކުރިއެރުން ތަކެއް ހޯދިފައިވާ ކަމަށެވެ.
މިދިޔަ އަހަރު ވެސް އިޒްރޭލް އިން އީރާން އަށް ހަމަލާ ދީފައި ވަނީ އެމެރިކާއާ އެކު މަޝްވަރާތައް ކުރިއަށް ގެންދަނިކޮށެވެ. އެ ފަހަރު ވެސް އެމެރިކާ އިން ވަނީ އިޒްރޭލްއާ އެކުވެގެން އީރާން އަށް ހަމަލާ ތަކެއް ދީފަ އެވެ.
މަސްދަރު: އޭއެފްޕީ
