އީރާން އަލުން އާރާސްތު ނުކުރެވޭ ވަރަށް ވިހި ގުނަ ބާރުގަދަ ހަމަލާ ދޭނެ ކަމަށް ވިދާޅުވެ، ޓްރަމްޕް އިންޒާރު ދެއްވައިފި

ހޮރުމޯޒް ކަނޑު އޮޅި މެދުވެރިކޮށް ކުރާ ތެލުގެ ދަތުރު ތަކަށް އީރާން އިން ދަތި ކުރުން ކުރިމަތިކޮށް، އެ ދަތުރުތައް ހުއްޓުވަން އުޅޭ ނަމަ، އީރާނަށް އަމާޒުކޮށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު އެމެރިކާާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

ޓްރަމްޕް އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އީރާނުން ހޮރުމޯޒް ކަނޑު އޮޅިން ކުރާ ދަތުރު ތަކަށް ހުރަސް އަޅާ ނަމަ، އެމެރިކާ އިން މީގެ ކުރިން ހަމަލާ ދިން މިންވަރަށް ވުރެ ވިހި ގުނަ ބާރު ގަދަ ހަމަލާ ތަކެއް އީރާނަށް ދޭނެ ކަމަށެވެ. 

އީރާނަށް ހަމަލާ ދިނުމުގައި އެމެރިކާ އިން ފަސޭހަ އިން ނައްތާލެވޭ މުހިންމު އަމާޒުތަކަށް ހަމަލާ ދޭނެ ކަމަށާއި، އެކަމުގެ ސަބަބުން އީރާން އަކީ ޤައުމެއްގެ ގޮތުގައި އަލުން އާރާސްތު ކުރުން ވަރަށް އުނދަގޫ ޤައުމަކަށް ވެދާނެ ކަމުގެ އިންޒާރު ވެސް ޓްރަމްޕް ދެއްވި އެވެ. އެއާ އެކު ޓްރަމްޕް ވިދާޅުވީ، މަރާއި، އަލިފާން އަދި ރުޅިވެރިކަން އީރާންގެ މައްޗަށް ވެރި ކުރާނެ ކަމަށެވެ. ނަމަވެސް، އެފަދަ ކަމެއް ނުވުމަށް އެދި އުންމީދު ކުރައްވާ ކަމަށް އެ ޕޯސްޓުގައި ޓްރަމްޕް ވިދާޅުވި އެވެ. 

އެމެރިކާގެ ރައީސް ޓްރަމްޕް ވަނީ އެކަމަކީ ބައިނަލްއަޤުވާމީ ތެލުގެ ބާޒާރު ރައްކާތެރި ކުރުމުގެ ގޮތުން ކަމަށް ވިދާޅުވެ، އެއީ ޗައިނާ އަށާއި ހޯމޯޒް ކަނޑު އޮޅި ބޭނުން ކުރާ އެހެން ޤައުމު ތަަކަށް އެމެރިކާ އިން ދޭނެ ހަދިޔާއެއް ކަމަށް ވެސް ސިފަ ކުރައްވައިފަ އެވެ. ހަމަ އެއާ އެކު، އެކަމަކީ އެ ޤައުމު ތަކުން އެމެރިކާ އަށް ވަރަށް ބޮޑަށް ޝުކުރު އަދާ ކުރާނެ ކަމެއް ކަމަށް އުންމީދު ކުރައްވާ ކަމަށް ވެސް ޓްރަމްޕް ވަނީ ވިދާޅުވެފަ އެވެ.  

ހޮރުމޯޒް ކަނޑު އޮޅި އަކީ ދުނިޔޭގެ ތެލުގެ ދަތުރު ތަކުގައި ވަރަށް މުހިންމު ދައުރެއް އަދާ ކުރާ ކަނޑުއޮޅި އެކެވެ. ދުނިޔޭގެ ތެލުގެ ދަތުރު ތަކުގެ ބޮޑު ބައެއް މި ކަނޑު އޮޅި މެދުވެރިކޮށް ކުރިއަށް ގެންދެ އެވެ. އެމެރިކާ އާއި އިޒްރޭލުން އީރާނަށް ދިން ހަމަލާ ތަކުގެ ސަބަބުން، މިހާރު ފެށިފައިވާ ހަނގުރާމައިގެ ނުތަނަވަސްކަމާ ހުރެ އެ ދަތުރު ތަަކަށް ވެސް ވަނީ ދަތިތައް ކުރިމަތިވެފަ އެވެ. އެކަމުގެ ސަބަބުން ދުނިޔޭގެ ބާޒާރުގައި ތެލުގެ އަގު ވެސް ވަނީ މައްޗަށް އުފުލިފަ އެވެ.