ހަނގުރާމަ ހުއްޓާލުމުގެ ވިސްނުމެއް ނެތް، ހަމަލާ ދޭ ފަރާތް ތަކުގެ އަނގަ މަތީގައި ފައިން ޖަހާ ރަނގަޅު ފިލާވަޅެއް ދޭން ޖެހޭ: އީރާންގެ ޤާނޫނު ހަދާ މަޖިލީހުގެ ރައީސް

އެމެރިކާ އާއި އިޒްރޭލް އާއެކު މަޝްވަރާކޮށް، ހަނގުރާމަ ހުއްޓާލުމުގެ އެއްވެސް ވިސްނުނެއް އީރާން އިން ނުގެން ގުޅޭ ކަމަށް، އެ ޤައުމުގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ވިދާޅުވެއްޖެ އެވެ.

އެމެރިކާ އާއި އިޒްރޭލް އިން ދިން ހަމަލާ ތަކުގައި ރައްދުގައި އީރާން ވެސް ވަރުގަދަ ހަމަލާ ތަކެއް ދެމުން އަންނައިރު، ސަރަހައްދުގެ ހަމަ ނުޖެހުން ވަނީ ވަރަށް ބޮޑަށް ގެއްލިފަ އެވެ. އެއާ އެކު އަންގާރަ ދުވަހު ޣަލިބާފް ސޯޝަލް މީޑިއާގައި ކުރެއްވި ޕޯސްޓެއްގައި ވަނީ، ހަނގުރާމަ ހުއްޓާލުމުގެ ވިސްނުން އީރާންގެ ނެތް ކަމަށް ވިދާޅުވެފަ އެވެ. 

އެ ޕޯސްޓުގައި ޤާނޫނު ހަދާ މަޖިލީހުގެ ރައީސް ވިދާޅުވީ، މިވަގުތު އެއްވެސް ގޮތަކަށް ހަނގުރާމަ ހުއްޓާލުމަށް އީރާން އިން ބޭނުން ނުވާ ކަމަށެވެ. އަދި އީރާން އަށް ހަމަލާދޭ ފަރާތް ތަކަށް ދޭން ޖެހޭ އަބަދު ދޭން ޖެހޭނެ ކަމަށާއި، އެފަދަ ފަރާތް ތަކުގެ "އަނގަ މަތީގައި ފައިން ޖަހައި" ރަނގަޅު ފިލާވަޅެއް ދަސްކޮށްދޭން ޖެހޭ ކަމަށް އޭނާ ވިދާޅުވި އެވެ.

އެއާ އެކު ޣަލިބާފް ވިދާޅުވީ މިއީ އީރާންގެ މުގައްދަސް ފަސް ގަނޑަކަށް ހަމަލާ ދިނުމުގެ ވިސްނުން ދެ ވަނަ ފަހަރަށް އެއްވެސް ބަޔަކު ނުގެން ގުޅޭނެ ފަދަ ގޮތަކަށް ދޭން ޖެހޭ ރައްދެއް ކަމަށެވެ. މި ވަގުތަކީ އީރާންގެ އިސްވެރިން، އެމެރިކާާ އާއި އިޒްރޭލް އަށް ރައްދުގައި ވަރުގަދަ އިންޒާރު ތަކެއް ދެމުން އަންނަ ވަގުތެއްކަން ވެސް ފާހަގަ ކުރެވެ އެވެ. 

މީގެ އިތުރުން ޣަލިބާފް ވަނީ އިޒްރޭލް އިން ގެންގުޅޭ ސިޔާސަތު ތަކަށް ވަރަށް ބޮޑަށް ފާޑު ވިދާޅުވެފަ އެވެ. އޭނާ ވިދާޅުވި ގޮތުގައި އިޒްރޭލް އިން މަސައްކަތް ކުރަނީ "ހަނގުރާމަ، މަޝްވަރާ އަދި ހަނގުރާމަ ހުއްޓާލުން" މި ބުރު ތަކުރާރު ކޮށްގެން އެ ސަރަހައްދުގައި އެ މީހުންގެ ބާރުވެރިކަން ދެމެހެއްޓުމަށެވެ. އީރާން އިން ބޭނުން ވަނީ އިޒްރޭލް އިން ގެންގުޅޭ މި އުސޫލު ނައްތާލައި، އެ ސިލްސިލާ މެދު ކަނޑާލުމަށް ކަމަށް ވެސް އޭނާ ވިދާޅުވި އެވެ. 

ހަމަ އެހެންމެ އެމެރިކާ އާއި އިޒްރޭލް އާއެކު މަޝްވަރާގެ މޭޒަށް ދިޔުމަކީ ހަނގުރާމަ އަށް އޮތް ޙައްލެއް ކަމަށް އީރާން އިން ޤަބޫލު ނުކުރާ ކަމަށް، ތަކުރާރުކޮށް ޣަލިބާފް ވަނީ ވިދާޅުވެފަ އެވެ. އެއާ އެކު ޣަލިބާާފްގެ މި ވާހަކަ ތަކުން ދޭހަ ވަނީ، އީރާން އިން މިހާރު އިސްކަން ދެނީ ހަމަލާ ތަކަށް އަސްކަރީ ގޮތުން ވަރުގަދަ ރައްދެއް ދިނުމަށް ކަމަށެވެ. 

ބައިނަލްއަޤުވާމީ މަސްރަހު ދިރާސާ ކުރާ ފަރާތްތަކުން ބުނެފައިވާ ގޮތުގައި، އީރާންގެ އިސްވެރިން މިފަދަ އިންޒާރު ތަކެއް ދެމުން ދިޔުމަކީ ކުރިއަށް އޮތް ތަނުގައި މަސްރަހަށް ބޮޑު ބަދަލެއް އަންނާނެ ކަމެކެވެ.