އީރާނުން ހުއްޓުމެއް ނެތި 3 ގަޑިއިރު ވަންދެން މިސައިލް ހަމަލާތައް އިޒްރޭލާއި އެމެރިކާގެ އަމާޒުތަކަށް ދީފި
އީރާނުގެ އައިއާރުޖީސީން ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ ދަށުން، އެމެރިކާ އާއި އިޒްރޭލުގެ އަސްކަރީ މަރުކަޒުތަކަށާއި މުހިންމު ބަނދަރުތަކަށް ބާރުގަދަ މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފި. ތިން ގަޑިއިރަށް ދެމިގެންދިޔަ މި ހަމަލާތަކަކީ އީރާނުގެ ފަސްގަނޑަށް ދިން ހަމަލާތަކުގެ ބަދަލުހިފުމެއް ކަމަށާއި، ދުޝްމަނުން ބަލިވަންދެން މި އޮޕަރޭޝަން މެދުކެނޑުމެއްނެތި ކުރިއަށްގެންދާނެ ކަމަށް އެ ފައުޖުން ބުނޭ. މި ހަމަލާތަކުގައި ތެލް އަވީވްގެ އަސްކަރީ މަރުކަޒުތަކުގެ އިތުރުން ބަހްރޭންގައި ހުންނަ އެމެރިކާގެ ފަސްވަނަ ފްލީޓަށް ވެސް އަމާޒުކޮށްފައިވޭ.
އީރާނުން މިސައިލެއް ފޮނުވާލަނީ. | ތަސްނީމް ނިއުސް އޭޖެންސީ
އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން، އެމެރިކާ އާއި ޒަޔަނިސްޓުންގެ މުހިންމު އަދި ސްޓްރެޓެޖިކް އަމާޒުފަތްތަކަށް ހަމަލާދިނުމަށް ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ އާ ބުރުތަކެއް ފަށާފައިވާކަން އިއުލާނުކޮށްފިއެވެ.
އަންގާރަ ދުވަހު އެ ފައުޖުގެ ޕަބްލިކް ރިލޭޝަންސް އޮފީހުން ނެރުނު ބަޔާނެއްގައި ބުނެފައިވަނީ، މި އޮޕަރޭޝަނުގެ "37 ވަނަ ބުރު" މިހާރު ކުރިއަށްދާ ކަމަށެވެ.
'3 ގަޑިއިރަށް ދެމިގެންދިޔަ ވަރުގަދަ ހަމަލާތަކެއް'
އައިއާރުޖީސީން ބުނި ގޮތުގައި، އެންމެ ފަހުން ފެށި މި ބުރުގެ ހަމަލާތައް ތިން ގަޑިއިރަށްވުރެ ގިނަ އިރަށް ދެމިގެންދިޔައެވެ. މި ހަމަލާތަކަކީ މެދުކެނޑުމެއް ނެތި، އެކި ފަންތީގެ މިސައިލްތައް ބޭނުންކޮށްގެން ދިން ހަމަލާތަކެއް ކަމަށާއި، އޭގެ ތެރޭގައި އެންމެ ބަރު ބާވަތުގެ މިސައިލްތައް ވެސް ހިމެނޭ ކަމަށް އެ ބަޔާނުގައިވެއެވެ.
މި މަރުހަލާގައި އިރާގުގެ ކުރްދިސްތާނުގެ އަރްބީލްގައި ހުރި އަމާޒުފަތްތަކަށާއި، ބަހްރޭންގައި އޮންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓަށާއި، ތެލް އަވީވްގެ މެދުތެރޭގައި އޮންނަ ބޭރު ޔައުގޫބްގައި ހުރި އަސްކަރީ މަރުކަޒުތަކަށް ހަމަލާދީފައިވާ ކަމަށް އައިއާރުޖީސީން ބުނެއެވެ.
މީގެ އިތުރުން، ތެލް އަވީވްގެ ދެކުނުގައި ހުންނަ ސެޓެލައިޓް މުވާސަލާތީ މަރުކަޒަކަށް ދެވަނަ ފަހަރަށް ހަމަލާދީފައިވާ ކަމަށާއި، އިޒްރޭލުން ހިފާފައިވާ ހައިފާ ބަނދަރަށް ވެސް ހަމަލާދީފައިވާ ކަމަށް އެ ފައުޖުން ހާމަކުރެއެވެ.
މި ހަމަލާތައް ދިނުމަށް ބޭނުންކޮށްފައިވަނީ "ޚައިބަރު ޝަކަން"، "ގަދަރު" އަދި ބާރުގަދަ "ޚުއްރަމްޝަހަރު" މިސައިލްތައް ކަމަށް ބަޔާނުގައި ބުނެފައިވެއެވެ.
މި ހުރިހާ މިސައިލްތަކަކީ ވެސް ގިނަ އަދަދެއްގެ ގޮވާތަކެތި (ވޯހެޑްސް) އުފުލޭ މިސައިލްތަކެއް ކަމަށާއި، "ގަދަރު" މަރުކާގެ މިސައިލްތަކުގައި އެއް ޓަނުގެ ބަރުދަން ހުންނަ ގޮވާތަކެތި ހަރުކޮށްފައިވާ ކަމަށް ވެސް ބުނެފައިވެއެވެ.
"އޮޕަރޭޝަން ޓްރޫ ޕްރޮމިސް 4" ފަށާފައިވަނީ މިދިޔަ މަހުގެ ފަހުކޮޅު، އެމެރިކާ އާއި އިޒްރޭލުން އީރާނުގެ ފަސްގަނޑަށް ދިން ހަމަލާތަކާ ގުޅިގެންނެވެ.
މި އޮޕަރޭޝަނުގެ ދަށުން އައިއާރުޖީސީން ވަނީ ސަރަހައްދުގައި ހުރި އެމެރިކާ އާއި އިޒްރޭލުގެ ގިނަ އަމާޒުފަތްތަކަކަށް ސަތޭކައަށްވުރެ ގިނަ ބެލިސްޓިކް އަދި ހައިޕަރސޮނިކް މިސައިލާއި، ހަމަލާދޭ ޑްރޯން ފޮނުވާލާފައެވެ.
މިހާތަނަށް ހަމަލާދީފައިވާ މުހިންމު ތަންތަނުގެ ތެރޭގައި، އިޒްރޭލުން ހިފާފައިވާ މުގައްދަސް ގުދުސް ސިޓީ އާއި، އިޒްރޭލުގެ ޓެކްނޮލޮޖީ މަރުކަޒު ކަމަށްވާ ބީރު ޝެވާގެ އިތުރުން، އިންޑިއާ ކަނޑުގައި އޮތް އެމެރިކާގެ މަނަވަރު "އަބްރަހަމް ލިންކަން" އާއި އެމެރިކާގެ އެހެން މަނަވަރެއް ހިމެނެއެވެ.
އަންގާރަ ދުވަހުގެ ކުރީކޮޅު އައިއާރުޖީސީން ވަނީ މި އޮޕަރޭޝަނުގެ 36 ވަނަ ބުރު ކުރިއަށް ގެންގޮސްފައިވާކަން އިއުލާނުކޮށްފައެވެ. އެ ބުރުގައި ގަދަރު، އިމާދު އަދި ޚައިބަރު ޝަކަން މިސައިލާއި ޑްރޯން ބޭނުންކޮށްގެން އިޒްރޭލުން ހިފާފައިވާ ސަރަހައްދުތަކަށާއި އެމެރިކާގެ "ޓެރަރިސްޓް ލަޝްކަރުގެ" މަރުކަޒުތަކަށް ހަމަލާދީފައިވެއެވެ.
އޭގެ ކުރިން ކުރިއަށްގެންދިޔަ 35 ވަނަ ބުރުގައި، ފައްތާހު، އިމާދު، ޚައިބަރު އަދި ގަދަރު މަރުކާގެ ބާރުގަދަ މިސައިލްތައް ބޭނުންކޮށްގެން ތެލް އަވީވް އާއި، ގުދުސްގެ ބައިތު ޝެމޭޝްގެ އިތުރުން އެމެރިކާގެ އަސްކަރީ މަރުކަޒުތަކަށް ހަމަލާދީފައިވާ ކަމަށް އައިއާރުޖީސީން ރިޕޯޓުކޮށްފައިވެއެވެ.
'އަހަރެމެންގެ އަމާޒަކީ ދުޝްމަނުން ފުރިހަމައަށް ބަލިކޮށްލުން'
މީގެ އިތުރުން، އީރާނުގެ މައްޗަށް އޮތް ހަނގުރާމައިގެ ބިރުވެރިކަން ފިލައިދަންދެން މި ހަމަލާތައް ކުރިއަށްގެންދާނެ ކަމަށް އައިއާރުޖީސީން ވަނީ ވައުދުވެފައެވެ.
"އަހަރެމެން މި ހަމަލާތައް ދެމުންދަނީ ވަރަށް ބޮޑަށް ރޭވިގެން، ބާރުގަދަކޮށް. އަހަރެމެންގެ ހަމައެކަނި އަމާޒަކީ ދުޝްމަނުން ފުރިހަމައަށް ބަލިވެ، އަމާންދިނުން،" އައިއާރުޖީސީގެ ބަޔާނުގައި ބުނެފައިވެއެވެ.
