ރާއްޖެއަށް ދަތުރު ނުކުރުމަށް އިނގިރޭސިވިލާތުގެ ރައްޔިތުންނަށް އެ ގައުމުގެ ސަރުކާރުން އަންގައިފި
11 މާރިޗު 2026 | ބުދަ 00:58މެދުއިރުމަތީގެ ހަމަނުޖެހުންތަކާ ގުޅިގެން ވައިގެ ދަތުރުފަތުރަށް ބުރޫއަރަމުންދާތީ، އިނގިރޭސިވިލާތުގެ ރައްޔިތުން ދަތުރުކުރުމުގައި ސަމާލުވުމަށް އެ ގައުމުގެ ފޮރިން އޮފީހުން ވަނީ އިލްތިމާސްކޮށްފައި. މި ހާލަތާ ގުޅިގެން ބައެއް ގައުމުތަކުގައި ތިބި އިނގިރޭސި ރައްޔިތުން އަނބުރާ ގައުމަށް ގެންދިއުމުގެ މަސައްކަތް ކުރަމުންދާއިރު، ދަތުރުކުރުމުގެ ކުރިން އެއާލައިންތަކުގެ މައުލޫމާތާއި އިންޝުއަރެންސް ކަންކަން ރަނގަޅަށް ޗެކްކުރުމަށް ވަނީ އިރުޝާދު ދީފައި. އެހެންކަމުން، ދަތުރުވެރިން އެންމެ ފަހުގެ މައުލޫމާތު ހޯދުމަށާއި ދަތުރުގެ ޕްލޭންތައް ރަސްމީ އިދާރާތަކުގައި ރަޖިސްޓްރީ ކުރުމަށް ސަރުކާރުން ބާރުއަޅާ.
މި ފޮޓޯއިން ފެންނަނީ އަރިއަތޮޅު ދެކުނުބުރީގައި އޮންނަ މަތީ ފަންތީގެ ރިސޯޓެއް ކަމަށްވާ އައުޓްރިގަރ މޯލްޑިވްސް މާފުށިވަރު ރިސޯޓު މަތިން ފެންނަ މަންޒަރު. | ގެޓީ އިމޭޖަސް
މެދުއިރުމަތީގެ މަސްރަހު ގޯސްވަމުންދާތީ، އިނގިރޭސިވިލާތުގެ ފޮރިން އޮފީހުން "ދަތުރު ނުކުރުމަށް" އިރުޝާދުދޭ ގައުމުތަކުގެ ލިސްޓު ގައި ރާއްޖެ ހިމަނައި އެކަން ފަތުރުވެރިންގެ ސަމާލު ކަމަށް ގެނެސްފި އެވެ.
އިނގިރޭސިވިލާތުގެ ފޮރިން، ކޮމަންވެލްތު އެންޑް ޑިވެލޮޕްމަންޓް އޮފީސް (އެފް.ސީ.ޑީ.އޯ) އިން އަލަށް ނެރުނު މި އިންޒާރުގައި ރާއްޖޭގެ އިތުރުން ސައިޕްރަސް، ތުރުކީ އަދި ސްރީލަންކާ ފަދަ އިނގިރޭސިންގެ މެދުގައި މަގުބޫލު މަންޒިލްތައް ވަނީ ހިމަނާފައެވެ.
މެދުއިރުމަތީގެ ހަމަނުޖެހުންތަކަށް 11 ދުވަސް ވެފައިވާއިރު، މި ހަނގުރާމައިގައި ސީދާ ގޮތުން ބައިވެރިނުވާ ގައުމުތަކުގެ ވައިގެ ސަރަހައްދުތައް ބަންދުކުރުމާއި، ފްލައިޓްތައް ކެންސަލްވުމުގެ އިތުރުން ދަތުރުފަތުރުގެ މަގުތަކަށް ބުރޫއަރަމުންދާ ކަމަށް އޮފިޝަލުން ވިދާޅުވެއެވެ.
މި ހާލަތާ ގުޅިގެން އޮމާން އާއި ޔުނައިޓެޑް އަރަބް އެމިރޭޓްސް (ޔޫ.އޭ.އީ) ފަދަ ގައުމުތަކުގައި ތިބި އިނގިރޭސި ރައްޔިތުން މިހާރުވެސް ވަނީ އެ ގައުމުތަކުން ބާލާފައެވެ. އަދި އިނގިރޭސި ސަރުކާރުން ދަނީ ޗާޓަރު ފްލައިޓްތައް މެދުވެރިކޮށް އެ ގައުމުގެ ރައްޔިތުން ރައްކާތެރިކަމާއެކު އަނބުރާ ގައުމަށް ގެންދިއުމުގެ އިންތިޒާމުތައް ހަމަޖައްސަމުންނެވެ. އެހެންކަމުން، ދަތުރުކުރުމުގެ ކުރިން އެއާލައިންތަކުން ދޭ މައުލޫމާތުތަކަށް ސަމާލުވުމަށާއި، ޓްރެވަލް އިންޝުއަރެންސްގެ ކަންކަން ރަނގަޅަށް ޗެކްކުރުމުގެ އިތުރުން، ދަތުރުގެ ޕްލޭންތައް އެފް.ސީ.ޑީ.އޯ ގައި ރަޖިސްޓްރީ ކުރުމަށް އިނގިރޭސި ރައްޔިތުންނަށް މިހާރު ވަނީ އިރުޝާދު ދީފައެވެ.
