ސަރަހައްދީ ސަލާމަތާއި ހަމަޖެހުމަކީ "އެންމެނަށް އޮންނަންޖެހޭނެ އެއްޗެއް ކަމަށާއި، ނޫން ނަމަ އެއްވެސް ބަޔަކަށް އެ އަމާންކަން ނޯންނާނެ" ކަމަށް ބުނެ އީރާނުން އިންޒާރު ދީފި
އީރާނުގެ އައިއާރުޖީސީން "އޮޕަރޭޝަން ޓްރޫ ޕްރޮމިސް 4" ގެ ދަށުން އިޒްރޭލާއި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ވަރުގަދަ މިސައިލް އަދި ޑްރޯން ހަމަލާތަކެއް ދޭން ފަށައިފި. މި ހަމަލާތަކުގައި ހައިޕަސޯނިކް މިސައިލްތައް ބޭނުންކޮށްފައިވާއިރު، މިއީ އެމެރިކާ އާއި އިޒްރޭލުގެ އުދުވާނަށް ރައްދު ދިނުމުގެ ގޮތުން ފެށި އާ މަރުހަލާއެއް ކަމަށް އީރާނުން ބުނޭ. ސަރަހައްދީ ސަލާމަތާއި އަމާންކަން އޮންނާނީ އެންމެނަށް ކަމަށާއި، އެ ނޫން ނަމަ އެއްވެސް ބަޔަކަށް އެ ފުރުސަތު ނޯންނާނެ ކަމަށް ބުނެ އީރާނުން ވަނީ ހަރުކަށި އިންޒާރެއް ދީފައި.
އިރާނުން ފޮނުވާލި މިސައިލެއް އިޒްރޭލުގެ ތެލް އަވީވަށް ސީދާ އަމާޒުވުމުގެ ސަބަބުން އެ ސަރަހައްދަށް ލިބިފައިވާ ގެއްލުންތައް ބަލައި ސާވޭ ކުރުމުގެ މަސައްކަތް ރެސްކިއު މަސައްކަތްތެރިންނާއި އަސްކަރިއްޔާގެ ފަރާތްތަކުން ކުރަނީ. | އޭޕީ
އީރާނާ ދެކޮޅަށް އެމެރިކާ އާއި އިޒްރޭލުން ފަށާފައިވާ އުދުވާނަށް ދެ ހަފުތާ ވެފައިވަނިކޮށް، އިޒްރޭލުން ހިފާފައިވާ ފަލަސްތީނުގެ ބިންތަކަށާއި ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އީރާނުގެ ހަތިޔާރު އެޅި ފައުޖުތަކުން ވަރުގަދަ ޑްރޯން އަދި މިސައިލް ހަމަލާތަކެއް އަލުން ފަށައިފިއެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ނެރުނު ބަޔާނެއްގައި ބުނެފައިވަނީ، "އޮޕަރޭޝަން ޓްރޫ ޕްރޮމިސް 4" ގެ ދަށުން 34 ވަނަ ބުރުގެ ހަމަލާތައް އަންގާރަ ދުވަހު ފަށާފައިވާ ކަމަށެވެ.
މި ބަޔާނުގައި އައިއާރުޖީސީން ވަނީ ހުޅަނގު އޭޝިއާގެ ސަލާމަތާއި ހަމަޖެހުމަކީ "އެންމެނަށް އޮންނަންޖެހޭނެ އެއްޗެއް ކަމަށާއި، އެ ނޫން ނަމަ އެއްވެސް ބަޔަކަށް އެ އަމާންކަން ނޯންނާނެ" ކަމަށް ބުނެ އިންޒާރު ދީފައެވެ.
އައިއާރުޖީސީގެ ބަޔާނުގައި އިތުރަށް ބުނެފައިވަނީ، ގަދަރު، އިމާދު އަދި ފައްތާ ސީލީޒްގެ ބާރުގަދަ ސްޓްރެޓީޖިކް މިސައިލްތަކާއި، ޚައިބަރު ހައިޕަސޯނިކް މިސައިލްތައް ބޭނުންކޮށްގެން ދޭން ފެށި މި ހަމަލާތަކާއެކު، އެމެރިކާ އާއި އިޒްރޭލުގެ އުދުވާނާ ދެކޮޅަށް ކުރާ ހަނގުރާމަ އާ މަރުހަލާއަކަށް ގޮސްފައިވާ ކަމަށެވެ.
އީރާނުގެ އެއިރޯސްޕޭސް ފޯސްގެ މިސައިލްތަކާއި ޑްރޯންތައް ބޭނުންކޮށްގެން ދިން މި ހަމަލާތަކުގައި، ޔޫއޭއީގައި ހުންނަ އަލް-ޛަފްރާ އެއާބޭސް އާއި އުރުދުންގައި ހުންނަ އަލް-ޖަފީރު ބޭސްގައި ތިބި އެމެރިކާ ސިފައިންނަށް ކާމިޔާބުކަމާއެކު އަމާޒުކޮށްފައިވާ ކަމަށް އެ ބަޔާނުގައިވެއެވެ.
މީގެ އިތުރުން، އިޒްރޭލުން ހިފާފައިވާ ބިންތަކުގެ އުތުރުގައި ހުރި އަސްކަރީ މަރުކަޒުތަކާއި، ޚާއްސަކޮށް ރާމަތު ޑޭވިޑް އެއާބޭސް އާއި، ހައިފާގައި ހުންނަ އެއާޕޯޓުގެ އިތުރުން އިޒްރޭލުގެ މިސައިލް ފޮނުވާލާ ތަންތަނަށް އީރާނުގެ ބާރުގަދަ މިސައިލްތަކުން ހަމަލާދީފައިވާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
އެމެރިކާ އާއި އިޒްރޭލުން ގާނޫނާ ޚިލާފަށް އީރާނުގެ އުމްރާނީ ވަސީލަތްތަކަށް ހަމަލާދީ، އާންމު ރައްޔިތުން މަރަމުންދާ ދިއުމަށް ރައްދު ނުދީ ދޫކޮށްނުލާނެ ކަމަށް އައިއާރުޖީސީން ވަނީ ތަކުރާރުކޮށް ބުނެފައެވެ.
އަދި ސަރަހައްދުގައި ހުރި އެމެރިކާ އާއި އިޒްރޭލުގެ އަސްކަރީ މަރުކަޒުތަކާއި ވަސީލަތްތަކުގެ ތެރެއިން އީރާނުން ހަމަލާދިނުމަށް ކަނޑައަޅާފައިވާ ތަންތަނުގެ ލިސްޓު، ބަލިކަށިވަމުންދާ ދުޝްމަނުންނަށް ހަމަލާދެވޭނެ ތަންތަނަށްވުރެ ދިހަ ގުނަ އިތުރު ކަމުގެ ޔަގީންކަންވެސް އީރާނުން ވަނީ ދީފައެވެ.
ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން އެއްވެސް ޖެހިލުމެއް ނެތި އީރާނާ ދެކޮޅަށް އުދުވާނީ ހަނގުރާމައެއް ފެށި ފަހުން، އީރާނުގެ ހަތިޔާރު އެޅި ފައުޖުތަކުން ދަނީ ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި އިޒްރޭލުން ހިފާފައިވާ ބިންތަކަށް ރައްދު ހަމަލާތައް ދެމުންނެވެ.
