މިއީ ސީޒަނުގެ އެންމެ މުހިންމު ވަގުތު ކޮޅު: ފްލިކް

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ނިއުކާސަލް ޔުނައިޓެޑާ ދެކޮޅަށް ނިކުންނައިރު، މިއީ ސީޒަންގެ އެންމެ މުހިންމު ވަގުތު ކޮޅު ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ.

ނިއުކާސަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، މިއީ ސީޒަންގައި ކުރިމަތި ވާނެ އެންމެ މުހިންމު ވަގުތު ކޮޅު ކަމަށާއި، މުޅި ބާސެލޯނާ އޮތީ އެކަމަށް ތައްޔާރަށް ކަމަށެވެ. ނިއުކާސަލްގެ ދަނޑުގައި އެ ޓީމާ ދެކޮޅަށް ކުޅޭ މެޗަކީ ވަރަށް ފޯރި ގަދަ މާހައުލެއްގައި ކުޅެވޭ މެޗަކަށް ވާނެ ކަމަށް ފްލިކް ބުންޏެވެ.

މީގެ އިތުރުން ފްލިކް ބުނީ ނިއުކާސަލް އަކީ ވަރަށް ވަރުގަދަ ޓީމެއް ކަމަށާއި، އެ ޓީމުގެ ކުޅުން ވަރަށް ރަނގަޅު ކަމަށެވެ. ޚާއްސަކޮށް ނިއުކާސަލްއާ ދެކޮޅަށް ކުޅޭއިރު، ބާސެލޯނާ އިން ވަރަށް ރަނގަޅަށް ޑިފެންސް ކުރަން ޖެހޭނެ ކަމަށް ފްލިކް ވަނީ ބުނެފަ އެވެ. އެކަން ފާހަގަކޮށް ފްލިކް ބުނީ، ދެ ލެގު ކުޅެން ޖެހުނު ނަަމަވެސް، އަމިއްލަ ދަނޑުން ބޭރުގައި ކުޅޭ ލެގުން ނަތީޖާ ނެރުމަކީ ވަރަށް މުހިންމު ކަމެއް ކަމަށެވެ.

ޗެމްޕިއަންސް ލީގުގެ ވާދަވެރިކަމާ ގުޅޭ ގޮތުން ވާހަކަ ދައްކަމުން ފްލިކް ބުނީ، އެއީ ތަފާތު މުބާރާތެއް ކަމަށާއި، އެންމެން ވެސް ބޭނުން ވަނީ އެ މުބާރާތުގައި ތަފާތު ދައްކަން ކަމަށެވެ. ޚާއްސަކޮށް އިދިކޮޅު ޓީމުން އަބަދު ވެސް ވަރަށް ޕްރެޝަރު ކުރާނެ ކަަމަށާއި، ދަނޑު މަތީގައި ބާސެލޯނާ އިން އިތުބާރާ އެކު ތިބެން ޖެހޭނެ ކަމަށް ވެސް ފްލިކް ބުނެފައިވެ އެވެ. އެކަން ފާހަގަކޮށް ފްލިކް ބުނީ، ނިއުކާސަލް އަކީ ކައުންޓަ އެޓޭކުގައި ވެސް ވަރަށް ނުރައްކާތެރި ޓީމެއް ކަމަށެވެ.

އިތުރަށް ވާހަކަ ދައްކަމުން ފްލިކް ބުނީ ބާސެލޯނާގެ ކުޅުންތެރިން އިތުބާާރު އޮންނަ ކަމަށާއި، ޚާއްސަކޮށް ޒުވާން ކުޅުންތެރިންނަށް އޮންނަ އުންމީދު ބޮޑު ކަމަށެވެ. ނިއުކާސަލްގެ އަމިއްލަ ދަނޑުގައި ބާސެލޯނާ އިން އެ ޓީމާ ދެކޮޅަށް ނިކުންނާނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން އެކެއް ޖަހާއިރު އެވެ.